MARKA 3
3
Yao adur jayaba khe ham ri ba
(Mt. 12.9-14; Lk. 6.6-11)
1Odehe, Jisu sunagog ha hap phin ba. Bo ha subung saosi yao adur jayaba dong ba. 2Subung saophao Jisukhe gajai ha galai ri mane Lenggo basain ha ham ri du na ham riya thihi bokhe naidao ba. 3Jisu yao adur jayaba khe thi ba, Ning gejer ha song phai lah. 4Odehe, bo subung buthu khe sing ba, Jini dara jang jing khe bede dang mane thi du? Lenggo basain ha juruma nang re na juruma nangya re? Hayu khe sogoma nang re na sjam ma nang re?
Bonsi phirik phirik thao kha. 5Jisu subung buthu ni khah raoba khe nuhi thamsi jang naiding ba; thikhabo bonsi khe hamsi ning hamjao ba. Odebani, bo yao adur jayaba khe thi ba, Nini yao khe phlao lah. Bo yao phlaoba jang ning ham lang la kha. 6Odebani, Pharisairao baigo buhi Jisu khe bede khlai hi sthai phuma baohi, Herod ni dol buthu jang sainlai ba.
Dihkharnai nar ni subung buthu
7Jisu ar boni yaohon rikphayarao Galili dihkharnai ha thang la kha, subung gabang bonsi jang rikpha ba. Bonsi Juda raji ni Galili haphai ni phrang phai ba, 8Jerusalem ni phrang, Idumia raji jang Jordan nar ni phrang, Tura ar Sidon nogor buthu ni rogong haphai ni phrang phai ba. Subung buthu boni khusi khe khna hi boniha phai ba. 9Subung buthu bangba ni bokhe nekhlaiya mane, Jisu jar ni yaohon rikphayarao khe boni khlai hi rung salai hi deng mane sani ba. 10Bo subung gabang khe ham ri bani, bo jang yao dopha jao mane gilim gasa jayarao, subung gabang ning nekhlai lai hi boni gede phai ba. 11Odehe, sao ha sgo sgain gajaoyaraobo bokhe nukha ning, boni sagang ha galai re, ode jirikkhao hi, Ning ning Madai ni basa se thi ba.
12Jisu, bese gusu buthu khe, bo sere thi hi saosi nihabo sainthiya mane magna ba.
Jisu jhigin khe saikho ba
(Mt. 10.1-4; Lk. 6.12-16)
13Jisu hading basao ha gakhu lang ba. Ode jar nangjaoyaba subung buthu khe boni ha long ba. 14Ode, subung jhigin khe bo saikho hi, bonsi khe Apostol thi hi deng ba. Bo bonsi khe thi ba, Ang jang dongsong mane ang nisi khe saikho du. Grao sainthi phu mane ang nisi khe haiha nang. 15odehe, nisi sgo sgain buthu khe rikkhlai mane nisi niha raothai dong nang.
16Olei saikhoyaba subung jhigin ni bumu de-Simon, jar ning Peter thi hi boni bumu khe deng ba, 17Zebedai ni basa gini Jakob ar boni buphlung Johan. Jisu bonsi ni bumu Boanerges deng ba, boni ortho de Nokhasao grimyaba ni basathu thiba se. 18Andria, Philip, Bartholomai, Matthew, Thoma, Alphai ni basa Jakob, Thaddai ar Kanaan ni subung Simon. 19Ode, bokhe rem riyaba Juda Iskariot.
Jisu ode Beelzebul
(Mk. 12.22-32; Lk. 11.14-23; 12.10)
20Odehe, Jisu noh ha thang la ba. Subung buthu gabang githim phaiphin bani makham ji mane hajora maiya. 21Boni grao khe khna hi, boni nokhor ni subung buthu bokhe rem rimane baigo ba. Bede thikhala, subung buthu, bode gibir ja kha thi ba.
22Jerusalem ni phrang phaiyaba Dara khe slingriyarao khripbo thi ba, Boni bising ha Beelzebul gaba ba se! Ebo sgo buthu ni raja ning sgo sgain khe rikkhlai mane raothai ri ba.
23Odehe, Jisu bonsi khe longha hi, daogari jang bonsi niha grao thi ba, Soithan, Soithan khe bede rikkhlai phu ma. 24Raji masi ha jar jang jar nanglai hi dol gini jakha de, bo raji bai ma se. 25Nokhor si bo jar jang jar nanglai kha la, bo nokhor songkhu phu nang niya. 26Odebani, Soithan bo jar jang jar nanglai khade, thugin ja hi jam la ma se.
27Raoyaba subung khe khadaya thikhade boni noh ha hap hi rang-rih khe se phu nang niya. Khada kha se, se phu ma.
28Gibi khe ning ang nisi khe thi ri du, subung buthu ni khrip phap ja la khabo, ar Madai khe siji khabo, map mai nang kho; 29Thikhabo, Bese Gathar khe sere siji re, asaba khali habo map mai nang niya. Thaoglao ni khlai hi, phap gajai jahi dong ma se. 30Boni bising ha sgain madai ni bese dong thi hi subung buthu thi bani ebo grao khe thi ba.
Jisu ni buma ar daphlungrao
(Mt. 12.46-50; Lk. 8.19-21)
31Boha, Jisu ni buma jang daphlungrao oraha sophai ba. Bonsi noh baji ha songthao ba, ar graojma haiha hi bokhe long ba. 32Ode, gabang subung khamding hi dong ba, ar bokhe bonsi thi ba, Nai lah, nini buma ar daphlungrao baji ha songhi dong, ningkhe smai du.
33Jisu thiphin ba, Ani buma sere? Ani bada buphlung sere? 34Boni rogong ha khamyarao khe naiding hi bo thi ba, Nai lah, eraha dongyarao ning ani buma ar ani bada phlung! 35Sere Madai ni nangjaothai ha khusi dang re, bo ning ani bada buphlung, ani bahandao ar ani buma se.
Currently Selected:
MARKA 3: DIMASBSI
Highlight
Share
Copy
Want to have your highlights saved across all your devices? Sign up or sign in
Dimasa N.T. with PSA amp PRO (BSI)
© The Bible Society of India, 2006.
Used by permission. All rights reserved worldwide.
