MARKA 13
13
Madaikhoh sbai mani grao Jisu sainthi ba
(Mt. 24.1-2; Lk. 21.5-6)
1Jisu Madaikhoh ni phrang baigo bani yaohon ha boni yaohon rikphayarao ni bising ha saosi bokhe thi ba, Nai lah, slingriyah, ebo noh ode longthai buthu de bisi majang du.
2Jisu thiphin ba, Ebo noh gedeba khe nisi nu du? Longthai masi mang mang bo grungya hi dong nang niya; khrip longthai buthu grungya hi dong nang niya.
Dukhu-hadi ar dukhu rijaoba ni grao
(Mt. 24.3-14; Lk. 21.7-19)
3Jisu Madaikhoh gede sagang hi Oliv hading ha khamhi dong ba. Peter, Jakob ar Andria boniha phirik phirik phaihi sing ba, 4Ebo buthu la bakhali ja nang, ning jinthane sainthi lah. Ode, bo buthu sophaima kha thihi phnu mani sin snadi japhai nang?
5Jisu bonsi khe thi ba, Saosi bo nisi khe thokhiya mane girik lah. 6Gabang subung Krista ang ning thihi ani bumu lahi phaima se, ar gabang subung khe thokhi nang. 7Ode, jbah jang jbah ni grao gublungyaba khe nisi khna hi nisi da gmang. Bo buthu de sophaima ning, thikhabo jamma nede niya kho. 8Jadi gibin jang jadi gibin jbah ja nang, raji gibin jang raji gibin jbah ja nang, hathan gibin gibin ha banglama phai nang, asari galai nang. Bo buthu de sao go mane saba lai se ja ma se.
9“Odebani, nisi mirik hi dong lah. Nisi khe remhi bisardar niha lang nang. Hamba graojma khe sainthi mane nisi ani bumu ni khlai hi hojarao ar Rajarao ni sagang ha song nang. 10Thikhabo, yaohonthao ni basain sophaiya sani sagang ha, hamba graojma khe sainthi ma nang ma. 11Ar nisi remjao hi nisi khe bisar khoh ha lang khabo, snadi grao khe thi ma thihi nisi waimu da nang. Bo bubli sophai baha, snadi grao khe ning thi ba, bo nisini grao niyahi, Bese Gathar ni phrang phaiyaba grao ja ma. 12Subungrao jarni bada-buphlung khe rem ri nang, odelei ning bupha jarni ansarao khe rem ri nang, ansarao bo jarni bupha khe sthai nang. 13Ani khlai hi khrip bo nisi khe naisle nang. Thikhabo, yaohonthao sosi sere khah lao nang, bo se ning sogo jao ma se.”
Gmangthao sisi khinthao siyaba
(Mt. 24.15-28; Lk. 21.20-24)
14Khinthaosiyaba boni songthan niyayaba hathan ha songba khe nisi nu nang. Sere phuri re ebo khe mithi thing. Boha de Judai rajiha dongyarao, bonsi hading gede khai la thing. 15Sere noh khim saoha dong, musi jinis khe bo la mane da nakhai thing. 16Ode, phadain ha dongyarao bo jarni rih khe laphai mane noh ha da phaiphin thing. 17Sao khonggin jayarao ar nana gnangrao ni khlai hi bo basain buthu hade gabang dukhu ja ma. 18Odebani, maisingha jaya mane Madai niha bi lah. 19Bede thikhade, bo basain ni dukhu de Madai sangsai jenba ni phrang duha sosi musi khali bo jaya kho, ar jabo ja nang niya kha. 20Bo basain buthu khe Gabra songthe daoriya thikhade subung saosibo thanghi dong nang niya. Bo jarne saikhoyarao ni khlai hi bo basain buthu khede songthe ri ma se.
21Okhali ha asababo nisi khe thi nang, Nai lah, Messiah eraha dong ode oraha dong thi re thikhade bokhe da lon lah. 22Bede thikhade Krista mosolrao ode gorasali mosolrao baigo nang, bonsi gmang thaosisi sin phnu hi khusi dang nang. Blai khade saikho jaoyarao khebo thokhiphu mani khlai hi khusi dang ma se. 23Nisi de girik hi dong lah, bo basain phaiya sani sagang ha nisi ne khrip khe bo sainthi kha.
Marsini Basa phaiyaba ni grao
(Mt. 24.29-31; Lk. 21.25-28)
24Bo dukhu ni basain ni yaohon hade sainbo andar ja lang la nang; ar dainbo jna nang niya kha. 25Nokhasao ni phrang sathrai buthu garai nang ar nokhasao ha raothai buthu smao nang. 26Okhali ni basain hade Marsini Basa, raothai gedeba ar muima jang jimi ha phaihi nujao nang. 27Boni yaohonha mulug grongbri ha habsao thaothan sosi, boni deglarao khe haihahi bo jar saikhoyarao khe bojom khlai ma se.
Thaikhrao phang ni slingrithai
(Mt. 24.32-35; Lk. 21.29-33)
28“Thaikhrao phang ni phrang daogari nai hi nisi sling lah. Boni boso ridim hi balai gili baigo phai kha ning jalang japhai kha thihi nisi tharmai du 29Odelai ning, nisi bo buthu sophaiba khe nu kha ning, bo phaima ni bubli sampha kha ar derga kholei ha songphai kha thihi tharmai lah. 30Ebo buthu sophaiya side duha thanghi dongyarao khripde thihthar nang niya thihi wainso lah. 31Habsao ar nokhasao jam lang nang, thikhabo ani graothai de jam nang niya.”
Sain ar bubli saosi ne bo mithiya
(Mt. 24.36-44)
32Thikhabo, bo basain ar bubli khede Bupha khe garhide sorgoni deglaraobo, ar Basabo, saosibo mithiya. 33Nalaibo girikhi salaihi bi dada dong lah, bede thikhade bo basain ar bubli khe nisi mithiya. 34Subung saosi jarni lengrao niha khusi dang mane nephahi ar derga naisoyaba khe bo girikhi dong mane sani dada, jarni noh khe garlang hi hah gajain ha thang la ba lai se. 35Odebani, nisi grik hi dong lah, noh bubra bakhali sophai phin ma, sainbli habo ja la phu re, hor habo ja la phu re, daono gisi habo ja la phu re, phorong habo ja la phu re, nisi mithiya. 36Ode niyakha la srap phaiphin khade, nisi thuhi dongba khe bo nu nang. 37Snadi grao khe ang nisi niha sainthi ba, khrip niha ang sainthi ba se, girik hi dong lah.
Currently Selected:
MARKA 13: DIMASBSI
Highlight
Share
Copy
Want to have your highlights saved across all your devices? Sign up or sign in
Dimasa N.T. with PSA amp PRO (BSI)
© The Bible Society of India, 2006.
Used by permission. All rights reserved worldwide.
