THILSIEMBUL 26
26
Isak Gerar-ah a Cheng hi
1Chun, zie gam achun, Abraham damlaia kiel hungkie masa zaw tih loh kha, kiel a hung kie kit a. Tichun Isak chuh Philistia leng Abimelek kawmah Gerar khuo ah a va chieh a. 2Chun, Lalpa chuh Isak kawmah a hung kilak a, “Aigupta gam achun va chieh kih; gam ka hun hilh ding achun um in. 3Zie gam ahin um tadih inla, tichun na kawmah um zing ing ka ting, hun vangsak ing ka ting; zie gam chengcheng hi nang leh na suonte pien, na pa Abraham kawma ka kihâksiel na kha sudet ing ka.#Tsb 22.16-18 4Chun, van a aksi zah in na suonte chuh hun supung ing ka ting, zie gam chengcheng hile na suonte pie’ng ka.Chun, na suonte apat chun khawvel a namtin vangsak in hung um in au. 5Abraham in ka thu a zawp a, ka thuhilhte, ka thupiekte, ka thuguot te leh ka dante a zawp ziek khan,” a ti a.
6Tichun Isak chuh Gerar khuo achun a cheng ta a. 7Zie khuo a mite chun a zi chanchin a dawng u a, “Ka suohpihnu ahi,” a ti a: a mel a hawih ngâla, “Zie khuo a mite hin Rebekah ziekin ei that kha’n au.” a tih ziekin “Ka zi ahi,” a ti ngam puoi.#Tsb 12.13; 20.2 8Chun, tihi ahung hi a, zie taka chu sawttak a um nung chun, Philistia lengpa Abimelek chun tukvan apat in a hun en a, chun, Isak in a zi Rebekah a saih lai tak a vak mu a. 9Tichun Abimelek in Isak chuh a sama, “Na zi ngêi ahi hi la: bangati a ‘Ka suohpihnu ahi,’ na tih mai a?” a ti a. Isak chun a kawmah, “Amah ziekin thi kha’ng ka tih ka lauh ziek ahi,” a ti a.
10Abimelek chun, “Ka chunga na thilhih hi bangti dân ahi ta? Mi laka khatto hin na zi hi a na kuolpih mai thei lo ding ahim, tichun ka chung u ahin thiemlohna na hun tunsak hi ding ahi,” a ti a. 11Abimelek mah chun, “Kuole, zie mi hi ahim, a zi hi ahim khawih ta chuh suklup ngêi ngêi ding ahi,” ti’n mi chengcheng chuh thu a pie a. 12Chun, Isak chun le zie gam achun buh a chîng a, zie kum chun a leh za a mu a: Lalpa’n a vangsak ziekin. 13Tichun amah chuh a hung hausa mah mah ta a, nasa taka mi lopi hung hi hielin a hung lien deuh deuh tai: 14belam hawnte leh bâwng hawnte le a nei a, inkuon le tamtak a nei a: tichun Philistia te chun a hun itthik tau a. 15A pa Abraham damlai a, a suokte’n tuisutdawk a laih chengcheng u kha Philistia te’n a hubing u a, lei a vuk dim suok kêi u a. 16Chun, Abimelek chun Isak kawmah, “Kei u kawm apat hin chieh mang kêi ah, kei u sangin na hatzaw ngâl a,” a ti a. 17Tichun, Isak chuh zie apat chun a pawt a, Gerar guom ah puon-In a zak ta a, zie tak a chun chawmkhat a châm ta a. 18Chun, Isak chun a pa Abraham damlaia a tuisutdawk laihteu kha a lai kit a, Abraham thih nunga Philistia te’n ana hukbing sak u chuh: a pa’n a min a na sak guol zel khan a min a sa kit tai.
19Isak suokte’n guom achun a lai u a, zie tak chuh ahi tuisutdawk nak nei a muhdawk nau chuh. 20Tichun Gerar khuo a ganchingte chun, “Tui hi kei u a ahi,” ti’n Isak ganchingte chu tawh a kiniel u a: tichun amah tawh a kiniel tâk ziek u chun tuisutdawk min ding chun “Esek”#Esek = kina a sa ta a.
21Isak suokte chun tuisutdawk dang a lai kit u a, zie chu le chuh guon a kiniel kit u a: tichun a min ding in “Sitnah”#Sitnah = kimelmakna a sa kit a. 22Zie apat chun a kichawn kit a, tuisutdawk dang a lai kit a. Zie chung achun kinielna a um ta puoi. “Lalpa’n ei nawplen sak ta a, khawsathei ta’ng ka,” ti’n a min ding chun “Rehoboth”#Rehoboth = Nawplenna a sa ta a.
23Isak chun zie mun chuh a nusieh a, Beer-sheba ah a chieh to a. 24Zie zan chun Lalpa chuh a kawmah a hung kilak a, “Kei hi na pa Abraham Pathien chuh ka hi: lau ki’n, na kawmah ka um hi, vang hun pie’ng ka ting, ka suokpa Abraham ziekin na suonte chuh hun hihpung ding ka hi,” a ti a. 25Tichun, zie tak achun maichâm a siem a, Lalpa min chuh a lo a, zie tak achun puon-In le a zak a: a suokte’n zie tak achun tuisutdawk a lai kit ui.
Isak leh Abimelek Thugawlh
26Chun, Gerar khuo apat in Abimelek chuh a guolpa Ahuzat tawh, a sepaih lawiupa Phikol tawh Isak kawmah a chieh u a.#Tsb 21.22 27Isak chun a kawmah, “Nei hawu a, na kawm u apat in nei sawlmang ngâl u a, bang zieka ka kawma hung na hiu hi?” a ti a.
28Amau chun, “Lalpa chuh na kawmah a um hi tih chientakin ka heu a, kei u leh nangmah kal ngêi ah kitiemna um hen. Na kawmah thu ei gawlh sak in ti ka hiu hi; 29Nang dinga thil phalo bangmah ka hih khâkloh mah bang un leh, thilpha mai tihloh chuh na chungah bangmah ka hihloh bangun leh, thamuong taka ka hun chiehmang sak guol un, kei u chung ale sietna ding bangmah na hih lohna dingin tuhin nang chuh Lalpa vangsakna mu na hi ta hi,” a tiu a. 30Isak in amau dingin guolvakna a siem a, a neu in, a dâwn tau hi. 31A zingkal kit chun a kihâksiel gêl gêl tau a: Isak chun chibai pie’n guolchân pha tak guolin a kikhen tau hi.
32Chun, zie ni mah mah chun Isak suokte chuh a hung u a, a tuisutdawk laih chanchin uh a hung gen u a, a kawmah, “Tui ka mu tau hi,” a tiu a. 33Tichun zie tuisutdawk chuh “Shiba” a sau a: zieziekchun ahi zie khuo min chuh tuchan hin “Beer-sheba” sak a hih tâk chuh.
Esau in Gamdang mite Zi a a neih
34Esau chuh kum sawmli mi ahih in, Hit mi Beeri chanu Judit leh Hit mi, Elon chanu Basemet zi’n a nei a: 35Ziete chuh Isak leh Rebekah lungthim sugimthei sekte chuh ahiu hi.
Currently Selected:
THILSIEMBUL 26: GANGBSI
Highlight
Share
Copy
Want to have your highlights saved across all your devices? Sign up or sign in
Gangte Holy Bible - PATHIEN LEKHABU THIENGTHO
Copyright © Bible Society of India, 2010.
Used by permission. All rights reserved worldwide.
