MARKA 16
16
Jisu baijaphin ba
(Mt. 28.1-8; Lk. 24.1-12; Jn. 20.1-10)
1Lenggo Basain jamba ni yaohon ha Mari Magdalin, Jakob ni buma ar Salomi bonsi khrip Jisu ni manggathi khe hu mane muli midim khe barai ba. 2Odehe, basain sain sni ni basain sagangthao ha, sain baigo bani yaohon ha bonsi mangkhlong ha thang ba. 3Bonsi masainjikrao thangsai baha sainlai ba, Sere jinthane mangkhlongni longthai derga gedeba khe disai ri nang? 4Ode, bonsi naihaba ha, longthai disai jaohi dongba khe nuha ba. 5Bonsi mangkhlong ni bisingha hapba ha naga saosi, rih guphu phin dada yaoda gede khamba khe nu ba, bonsi hamsi ning khin kha.
6Thikhabo, bo thi ba, Da khin, dikphayaba Nazareth Jisu khe nisi smaiba thihi ang mithi du. Bode baijaphin kha. Bo eraha giri kha, bokhe thu riyaba khe naila phai. 7Odebani duha nisi thang hi boni yaohon rikphayarao ode Peter niha sainthi lah. Bo nisi niha sainthi ba lai, Galili raji gede nisi ni sagang ha thang kha, oraha bokhe nisi nu nang.
8Gmanghi khinhi mangkhlong ni phrang khailang kha. Bonsi khin bang bani saosi niha bo musi thiya.
Jisu Mari Magdalin niha nujao kha
(Mt. 28.9,10; Jn. 20.11-18)
9Lenggo Basain phorongma ha Jisu baijaphin bani yaohon ha sagangthao bo Mari, boni sao bising ni phrang bese gusu masni khe rikkhlaiyaba saosi niha bo nujao ba. 10Bo masainjik thang dada boni lugurao niha khna ri ba. Bonsi waimu dukhu nang hi gra ba. 11Bo masainjik bonsi niha bode baijaphin kha ang nu ba, thihi khna ri khabo bonsi lonya.
Jisu yaohon rikphayaba gini niha nujao ba.
(Lk. 24.13-35)
12Boni yaohonha, bonsini bising ha subung gini nolei gede thangba ha mukhang gibin khlai hi nujao ba. 13Bonsi gini thangphin hi boni yaohon rikphayarao niha sainthi khabo, bonsi londaoya.
Jhiseh niha nujaoba
(Mt. 28.16-20; Lk. 24.36-49; Jn. 20.19-23; Dang. 1.6-8)
14Odehe, yaohonthao ha, boni yaohon rikphaya jhiseh, makham jihi kham laiba ha, Jisu bonsi niha nujao ba, ar bo baijaphin bani sainthiyarao ni grao khe khna hi lonya bani bonsi khe jophlung ba. 15Bo bonsi khe thi ba, Nisi khrip habsao ha thanghi khrip sangsai jaoyaba buthu niha hamba graojma khe sainthi lah. 16Sere bokhe lonhi baptisma la ha re, bo go nang; sere bokhe lonya re gajai jahi dongma se. 17Lonyarao ne gmang thaosisi khusi dang mane raothai ri nang. Bonsi ani bumu jang bese gusu buthu khe rikkhlai nang. Bonsi gmang thaosisi grao jo nang. 18Jbu buthu khebo yao jang rem khabo, thiginyaba bis khe ling khabo musi ja nang niya. Bonsi limyarao sayarao ni basaoha yao deng nang ar bonsi ham lang la nang.
Jisu khe sorgo ha sugu lang ba
(Lk. 24.50-53; Dang. 1.9-11)
19Gabra Jisu bonsi niha grao jo blai bani yaohonha bo sorgo ha sugu langjao dada Madaini yaoda gede khamhi kha. 20Odehe, yaohon rikphayarao khrip bo rajiha thanghi grao sainthi phalang kha, ode Gabra bonsi jang khusi dangpha ba, ar gmang thaosisi yaoblai jang bonsi sainthiyaba grao gibi thihi phnu ba. Amen.
Currently Selected:
MARKA 16: DIMASBSI
Highlight
Share
Copy
Want to have your highlights saved across all your devices? Sign up or sign in
Dimasa N.T. with PSA amp PRO (BSI)
© The Bible Society of India, 2006.
Used by permission. All rights reserved worldwide.
