MARKA 6
6
Jisu khe Nazareth ha hamjaoya kha
(Mt. 13.53-58; Lk. 4.16-30)
1Jisu oraha ni phrang, boni yaohon rikphayarao jang, boni nolei ha thangphin ba. 2Lenggo basain ha sunagog ha thanghi khrip subung buthu ne sling ri ba. Boni slingrithai khe khna hi, oraha dongyarao khrip bo gmang hi bonsi thi lai ba, Ebo subung la braha ni phrang grao mai ba? Bone riyaba ringthai snadi kho? Bede khlai hi bo gmang thaosisi khusi khe dang ba? 3Ebo la Jakob, Josia, Juda ode Simon ni buphlung, Mari ni basa, mistri niya kho? Boni bahandao thu eraha dong ba niya kho? Odehe, bonsi bokhe hamjaoya kha.
4Jisu bonsi khe thi ba, Jar ni nolei hade, hainthirao khe garhi de khrip habo gorasali khe man khlai re.
5Khaisa subung limyarao ni saoha yao denghi ham riba khe garhi de, bo hathan ha gibin gibin gmang thaosisi khusi khede dang phuya. 6Subung buthu bokhe lonya bani hamsi ning gmang ba.
Jisu jhigin khe haiha ba
(Mt. 10.5-15; Lk. 9.1-6)
Odehe, bo hathan ni nolei buthu ha Jisu thang hi, subung buthu khe sling ri ba. 7Odehe, bo jhigin khe longthim hi, gini gini khlai hi haiha ba. Bo bonsi khe bese gusu buthu ni basao ha raothai rihi haiha ba. 8Bonsi khe thi ba, Nisi thangba ha goda khe garhi de hon, juli, rang, musi khebo da lang pha. 9Yaphadap ga lah, grang gin da lang phah. 10Bonsi khe eleibo thi ba, Nisi khe sere noh ma thao ri du, oraha ni phrang baigoya hi, oraha ning dong lah. 11Asaba habo nisi khe noh ha hap riya ar nisi ni grao khebo khnaya thikhade, oraha ni phrang baigo langba ha, bonsi mithi mane, nisi ni yapha ni haduri khe thisa khla lah.
12Odehe, bonsi thang hi subung buthu khe khah phin mani grao khe sainthi ba. 13Gabang bese gusu buthu khe rikkhlai hi limyarao sayarao khe khro ha thao huhi ham ri ba.
Baptisma riyaba Johan thihba ni grao
(Mt. 14.1-12; Lk. 9.7-9)
14Jisu ni bumu khrip hathan ha gubblung tharba ni Raja Herod tharmai ba. Baptisma riyaba Johan githi ni phrang baija phin ba, odebani se gmang thaosisi khusi khe dang mane boniha raothai dongba thi hi lon ba.
15Gibin subung thi bu du, Bo Elija se ode, sereba subung buthu thi bu du, Manang ni gorasalirao ni bising ha saosi ja nai du, thihi thi ba.
16Herod bo grao khe khnahi thi ba, Johan ni bokhro khede ang ning dainso ri ba, bo githi ni phrang baija phinba se. 17Herod jar ni buphlung Philip ni bihih Herodias khe noh jama jaya thihi Johan magna bani, Herod ning subung haiha hi, bokhe remhi, khah dada phatho ha jeb mani hukhum ri ba. 18Johan ning Herod khe alang alang thi ba, Ning nini buphlung ni bihih khe noh dang jiba de dara ha giri.
19Odebani khlai hi ning Herodias de Johan khe naisle hi bokhe sthaima baoba; thikhabo Herod ni khlai hi bo sthai phuya. 20Herod de Johan khe subung gibi ar gathar thihi tharmai du ar khinbo khinhi bokhe naiso re. Boni grao sainthiyaba khe khusi hamba gabang dangba thihi khajahi khna re.
21Yaohon thao ha Herod ni hajaiba basain sophai kha bani, boni rajini gedebarao ar siphaiyarao ni hojarao ode Galili raji ni gedebarao dongba si ne mel salai riba ha, 22Herodi ni bisik phaihi bai ba. Bo Herod ar mel jiyarao khe khaja ribani Raja bokhe thi ba, Ning snadi khe nangjao du, sain lah, ninthane ang ri nang; 23Ning asaba sainyaba khede raji gejer jakhabo ang ninthane ri nang, ode thihi boni ha bo smai dang ba.
24Odehe, masainjik baigo langhi, jarni buma niha sing ba, Ang snadi khe sain ma?
Baptisma riyaba Johanni bokhro khe sain lah, thihi boni buma thiphin ba.
25Boha bo mathla srap Raja niha thanghi thiba, Baptisma riyaba Johanni bokhro khe, khopra masi ha anthane deng riphaima ang nangjao du.
26Raja khnahi hamsi ning khah ha waimu nang kha. Thikhabo, bo jang khamphayarao ni sagang ha grao hanggai hi smai dangba ni khlai hi, bo grao slaiphin phuya kha. 27Odebani, Raja bokhe raokhiyaba siphaiya saosi khe Johan ni bokhro khe dainso hi mane phatho ha haiha kha. Ode bo thang hi, Johan ni bokhro khe dainso kha. 28Odehe, boni bokhro khe khopra masi ha dikhu buhi mathla ni yao ha ri kha. Mathla jarni buma ne ri ba. 29Johan ni rikphayarao khnaba jang phai dada, boni manggathi khe laphai hi mangkhlong ha phip ba.
Jisu rjing bowa khe ji ri ba
(Mt. 14.13-21; Lk. 9.10-17; Jn. 6.1-14)
30Yaohon rikphayarao Jisu niha bojom japhai hi snadi khusi khe bonsi dangba ar sling ri ba, bokhe khna ri ba. 31Subung thangyarao phaiyarao bang bani Jisu jang yaohon rikphayarao, makham jimane hajora maiya bani bonsi khe bo thi ba, Jing bokja lenggo phuma ne, tha jing gibin hathan ha thang nang. 32Bonsi rungha ga dada siri siriyaba hathan ha thang la kha.
33Subung gabangma bonsi thangba khe nuhi tharmai dada, nolei sersi giding ni noleisarao igah jang hemhi bonsi thane sagang sohi ba. 34Jisu rung ni phrang baigoba ha, subung gabang githim laiba khe nuhi, melma raokhiya giri lai nu dada, bonsi khe khasao sisi jajao hi khasaoma ni grao khe sainthi hi bonsi khe sling ri ba. 35Sainbli ja kha bani boni yaohon rikphayarao phai hi bokhe thi ba, Duha sainbli ja kha, ar ebo hathan de siri siriyaba hathan se. 36Ebo hathan ni rogong buthu ha ar nolei phadain buthu ha jima lingma barai mane subung buthu khe haikhla ha, ode bonsi thi ba.
37Bo bonsi khe thiphin ba, Nisi ning bonsi ne jima ri lah.
Bonsi bokhe singphin ba, Jing thanghi rang rja gin ni hon barai hi bonsi ne rima?
38Jisu bonsi khe sing ba, Hon pher bislei nisi niha dong? Nai sang.
Bonsi nai hi tharmai bani, Hon pher bowa ar nah magin dong, ode thi ba.
39Jisu subung buthu khe sam dubri ha bojom bojom kham ri mani, jarni yaohon rikphayarao khe sani ba. 40Subung buthu rensi ha rjasi ar dan dan kham ri ba. 41Odehe, Jisu hon pher bowa khe ar nah magin khe laha hi, nokhasao gede naikhu dada, hamthai ri ba. Ode, hon khe sbai hi, bonsi ne ron rimane yaohon rikphayarao khe sani ba ar nah magin khebo khrip ne ron ri ba. 42Bonsi khripbo jiha si mai ji lai kha. 43Odehe, honduri ar nah bo longkhai jhigin gablai si khonthim ba. 44Hon jiyarao de, miyahrao gajah rjing bowa lai ja du.
Jisu dih basao ha hem ba
(Mt. 14.22-33; Jn. 6.15-21)
45Bo jar ning subung buthu khe haidahi dihkharnai ni ojang nar, Bethsaida nolei ha boni sagang ha thang mane yaohon rikphayarao khe rung ha srap gakhu ri ba. 46Bonsi khe haiha bani yaohon ha, bo bih mane khlai hi hading ha thang ba. 47Odehe, sari hade rung dih kharnai gejer ha dong ba, bode hakhong ha sao jang dong ba. 48Boni yaohon rikphayarao dih kharnai ha hamsi ning bar meser phai bani rung jaophuyaba khe nuhi hamsi ning dukhu nangba. 49Thikhabo, bonsi Jisu dih basaoha hemhi bonsini gede phaiba khe nuba jang, Sgo janai du thihi bonsi jirikkhao ba. 50Bokhe nuhi bonsi khrip khin ba; thikhabo Jisu bonsi khe thi ba, Waimu da nang, ang se, da khin. 51Bonsi dongyaba rung ha Jisu bonsi jang gakhu pha kha. Ode, baryung ho thao kha, Boha bonsini bisingha gmang lai ba. 52Bede thikhade, bonsi hon ni balam ni graokhe bo bonsini khah rao bani, bonsi mithi phuya kha.
Genesaret ha limyarao khe ham ri ba
(Mk. 14.34-36)
53Odehe, bonsi dih nar khe bailang dada Genesaret rajiha sophai ba, Odehe, rung khe dergong ha khathaohi deng ba. 54Rung ni phrang akhai buba jang subung buthu bokhe thi ba. 55Bo rajiha dongyarao, bo oraha dongba thihi tharmai ba jang khaibu thar hi, limyarao sayarao khe rih ha thu ri hi, bainbu dada boni ha phai ba. 56Noleisa, noleima, phadain habo Jisu braha thang ba, hathai habo, limyarao sayarao khe labu hi, boni rih bergong khe dopha mani khlai hi boni ha biba. Dophayarao si khrip bo ham ba.
Currently Selected:
MARKA 6: DIMASBSI
Highlight
Share
Copy
Want to have your highlights saved across all your devices? Sign up or sign in
Dimasa N.T. with PSA amp PRO (BSI)
© The Bible Society of India, 2006.
Used by permission. All rights reserved worldwide.
