THILSIEMBUL 24
24
Isak Zi Neih na
1Tichun, Abraham chuh a hung upa’n, a hung têk ten ta a; Lalpa’n Abraham chuh thil bangkim ah a vangsak ta a. 2Chun, Abraham chun a insung a neih chengcheng chunga thunei a a kawih, a suok upapen kawm achun, “Lungsiet takin na khut kha ka malpi nuoi ah hun thun in: 3Tichun Lalpa van Pathien leh lei Pathien min chuh lo in ka umna Kanaan gama nungak haw hi ka chapa zi a neihsak lo dingin hun kihâksiel sak ding ka hi: 4Ka gam lam u ah, ka inkawte kawma chieh in, ka chapa Isak hi zi na neihsak zawk ding ahi,” a ti a.
5Chun, a suokpa chun a kawmah, “Numei chun zie gam lam ahin ei zui nuom ta kileh, na chapa hi na hung pawtna lama chuh ka puihkit ding ahi dem?” a ti a.
6Abraham chun a kawmah, “Ka chapa hi zie gam lama chuh puikit lo dingin chingthei in. 7Lalpa van Pathien, ka pa In apat leh ka pienna gam apat a ei puidawkpa leh, ei hopihpa ‘Zie gam hi na suonte pie’ng ka,’ ti a ka kawma kihâksielpa chun, amah ngêi in a vânsâwlchâk chuh na ma ah sawl intin, zie apat chun ka chapa hi zi na hun neihsak ding ahi. 8Chun, numei chun a hun zuih nawp loh leh vang chuh ka kawma na kihâksielna thu ahin a thieng himai inla; bang hitaleh ka chapa hi zie gama chuh na puihkit loh ding ahi” a ti a. 9Tichun, suokpa chun a pu Abraham malpi nuoi achun a khut chuh a thun a, zie thu achun a kihâksiel tai.
10Chun, suokpa chun a pu sangawngsau laka sangawngsau sawm a pui a, a pu thilpha tin cheng puo’n a pawt ta a: tichun, a kipan a, Mesopotamia gama Nahor chênna khawpi chuh a zuon tai. 11Chun, nitâk lam a numei haw tui khâi dinga a hung pawt lai tak u chun, daikieng a tuisutdawk kieng ah a sabiltung haw chu a khupdin sak a. 12A paucham a, “Aw Lalpa, ka pu Abraham Pathien, lungsiet takin tuni hin ei lawhtin sak inla, ka pu Abraham chung ahin na lungsietna latsak in. 13Entie, tuikhuk pang ah ka dinga, khuo a mite chanu haw le tui khai dingin ahung u a, 14Chun, nungak kuo kawm ale, ‘Lungsiet takin ka dâwn dingin na tuibel kha hun hihniem tie,’ ka tih a, ama’n ‘Dâwn in, na sangawngsau haw hile dâwn ding pie’ng ka,’ ti taphawt chuh, zie ngêi chuh na suok Isak zi dinga na mi guot chuh hi hen; zie achun ka pu chunga na zaidawhna na latsak hi tih he ding ka hi,” a ti a.
15Chun, hiti hi ahi a, a gen zawh ma’n ngaitie, Abraham suohpih Nahor zi Milkah chapa Bethuel chanu Rebekah chuh liengko a tuibel pu’n a hung dawk a, 16Zie nungak chuh a mel a hawih mah mah a, nungak thiengtho ahi a, pasal himhim in a kuolpih khâkloh ahi. Tuikhuk achun a kum suk a, a tuibel chuh a thal dim a, a hung kaldawk kita. 17Suokpa chuh amah nu tuok ding chun a tai a, “Lungsiet takin na tuibel a tui chuh tawmchah ei dâwnsak tie,” a ti a.
18Amah chun, “Dâwn uo, hepu,” a ti a: kintakin tuibel chuh a khut in a dawm tha a, a dâwnsak tai. 19A dâwnsak zawh chun, “Na sangawngsau haw a dingin le a dâwn khawp masieh uh khâi zel ing ka,” a ti a. 20Kintak in a tuibel chuh gankuong achun a tei âwng a, tui khai dingin tuisutdawk lam achun a tai kit a, sangawngsau haw a ding chun le a khâi zel ta a. 21Chun, suokpa chun amahnu chuh a enzing a: Lalpa’n a zinna chuh a lawhtin sak leh a lawhtin sak loh hetna dingin thipkêi in a um a.
22Chun, sangawngsau haw chun a dâwn khawp phet un suokpa chun sana sekel kimkhat bûk nak buh leh a khuta buh ding chaucha nih sekel sawm bûk a ladawk a, 23Chun, a kawmah; “Kuo chanu na hi? Lungsiet takin ei hilh tie. Na pa In ah ka giek theihna dinguh mun a um dem?” a ti a.
24Chun, amah chun a kawmah, “Nahor dinga a hinsak Milkah chapa Bethuel chanu ka hi,” a ti a. 25“Buhpawl leh gan-an ding ka hau gêl gêl u a, giehna mun ding le ka nei ui,” a ti a.
26Tichun suokpa chun a lu a khun a, Lalpa chuh a ho a, 27“Ka pu chunga a lungsietna leh a thutakna hai lo a latsak, Lalpa, ka pu Abraham Pathien chuh, pahchak in um hen: kei hile Lalpa chun ka pu inkawte In lam ahin ei na pui ahi hi,” a ti a.
28Chun, nungak chuh a tai a, zie thu chuh a nu inkawte a va hilh ta a. 29Rebekah chun suohpih pasal khat a nei a, a min chuh Laban ahi: tichun Laban chuh a pawt a, tuikhuk lama mi kawm achun a tai ta a. 30Laban chun nakbuh leh chaucha a suohpihnu khuta um haw chuh a mu a, “Mi khatin ka kawmah hitibang hin thu a gen hi,” a ti a, a suohpihnu Rebekah thugen haw chuh a het phetin, zie mipa kawm achun a chieh ta a, ngaitie, amah chuh tuikhuk a sangawngsau haw kieng achun a na ding zing hi. 31Chun, Laban chun a kawm achun, “Nang Lalpa vangsakna chang pa, hung inla ka In ah hunglut in; bang dinga pawlama ding zing na hi? In leh sangawngsau haw umna ding ka bawl zo ta ve,” a ti a.
32Khutichun mipa chuh In achun a lut a, Laban chun sangawngsau chuh a phel a; sangawngsau haw chuh buhpawl leh gan-an a pie a, amah leh a lawite keng silna ding tui le a pie a. 33A masanga nek dinga luihsak phet u chun, amah chun, “Ka hungna ziek pên thu ka gen ma’n an ne puo’ng ka,” a ti a. Chun, Laban chun, “Gen tie leh,” a ti a.
34Amah chun, “Abraham suokpa ka hi a. 35Lalpa’n ka pu chuh nasa takin a vangsak a, mi lopi tak a hung hi ta a; Lalpa chun amah chuh belam hawnte, bâwng hawnte, dangka te, sana te, suok pasalte, suok numeite, sangawngsau te, sabiltungte le a pie a. 36Ka pu zi Sara’n a têk nung in ka pu dingin chapa a hing a: amah kawm achun a neih chengcheng a pie vek tai. 37Ka pu chun, ‘Ka umna gama Kanaan nungak haw hi ka chapa zi dinga na neihsak loh ding ahi; 38ka pa In lam ah, ka inkuonpihte kawmah chieh inla, ka chapa ding zi na neihsak zawk ding ahi,’ ti’n ei kihâksiel sak ahi. 39Chun, ken ka pu kawm achun, ‘Numei chun ei zui nuom kile la,’ ka ti a. 40Amah chun ka kawmah, ‘Lalpa a thu ka zawp sek pa chun, a vânsâwlchâk chuh na kawmah hun sawl intin, na chiehna ding achun hun lawhtin sak in a; tichun, ka chapa dingin ka inkawte leh ka pa inkuonpihte laka mi ngêi zi’n na neihsak ding ahi: 41ka inkuonpihte kawm ngêi na tun phat leh ka kawma na kihâksielna apat hin thieng inla, nungak chuh a hun piek loh u chun ka kawma na kihâksielna apat hin thieng inla,’” a ti a.
42“Tichun tuni hin tuikhuk ka hung tung a, Aw Lalpa, ka pu Abraham Pathien, ka chiehna ahi nei lawhtin sak ding chun, 43Entie, tuikhuk pang ah ka ding hi; chun, hiti hi hi hen, nungak tui khai a hung kuo kawm ale, ‘Lungsiet takin na bela tui khah tawmchah ei dâwn sak tie,’ ka tih a, ama’n ka kawma 44‘Dâwn in, na sangawngsaute a ding le khâi kit ing ka,’ ti taphawt chuh, zie ngêi chuh ka pu chapa dinga Lalpa numei guot chuh hi hen, ka ti a. 45Chun, ka lungthima ka gen zawh ma chun, ngaiin, Rebekah hi a tuibel pu kawmin a hung pawt a; tuikhuk achun a chieh suk a, tui a va khâi a, ken a kawmah, Lungsiet takin tui ei dâwnsak tie, ka ti a. 46Amah hin, a tuibel chuh a liengko apat in kintakin a dawm tha a, ‘Dâwn in, na sangawngsaute hile dâwn ding pie’ng ka,’ a ti a: khutichun ka dâwn a, sangawngsaute le a dâwnsak a. 47Chun, kei chun, ‘Kuo chanu na him?’ ti’n ka dâwng a. Amah hin, ‘Nahor dinga a hinsak Milkah chapa Bethuel chanu ka hi,’ a ti a: chun, ken nakbuh a nak ah ka vawh a, chaucha a khut ah ka buhsak a. 48Chun, ka khun a, Lalpa chuh chibai ka bûk a, Lalpa, ka pu Abraham Pathien, ka pu suohpihpa chanu a chapa zi dinga neihsak dinga lam diktaka ei puipa chu le ka pakcha a. 49Tichun, tuhin ka pu na lungsiet u a, a chunga thudik taka na hih ding u chun nei hilh un: na hih loh ding u lele ei hilh un: khutichun changlam ahim, veilam ahim nga thei ing ka,” a ti a.
50Tichun, Laban leh Bethuel chun a dâwng u a, “Zie thil hi Lalpa kawm apat a pawt ahi hi: asie hin apha hileh na kawmah ka gen thei puou hi. 51Entie, Rebekah chuh na masangah a um hila, pui inla, chieh ta leh, Lalpa’n a gensa guolin na pu chapa zi’n um hen” a tiu a. 52Chun, Abraham suokpa chun a thuu chuh a het phetin lei si’n Lalpa chuh a ho ta a. 53Chun, Abraham suokpa chun dangkaguo kicheinate, sana kicheinate leh silhlechen haw a ladawk a, Rebekah chuh a pie a. A suohpihpa leh a nu chule thil mantam taktak te a pie tai.
54Chun, amah leh a lawite chun a neu in a dâwn u a, a giek tau hi. Zingkal a a thawh phet u chun, “Ka pu kawmah ei chiehsak tau in,” a ti a.
55A suohpihpa leh a nu chun vang, “Bawinu hin ni tawmchah, ni sawm tieng bêk ei umpih tadih henla, zie zawh chuleh chieh na ven na tiu,” a tiu a.
56Amah chun a kawm u ah, “Ei thoh kiu in, Lalpa chun ka chiehna ahin ei lawhtin ta ngâl a; ka pu kawma ka chieh kit vak theihna dingin ei sawl zaw mai un,” a ti a.
57Chun, amau chun, “Bawinu chuh sam ing ka tingun amah ngêi kidawng leh” a tiu a. 58Tichun, Rebekah chuh a sam u a, a kawmah, “Zie pa hi na zui nuom die?” a tiu a. Amah chun, “Zui nuom veng ka ti,” a ti a.
59Tichun, a suohpihnu Rebekah leh a dawnnu leh Abraham suokpa leh a lawiteu chuh a chieh sak tau hi. 60Tichun, Rebekah chuh vang a pieu a, a kawmah, “Ka suohpihnuu, nang chuh a sing-asinga sima sang tamtak nu hung hi’n la, na suonte chun a melmateu kulh kawtkhak chuh luoh u hen,” a tiu a. 61Tichun, Rebekah chuh a kipan a, a suok numeite tawh sangawngsau chung achun a chuu a, mi pa chuh a zui tau a, tichun Abraham suokpa chun Rebekah chuh a pui a, a chieh tau hi.
62Chun, Isak chuh Beer-lahai-roi lama kipat chun a hung a, simlam a um ahih ziekin. 63Isak chuh nitâk lam in kingaihtuoh dingin daikieng ah a va pawtdawk a, chun, a vak dâk dawk leh, ngaitie, sangawngsau hung haw chuh a vak mu a. 64Chun, Rebekah chuh a vak dâk dawk a, Isak a muh phet chun sangawngsau chung apat chun a kum tha a. 65Abraham suokpa kawm achun, “Pawn laka ei muok dinga hung khu kuo ahi?” a ti a. Suokpa chun a kawmah, “Ka pu ahi khu,” a ti a: tichun a kikhuhna puon a la a, a kikhuh ta a. 66Suokpa chun a thilhih dân chengcheng chuh a pu chuh a hilh ta a. 67Chun, Isak in Rebekah chuh a nu Sarah puon-In achun a puilut a, Rebekah chuh a nei a, a zi a hung hita a; amah chuh a hehpih a: tichun Isak chuh a nu thih nung chun le a thamuong thei ta a.
Currently Selected:
THILSIEMBUL 24: GANGBSI
Highlight
Share
Copy
Want to have your highlights saved across all your devices? Sign up or sign in
Gangte Holy Bible - PATHIEN LEKHABU THIENGTHO
Copyright © Bible Society of India, 2010.
Used by permission. All rights reserved worldwide.
