THILSIEMBUL 41
41
Pharaoh Mang Hilhchetna
1Chun, kum nih a kivei nung chun hiti hi ahi a, Pharaoh chun mang a nei a, Nile luipi pang ahin a dinga, 2Chun, ngaitie, bâwngpi sagih hawih tak tak leh thau tak tak hi Nile lui apat chun a hung pawt u a, phailuong lak ah a hung taviel u a. 3Chun, ngaitie, bâwngpi dang sagih gawp tak tak, gawng siuseu hi Nile lui apat mah in a nung u ah a hung pawtdawk kit u a, bâwngpi dangte kienga lui pang achun a hung ding u a. 4Bâwngpi gawp tak tak, gawng siuseu te chun bâwngpi tuoi hawih tak tak, thau tak takte chuh a ne zo ta mai u a. Khutichun Pharaoh chuh a hung khanglo ta a. 5Chun, a ip kita, mang a nei kit a, chun ngaitie, buh kung khat ahin vui sagih lien tak tak, pha tak tak sagih hi a hung pawt u a. 6Chun, ngaitie, zie nung chun vui sagih ngat simsem, suohlam huih in a mût geu sip sep hi a hung pawt kit u a. 7Chun, vui ngat simsem haw chun vui sagih lien tak tak, pha tak tak haw chuh a valh zo vek ta mai u a. Pharaoh chuh a hung khanglo a, ngaitie, a mang lam a na hi a. 8Zingkal chun hiti hi ahi a, a lungthim chuh a lungkham mah mah ta a; tichun mi a sawl a, Aigupta gama mitvaidawi thiem chengcheng leh mipil chengcheng chu a sama: Pharaoh chun a mang chu amau haw a hilh ta a; himahlele Pharaoh hilhchien thei kuomah a um ta puou hi.
9Zielai chun uain pie lawiupa pên chun Pharaoh kawmah, “Tuni hin ka diklohna haw ka hun hedawk hi. 10Pharaoh a suokte chungah a lungna a, tichun mi veng lawiupate enkawlpa In ah kei leh chângthâk siem lawiupa pên chuh ei tan sak a: 11Kei leh amah chun zan khat thu’n mang umzie chuom nei gel ka nei u a. 12Zie achun ka kawm u ah mi vengpawl lawiupa pên suok, Hebrai mi tangval khat a um a; amah chuh ka hilh u a, amah chun ka mang u chuh ei hilhchien ta a. 13Ei hilhchet sak bang takin a hung um ta ngêi a; kei chuh ka nasep hi nei sepsak kit a, amah chuh na khailum ta a,” a ti a.
14Khutichun Pharaoh chun Joseph chuh a sap sak zieng ta a, tichun suongkul apat chun kintak in a puidawk tau a: amah chuh a kimet ngim a, a silhlechen chuh a theng a, Pharaoh kawmah a hunglut ta a. 15Pharaoh chun Joseph kawmah, “Mang ka nei a, a hilhchien thei kuomah a um puou a: nangin mang hi a thu na het chun na hilhchien thei hi tih na chanchin mi gen in ka na za a,” a ti a. 16Joseph chun Pharaoh chuh a dâwng a, “Lengpa, zie chuh keia um ahi puoh a, Pathien in Pharaoh chuh dawnna deihum tak pie zaw hen,” a ti a.
17Pharaoh chun Joseph kawmah, “Ka mang in, ngaitie, Nile luipi pang ahin ka na dinga: 18Chun, ngaitie, bâwngpi sagih thau tak tak, tuoi hawih tak tak hi Nile luipi apat chun a hung pawtdawk u a, lui pang a phailuong lak ahin a hung taviel u a: 19Chun, bâwngpi dang sagih têk tak tak leh gawp cheichui, gawng simsem, zie tawbanga hawih lo chuh Aigupta gamsung pumpi ale ka muh khâkloh hi a nung u achun a hung pawtdawk kit u a. 20Chun, bâwngpi gawng tak tak, gawp cheichui haw chun bâwngpi sagih thau tak tak, hung pawt masa haw chuh a ne zo vek u a: 21Chun, a nek zawh nung u chun le a neu hi tih hettheih diek loh: a tunga bang khan a gawp zing u a. Khutichun ka hung khanglo ta a. 22Chun, ka mang mah chun, buh kung khat ahin vui sagih lien tak tak, pha tak tak hi a hung pawt u a. 23Zie nung chun vui sagih vuoi niuneu, ngat siuseu, suohlam huih mût gawt sip sep hi a hung pawt kit u a, 24Vui neucha cha haw chun vui sagih pha tak tak haw chuh a valh zo vekin ka mu a: mitvaidawi thiem haw ka hilh a, himahlele ei hilhchet sak thei kuomah a um puou hi,” ti’n a gen a.
25Joseph chun Pharaoh kawmah, “Pharaoh mang hi khat ahi: Pathien in a thilhih ding chuh Pharaoh a hetsak ahi chu. 26Bâwngpi sagih thau tak tak haw chuh kum sagih ahiu a buhvui sagih pha tak tak haw chuh kum sagih mah ahi a: mang chuh khat ahi. 27Chun, a nung u a bâwngpi sagih gawng tak tak, gawp cheichui hung pawt haw chuh kum sagih ahiu a, buh vui sagih a si ngên suohlam huih mût gawt sipsep chu tawh; ziehaw chuh kiel kum, kum sagih ding ahiu hi. 28Zie chuh ahi Pharaoh kawma ka gen khah: Pathien in a thilhih pai zieng ding thu chuh Pharaoh a hetsak ahi hi. 29Aigupta gamsung pumpi ahin buh hauh kum, kiningtit kum, kum sagih hungtung ding ahi. 30Zie nung chuleh kiel kum, kum sagih hung um kit in a; tichun hauhsakna chengcheng Aigupta gam ahin hetngilh suok hung hi ta’n a; kiel chun gam hi ne sie zo in a; 31hauhsakna kha, a nungzui kiel ziek chun, zie gam ahin het hita puo’n a; a nasat bek ding ziekin. 32Chun, mang nihvei a hun neih sawn sakna chuh zieziek hih ahi, thilhih ding chuh Pathien in a hihdet a, Pathien mah in kintaka hun tunsak ding ahih ziekin.”
33Khutichun tuhin Pharaoh chun mi pilvang tak leh lemhe tak mai hawldawk henla, Aigupta gamsung ahin lawiupa’n kawih henla; 34Pharao’n zie chuh hih henla chun, gamsung ahin lawiupate guot henla, hauh kum, kum sagih sung chun Aigupta gamsung a buh hi mun nga a khena mun khat zel dawlkhawm hen. 35Tichun amah chun kum phat kum, kum sagih sunga buh chengcheng chuh lakhawm henla, khawpi haw achun nek dingin buh sungkhawm henla, Pharaoh thunuoi a kawih hi henla, phatak in enkawl u hen. 36Chun, buh chuh Aigupta gamsung a kiel kum, kum sagih hungtung dinga kiginlawkna a kawihkhâwm hi’n a, kiel zieka gam hi a beihmang lohna ding in, a ti a.
Joseph Aigupta Gamsung Vaihawm
37Zie thu chuh Pharaoh leh a suokte chengcheng chun pha a sak lam tak uh ahi a. 38Pharaoh chun a suokte kawmah, “Zie tawbang, Pathien thagau umna hi mi I mu zo dinguh a ahim?” a ti a. 39Pharaoh mah chun Joseph kawmah, “Pathien in ziehaw chengcheng chuh a hun hetsak ziekin, nang banga pil leh ching hi a um himhim puou hi; 40Nang hi ka insung ah lawiupa’n um in na tin, ka khuoletui chengcheng hi na thu bang zelin um untin, lalchutphah a chut thu mai ahin nang sangin lal ing ka,” a ti a.#Nas 7.10 41Pharaoh mah in Joseph kawmah “Ngaiin, Aigupta gamsung chengcheng ahin lawiupa a ka hun siem na hi” a ti a. 42Pharaoh chun a khut apat in a min namna zungbuh chuh a ladawk a, Joseph khut ah a buhsak a, patngat puon a silh sak a, a ngâwng ah sana khi a awhsak a; 43Chun a kangtalai neih a nihna achun a chut sak a, a ma achun, “Khupdin un,” ti’n a kiko zel u a; tichun Aigupta gamsung cheng achun lawiupa’n a siem ta a. 44Ziehaw bân achun, Pharaoh chun Joseph kawmah, “Kei Pharaoh ka hi, nang lemsak loh in kuomah cha’n Aigupta gamsung chengcheng ahin a khut uh ahim, a keng uh ahim lek puo’n au,” a ti a 45Chun, Pharao’n Joseph min ding chun Aigupta te min Zaphenath a sa a On khuo a thiempu Potiphar chanu Asenat chuh zi’n a neihsak a Joseph chuh a pawt a, Aigupta gam chuh a tawh viel tai.
46Joseph chuh Aigupta leng Pharaoh ma a a din lai chun kum sawmthum mi ahi a, Chun, Joseph chuh Pharaoh kawm apat in a pawtdawk a Aigupta gam chengcheng chuh a tawh suok ta a. 47Kum phat kum, kum sagih sung chun lei chun lawk takin buh a pawtsak sek a. 48Aigupta gama kum phat kum, kum sagih hungtung a buh chengcheng chuh a la khawm a, buh chuh khawpi haw achun a sung khawm ta a, khawpi kimvel a lo a buh haw chuh khawpi haw achun a sungkhawm zel a. 49Tichun, Joseph chun buh chuh tuisuohgiet a pîlnel zat hiela tam in a sungkhawm gei gui mai ta a; teh sen ding guol ahih loh ziekin a teh chule a haihsan hiel tau hi.
50Chun, kiel tun ma chun Joseph in Asenat tawh chapa nih a nei a; ziete chuh On khuo a thiempu Potiphar chanu Asenat in a hinsak ahiu. 51Chun, Joseph in a cha masapen min ding in Manasseh#Manasseh = Hetngilhsak, a sa a, “Pathien in ka sepgimna chengcheng leh ka pa inkawte cheng chuh ei hetngilhsak ta ngâla” a ti a. 52A chapa nihna min chuh Ephraim#Ephraim = Chate pie. a sa a; “Pathien in ka gimtheih thawkna gam ahin chi ei suon sak tai” a ti a.
53Kum phat kum, kum sagih Aigupta gama hungtung chuh a hung bei ta a. 54Kiel kum, kum sagih ding chuh Joseph gen guol takin a hungtung pan ta a, gamtin ah kiel a hung kie ta a, Aigupta gamsung chengcheng achun vang nek ding a um a.#Nas 7.11 55Chun, Aigupta gama mi chengcheng chuh a kiel phet u chun Pharaoh kawmah nek ding ngenin a kiko u a: chun, Pharaoh chun Aigupta mi chengcheng kawm achun, “Joseph kawmah chieh unla, a hun hilh takphawt chuh hih un,” a ti a.#Joh 2.5 56Chun, kiel chuh lei chung chengcheng achun a hung kie ta a tichun Joseph chun buh kawihkhawmna In chengcheng chuh a hawng a, Aigupta mite kawm achun a zuok a, Aigupta gam achun kiel chuh a huoisie mah mah ngâl a 57Chun, kiel chuh leichung cheng chenga a huoisiet ziekin gamtina mihaw chuh buh chaw dingin Aigupta gama Joseph kawm achun a hung sek ui.
Currently Selected:
THILSIEMBUL 41: GANGBSI
Highlight
Share
Copy
Want to have your highlights saved across all your devices? Sign up or sign in
Gangte Holy Bible - PATHIEN LEKHABU THIENGTHO
Copyright © Bible Society of India, 2010.
Used by permission. All rights reserved worldwide.
