THILSIEMBUL 39
39
Joseph leh Potiphar Zi
1Chun, Joseph chuh Aigupta gam ah a puisuk u a, Pharaoh nuoia miliente khat, leng in veng lawiupa Aigupta mi Potiphar chun Ishmael te khut apat chun a chaw ta a. 2Chun, Lalpa chuh Joseph kawmah a um a, tichun, amah chuh mi vang nei tak ahi a. Chun, a pu Aigupta mi In achun a um a.#Nas 7.9 3Chun, a pu chun Lalpa chuh a kawmah a um a, a thilhih taphawt ah Lalpa’n a lawhtin sak hi tih chuh a mu ta a. 4Tichun Joseph chuh a pu mit a tung a, a na a sepsak a: chun, amah chun a inkawte chung achun lawiupa’n a kawih a, a neih chengcheng a khut ah a kawih vek ta a. 5A insung enkawla a siem a, a neih cheng cheng chunga mawhpuo a a siem apat chun Lalpa’n Aigupta mi insung chuh Joseph ziekin a vangsak a. 6tichun, a neih chengcheng chuh Joseph khut ah a kawih ta a, a kawma thil um mawngmawng chuh a hetpih hiel puoh a, a an nek mai tihloh chuh a he puoi. Joseph chuh mi duong hawihtak leh melhawih tak ahi. 7Chun, zie nung chun hiti hi ahi a, a pu zi chun Joseph chuh zawl mit in a en a; tichun, “Ei kuolpih in,” a ti a. 8Amah chu la a ut puoh a, a pu zi kawm achun, “En in, ka pu’n zie In ahin ka kawmah bang bang a um em tih nasan helo khawp in a neih chengcheng ka khut ah a kawih suok kêi a; 9Zie In ahin kei sanga lienzaw kuomah a um puoh a; a zi na hih ziekin nang tihloh chuh kei dingin bangmah it a nei puoi: khutichun bangti’n a zie thil gilo tak hi bawl in Pathien chunga thil ka hihkhelh theih ding?” a ti a. 10Ni chengin Joseph chuh hopih sek mahleh, amah kuolpih ding lam thu ahim, amah kawma um ding lam thu ahim chuh a zawp nuom puoi,
11Himahlele ni khat chuh Joseph chuh nasem dingin insung ah a va lut a: zielai chun in a um mawngmawng kuomah a um puou hi. 12Tichun amah chun, “Ei kuolpih in,” ti’n, a puon in a na man a. Amah chun puon chuh a khut ah a taihsan a, a tai a, a pawtdawksan tai. 13Chun, a puon chuh a khuta nusieh in a taidawk tai tih a het phet chun, 14a In a um haw chuh a sama, a kawm u ah, “Entiem u, ei suzahhuoi dingin Hebrai mi khat ka kawmah a puilut a; ei kuolpih guo’n ka kawmah a hung lut a, tichun, aw ngeih tak in ka kiko ta a: 15Ngeihtak a ka kiko a zak phetin ka kawmah a puon hi a taihsan a, a pawtmang kêi tai,” a ti a.
16Joseph pu a hung macheng chun a puon chuh a kawmah a na kawih zing a. 17Chun, a kawmah zie bang thu hi a na gen a, “Hebrai suok I kawm u a na hun puih khan, ei sukzahhuoi guo’n ka kawmah a hunglut a: 18Aw ngeihtaka ka kiko phetin, ka kawmah a puon hi nusieh in a taidawk tai,” ti’n.
19Joseph pu chun a zi’n a kawma, “Na suok hin hiti hin ei bawl hi,” ti a a thugen chuh a het chun a hung lungna phut ta a. 20Tichun Joseph pu chun amah chuh a pui a, suongkul, leng suongkul tângte umna achun a khum ta a: tichun, zie suongkul achun a um tai. 21Himahlele Lalpa chuh Joseph kawmah a um zel a, a chungah zai a dawh a, suongkul vengpa le a lungsiet sak a.#Nas 7.9 22Tichun, suongkul vengpa chun le suongkul tâng chengcheng chuh Joseph khut ah a vawpsak vek ta a; tichun, zie taka ahih taphawt u chuh Joseph chuh a hihpa ahi zel seka. 23Lalpa chuh Joseph kawmah a um a, a thilhih takphawt chuh Lalpa’n a lawhtin sak sek ziekin suongkul vengpa chun le a khuta thil um phawt chuh etpih ngaiin a he puoh a, a thilhih taphawt chuh Lalpa’n a lawhtit sak zel sek ziekin.
Currently Selected:
THILSIEMBUL 39: GANGBSI
Highlight
Share
Copy
Want to have your highlights saved across all your devices? Sign up or sign in
Gangte Holy Bible - PATHIEN LEKHABU THIENGTHO
Copyright © Bible Society of India, 2010.
Used by permission. All rights reserved worldwide.
