THILSIEMBUL 33
33
Jakob in Esau a Kituokpihna
1Chun, Jakob chuh a dâk dawk a, ngaitie, Esau chuh a kawma mi zali tawh a kawm lam zuona hung chuh a mu a, tichun a chate chuh Leah leh Rachel leh a mei nih te kawm achun a hawm khen diet diet a. 2Chun, a meite leh a chateu chuh a masapen in a pansak a; aban achun Leah leh a chate, Rachel leh Joseph chuh a nunung pên in a kawih a. 3Chun, amah chuh a mau achun a chieh a, a u kawm a tun masang in sagih vei lei si’n a chibai a. 4Himahleh, Esau chuh amah lawp dingin a tai a, a pawm a, a ngawngkawih a, a châwp, a, a nih u chun a kap tau a. 5Chun. Esau chuh a vak khawdak a, numei leh naupanghaw chuh a mu a; “Na hun puih haw hi kuote ahiu a?” a ti a. Jakob chun, “Pathien in lungsiet taka na suok a piek naupanghaw ahiu khu,” a ti a. 6Khutichun a meite leh a chateu chun a hun naih u a, a khun u a, chibai a bûk u a. 7Chun, Leah leh a chate chuh a hung nai u a, a khun u a, chibai a bûk u a; zie nung chun Joseph leh Rachel chuh a hung nai u a, a khun u a, chibai a bûk u a.
8Chun, Esau chun, “Ganguol ka kituohpih zozai haw kha bangti dân ahim?” a ti a. Jakob chun, “Ka lalpa, na mit ka tun theihna ding ka tih ahi,” a ti a.
9Ziephet chun Esau in, “Ken le ka hau hi, Bawi; na neih chengcheng chuh nanga hi hen,” a ti a.
10Jakob chun, “Hilo e, na mittung ka hih chun, lungsiet takin kipahman ka hun piek hi nei pawm sak in: Na mel ka muh hi Pathien mel mu guolin ka kingai hiela, ka chung a le na pha mah mah ngâl a. 11Thilpiek ka hun chawihsak hi lungsiet takin ei pawm sak in, Pathien in ei lungsiet a, ka thilkhawk cheng ei piei,” a ti a. A lak masieh chuh Jakob in pawm sak hâm dingin a ngên a ngên a, tichun, a pawm ta a. 12Chun, Esau chun, “Khaile, chieh hitiu, kei masa’ng ka,” a ti a.
13Jakob chun a kawmah, “Naupangte aneu nalai u a, belam leh bâwng hawn ka kawma um haw hi ano nawichep nalai ahiu hi tih ka lalpa’n na hêi, ni khat mai le a chieh hat takluot u chun ganhawn cheng hi thi zo mai in au. 14Ka lalpa, lungsiet takin na suok masangah a na chieh inla: kei chuh Edom tângah, ka lalpa, na kawm ka hungtun masieh chun ka ma a gancha chieh hi a chieh theih hun dân zel u leh, naupanghaw chieh theih hun dân bang zelin, awl awlin hun sawm mai ing ka,” a ti a.
15Chun, Esau chun, “Ka mite khenkhat hun nutsieh bêk ing ka,” a ti a. Himahlele Jakob chun, “A ngai hiel puoi, na deihsakna ka chan chuh hun ka sa mah mah hi,” a ti a. 16Khutichun Esau chuh zie ni mah mah chun Edom tâng lam zuonin a vaikit ta a. 17Jakob chuh Sukkoth#Sukkoth, zie hi Hebrai pau in a umzie chuh, “bitna mun” tihna ahi. mun achun a chieh a, amah ding In a sa a, a ganchate ding le bûkneu haw a sa a: zieziekchun zie mun min chuh Sukkoth kiti ahi.
18Jakob chuh Padan-aram gam apat a hung chuh bit takin Sekem khuo, Kanaan gama um chuh a tung ta a; daikieng achun a puon-In a zaka. 19Chun, a puon-In zakna mun chuh, Sekem pa, Hamor chate khut apat in dangka zakhat in a chaw a.#Jos 24.32; Joh 4.5 20Zie chun maichâm a siem a, a min dingin El-elohe-Israel#El-elohe-Israel, “Israel Pathien” tihna ahi. a sa ta a.
Currently Selected:
THILSIEMBUL 33: GANGBSI
Highlight
Share
Copy
Want to have your highlights saved across all your devices? Sign up or sign in
Gangte Holy Bible - PATHIEN LEKHABU THIENGTHO
Copyright © Bible Society of India, 2010.
Used by permission. All rights reserved worldwide.
