THILSIEMBUL 44
44
Sana Khawn Mang
1Chun, Joseph in a suokpa kawm achun, “Ziete haw dip kha a puok theih hun dingun buh sung dim inla, a dangka chiet u chuh a dip uh kam chin chietah kawih in. 2Chun, ka khawn, ka dangka khawn kha, a naupangpen dip sung ah kawih in, a buhman dangka kha tawh,” ti’n thu a pie a. Tichun ama’n Joseph thugen bang chun ahih tai. 3Khuo a vak phetin amau chuh a sabiltung hawu chu tawh a kipandawk tau a. 4Khuo apat a chiehdawk uh, a tun gamlat mau chun Joseph in a suokpa kawm achun, “Kipan inla, mihaw kha va delh in; na delhphak tieng leh a kawm u ah, ‘Bangti dana thilpha thil phalo a na dit uh ahim? 5Bang zieka ka pu sana khawn na gûk uh ahim? Zie kha ka pu uain dawnna leh a phunsanna khawn ahi ngâl a. Thil pha lo tak tak hihna hiu hi!’ va ti’n,” a ti a.
6Chun, amau haw chuh a delhphak phetin zie thu haw chuh a kawm u ah a gen a. 7Amau chun a kawmah, “Hepu, bangti dân ahim hitibang thu na gen chuh? Na suokte hin zie bang thil chuh ka hih loh ding zie mai u chuh. 8Ngaitie, ka dip sung u a dangka ka muh hawu khale Kanaan gam apat in na kawmah ka hun puo kit u kha la: bangti dân in ahim na pu In a dangka ahim, sana ahim ka gûk theih ding uh? 9Na suokte lak ahin kuole na muh na tâk chuh thi hen, kei u le ka puu suok in um mai ing kau,” a tiu a.
10Chun, amah chun, “Awle, na thuu bang zel chun hi hen: amahvang chuh kuole ka muh na pên chuh ka suok in um hen; a danghaw vang chuh chieh thei in lau,” a ti a. 11Ziephet chun, kintakin amau dip chiet chuh tuol ah a kawihtha chiet u a, dip chuh a hawng chiet u a. 12Amah chun, a upapen ah a pan a, a naupangpen chanin a hawl a: tichun khawn chuh Benjamin dip achun a mu ta a. 13Ziephet chun a puonhawu a bawtthêk u a, amau sabiltung chiet chuh a puoksak kit chiet u a, khawpi achun a vaikit tau hi.
14Chun, Juda leh a suohpihte chuh Joseph In a va tung u a; amah chuh zie chun a na um nalai a: a ma achun a khupbawk chiet tau a. 15Joseph chun a kawm u ah, “Bang thil a hi tâm na hih uh? Kei tawbang mi hin phun a san thiem hi tih helo na hiu em?” a ti a.
16Juda chun, “Hepu, na kawmah bang ka gen ta ding u? Bang ahim ka paulap ding uh? Bangti’n a ka kigen âwng tâk ding uh? Pathien in na suokte gitlohna chuh a mudawk ahi ta hi; hepu, na suokte ka hi tau hi, kei mau leh a khuta khawn kimuhna hi tawh,” a ti a.
17Chun, amah chun, “Zie tawbang a chuh ka hih loh ding zie mai chuh! A khuta khawn kimuhna pa mai hi ka suok in um in a; nang haw chu vang lungmuong takin na pau kawmah va chieh tau in,” a ti a.
Juda’n Benjamin a Sikgenna
18Ziephet chun, Juda chun Joseph a va naih a, “Aw hepu, lungsiet takin, hepu, na suok hi na kawma thu kamkhat ei gensak inla, na suok chung ahin na lung chuh natsak ki’n la: nang chuh Pharaoh bang mai na hi ngâl a. 19Hepu, nangin, ‘Pa ahim, suohpih ahim na nei um?’ ti’n na suokte hi nei dawng a. 20Hepu, kei un na kawmah, ‘Pa teksie tak leh a teklam cha naupang cha khat ka nei ui, zie pa u chuh a thi a, a nu hin lak achun amah mai chuh a uma, a pa chun amah chuh a lungsiet mah mah hi,’ ka tiu a. 21Chun, nangin na suokte kawm ahin, ‘Amah chuh ka mit a ka muh theihna dingin ka kawmah hun puisuk un,’ na ti a. 22Kei un na kawmah, ‘Bawipu chun a pa taihsan thei puo’n a: a pa chuh a taihsan chun chuh a pa chuh thi mai ding ahi ngâl a,’ ka tiu a. 23Nangin na suokte kawm ahin, ‘Na nau neupen u chu tawh na hung kitawn loh u chun ka mel mu kit ta puo’n lau,’” na ti a.
24Chun, na suok ka pau kawm ka tun kit phet u chun, na thugen chuh ka hilh u a. 25Ka pau chun, “Chieh kit tau in la, buh tawmcha bêk ei u dingin va chaw kit un,” a ti a. 26Chun, kei un, “Va chieh kit thei puo’ng kau: ka nau neupen u hih ka kawm u a a tel loh chun zie pa mel chuh mu thei lo ding ka hiu hi,” ka tiu a. 27Chun, na suok ka pau chun ka kawm u ah, “Ka zi Rachel in chapa nih ei hinsak hi tih na heu a, 28a khat chuh ka kawm apat in a chiehdawk a, zie apat chuh ka muh kit takloh ziekin gamsa’n a bawhtel hi ngêi ina,” ka ti a. 29Tichun amah hi le ka kawma pata na puihmang u a tuohsie a tuok chun, ka sam kâng hi lungkham na’n thân ah ei muolliem sak ding na hiu hi, a ti a.
30“Khutichun, bawipu hi ka kawm u a tello ana suok, ka pau kawm ka va tun kit u chun, a hinna chuh bawipu hinna tawh kizawm kêi ahih ziekin, hiti hi hin ti’n, 31Bawipu hi a tel puoi tih a het het leh thih lawh ding ahi, tichun, na suokte hin, na suok, ka pau chuh lungkham in than ah muolliem sak ding ka hiu hi. 32Na suok hin, na kawma ka hun puihkit loh u chun naupang chung châng thu ahin ka kisung ta ngâl u a. 33Khutichun, lungsiet takin na suok hi, bawipu thasang in na suok in ei umsak inla, bawipu hi a ute kawmah chieh toh sak in. 34Bawipu ka kawma tello in ka pa kawmah bangti’n ka chieh to thei die? Ka pa chunga sietna tung ding chuh ka mu ngam puoi,” a ti a.
Currently Selected:
THILSIEMBUL 44: GANGBSI
Highlight
Share
Copy
Want to have your highlights saved across all your devices? Sign up or sign in
Gangte Holy Bible - PATHIEN LEKHABU THIENGTHO
Copyright © Bible Society of India, 2010.
Used by permission. All rights reserved worldwide.
