THILSIEMBUL 29
29
Jakob Padan-aram Gam a Tunna
1Zie nung chun Jakob chuh a chieh zel a, suohlam a chêngte gam chuh a tung ta a. 2Chun, a vak en a, ngaiin, pawn lak ahin tuisutdawk a na um a, a naih achun belam hawn thum a kuol u a. Zie tui sutdawk apat chun belam hawnte chuh tui a dâwnsak sek uh ahi; tuisutdawk kawt achun suong lientak khat a um a. 3Zie taka chuh tui dâwn dinga belam hawn a chieh khawm tieng u leh, belam chingte chun suong chuh a lik dawk sek u a. Zie zawh chuleh suong chuh tuisutdawk kawta a umna ngei a chuh a kawih kit sek uh ahi.
4Chun, Jakob chun belam chingte kawm achun, “Suohpihte, khawilam mi na hiu hi?” a ti a. Amau chun, “Haran khuo mi ka hiu hi,” a tiu a.
5Chun, amah chun a kawm u ah, “Nahor chapa Laban na heu hi?” a ti a. Amau chun, “He e,” a tiu a.
6Chun, amah chun a kawm u ah, “A dam na maw?” a ti a. Amau chun, “Hi, a dam pet ahi: Entie, a chanu Rachel le belam hawn hun pui in a hung khu,” a tiu a.
7Amah chun, “Entiem u, ni a sang nalai a, gan hawihkhawm phat ahi nai puoi, Belamte chuh tui dâwnsak unla, tatdawk sak kit u,” a ti a.
8Amau chun, “Hih thei puo’ng kau, belam hawn chengcheng hi a hung khawm u a, tuisutdawk kawta suong hi lik dawk ahih masieh in; zie zawh tieng chuleh belam haw chuh tui ka dâwnsak sek uh ahi,” a tiu a.
9Chun, Jakob in amau haw a hopih lai chun, Rachel chuh a pa belam hawn pui in a hung tung a. 10Jakob chun a nu suohpihpa Laban chanu Rachel leh, a nu suohpihpa Laban belam hawn chuh a muh in a va naih a, tuisutdawk kawta suong chuh a lik chawn a, a nu suohpihpa belam hawn chuh tui a dâwnsak ta a.
11Chun, Jakob chun Rachel chuh a châwp a, ngeih tak in a kap ta a. 12Chun, Jakob chun a pa tupa ahih leh, Rebekah chapa ahih chuh Rachel a hilh ta a. Ziephet chun Rachel chuh a tai a, a pa a va hilh a. 13Chun, hiti hi ahi a, Laban chun a suohpihnu chapa, Jakob chanchin chuh a het phetin, a dâwn dingin a tai a, a pawm a, a châwp a, a In ah a pui ta a. 14Chun, Jakob chun zie thu haw chengcheng chuh Laban a hilh ta a. Laban chun a kawmah, “Ka guh leh ka taksa ngêi na hi chu la,” a ti a. Tha khat sung a kawmah a um ta a.
Jakob in Rachel leh Leah a Kichenpih
15Chun, Laban in Jakob kawmah, “Ka tupa hileh chinle, a thawn in ka na na sem sam dem, banga na lawh ding? Ei hilh tie,” a ti a. 16Chun, Laban chun chanu nih a nei a: a upazaw min chuh Leah ahi a, a chapangzaw min chuh Rachel ahi. 17Leah chuh a mit hah a ngui hiuhieu a, Rachel vang chuh mi duong hawih tak leh melhawih tak ahi.
18Khutichun, Jakob chun Rachel chuh a lungsiet a, tichun, “Na chanu naupangzaw Rachel hi nei dingin kum sagih na na hun sepsak ing ka,” a ti a.
19Laban chun, “Amah chuh mi dang ka piek sangin nang ka hun piek chuh phazaw ven ti: ka kawmah um zing mai in,” a ti a. 20Tichun Jakob chun Rachel nei ding chun kum sagih na a sem ta a: himahlele, a lungsiet bêk ziekin ni sawtlo cha bang phetin a hêi.
21Chun, Jakob chun Laban kawmah, “Ka kuolpih theihna dingin ka zi chuh ei pieh le, ani ka subuting ta ngâl a,” a ti a. 22Tichun, Laban chun zie khuo a mi chengcheng chuh a samkhawm a, guolvakna a siem a. 23Chun, hiti hi ahi a, mielzul in a chanu Leah chuh a pui a, Jakob kawmah a puilut a; amah chun a na kuolpih ta a. 24Laban in a suoknu Zilpah chuh a chanu Leah kawmah a suok dingin a pie a, 25Chun, hiti hi ahi a, zingkal a hunghih phet chun, ngaitie, Leah ana hita a; tichun, Jakob in Laban kawmah, “Ka chunga na thilhih hi bangti dân ahi ta? Rachel nei dinga na na ka sep hilo ahim? Bang zieka ei thêm mai na hi?” a ti a.
26Chun, Laban chun, “Ka gam u ahin khutibanga cha upazaw masang a a chapangzaw neihsak chuh dân hilo ahi. 27Zie ni sagih hi subuting inla, tichun, kum sagih dang ka na nasep ding gûn chun, amah chule hun pie mai ing ka,” a ti a.
28Tichun, Jakob chun ni sagih chuh a subuting a, tichun a chanu Rachel chuh a zi dingin a pie ta a. 29Chun, Laban chun a suoknu Bilhah chuh a chanu Rachel kawmah a suoknu dingin a pie ta a. 30Chun, Jakob in Rachel chule a kuolpih a, Leah sangin Rachel chuh a lungsiet zaw a, Laban na chuh kum sagih dang a sem kit tai.
Jakob Chate
31Chun, Lalpa’n Leah chuh muhdah in a um hi tih a he a, a sûl a hawn sak a Rachel vang chuh a chîng ahi. 32Chun, Leah chun nau a vawp a, chapa a hun hing a, a min dingin Reuben a sa a: “Lalpa chun ka gimtheih zie a muh ziek ahi hi: tuhin chuh ka pasal inle ei lungsiet ta’n a,” a ti a. 33Chun, nau a vawp kita, chapa a nei kit a; “Muhdah in ka um hi tih Lalpa’n a het ziekin ziehi le ei piek ahi hi,” a ti a. Tichun a min dingin Simeon a sa a. 34Chun, nau a vawp kit a, chapa a nei kit a; “Tu’n chu vang chapa thum hiel ka hinsak ahi ta’n, ka pasal inle ei thu zawp ta’n a,” a ti a: zieziekchun a min dingin Levi a sa a. 35Chun, nau a vawp kit a, chapa a nei kit a; “Tuchung hin chuh Lalpa pakcha’ng ka,” a ti a: zieziekchun, a min dingin Juda a sa a. Zie khel chuh cha a neih beh kit tadih puoi.
Currently Selected:
THILSIEMBUL 29: GANGBSI
Highlight
Share
Copy
Want to have your highlights saved across all your devices? Sign up or sign in
Gangte Holy Bible - PATHIEN LEKHABU THIENGTHO
Copyright © Bible Society of India, 2010.
Used by permission. All rights reserved worldwide.
