THILSIEMBUL 46
46
Jakob Inkuon Aigupta a Lutnau
1Chun, Israel chuh a neih chengcheng chu tawh a pawt a, Beerseba chuh a tunga, a pa Isak Pathien kawmah kithawihna te a siem a.
2Chun, Pathien in zan a a mang chun Israel chuh a hopih a, “Jakob, Jakob!” a ti a. Amah chun, “Zie hin ka um hi,” a ti a. 3Chun, Amah chun, “Kei Pathien, na pa Pathien chuh ka hi; Aigupta gama va chieh chuh lau ki’n; zie achun chi lopitak a hun siem ding ka hi. 4Aigupta gam achun na kawmah hung ing ka ting chun, na suonte chuh zie gam ahin puikit tei ing ka. Na thih tieng leh Joseph khut in na mit hun siem sak ina.” a ti a.
5Tichun, Jakob chuh Beerseba apat chun a pawt a: a chapate chun a pau Jakob leh a cha neucha cha hawu leh a ziteu haw chuonna dinga Pharao’n kangtalai a thak haw akhan a chuon sak u a. 6Tichun, Jakob leh a suonte cheng chengin a gancha hawu leh a thuomphuo hawu chuh a sawm u a, Aigupta gam chuh a tung tau a:#Nas 7.15 7a chapate, a tupate, a chanute, a tunute, a suonte chengcheng chuh Aigupta gam achun a lutpih tai.
8Ziehaw hi Jakob suon Aigupta gama lut, Jakob leh a chapate min chuh ahi: Reuben Jakob cha upapen leh, 9chun, Reuben leh a chapate chuh Hanok te, Pallu te, Hezron te, Karmi te ahiu hi. 10Chun, Simeon leh a chapate chuh Jemuel te, Jamin te, Ohad te, Jakin te, Zohar te, Kanaan numeite apat a a chapa Saul te ahiu hi. 11Chun, Levi leh a chapate chuh Gershon, Kohath leh Merari te ahiu a. 12Chun, Juda leh a chapate chuh Er te, Onan te, Selah te, Perez te, Zerah te ahiu hi: Er leh Onan vang chuh Kanaan gam ah a thi tau a. Perez chate chuh Hezron leh Hamul ahiu hi. 13Chun, Issakar leh a chapate chuh Tola te, Pua te, Jashub te, Shimron te ahiu a. 14Chun, Zebulun leh a chapate chuh Sered te, Elon te, Jahleel te, ahiu hi. 15Ziehaw chengcheng chuh Leah chapa, a chanu Dinah tawh, Padan-aram gama Jakob a hinsak haw chuh ahiu a: a chapate leh a chanute chengcheng chuh sawmthum le thum ahiu a.
16Chun, Gad leh a chapate chuh Zephon te, Hagi te, Shuni te, Ezbon te, Eri te, Arodi te, Areli te ahiu hi. 17Chun, Aser leh a chapate chuh Imnah te, Ishvah te, Ishvi te, Beriah te ahiu hi, a suohpihnuu Sera tawh; Beriah chapate chuh Heber leh Malkiel ahiu hi. 18Ziehaw hi suok numei Zilpah, Laban in a chanu Leah a piek in Jakob a hinsak sawmlegup te chuh ahiu hi.
19Chun, Jakob zi Rachel in chapa nih a nei a, Joseph leh Benjamin ahiu hi. 20Chun, Joseph in Aigupta gam ah chapa Manasseh leh Ephraim a nei a, ziete chuh Heliopolis khuo a thiempu Potiphar chanu Asenat in a hinsak ahi.#Tsb 41.50-52 21Benjamin leh a chapate chuh Bela te, Beker te, Ashbel te, Gera te, Naaman te, Ehi te, Ros te, Muppim te, Huppim te, Ard te ahiu hi. 22Ziehaw chuh Rachel chapa Jakob in a hinsakte chuh ahiu a: a bawn un sawmleli ahiu hi.
23Chun, Dan leh a chapa Hushim ahi a. 24Naphtali leh a chapate chuh Jazeel te, Guni te, Jeber te, Shillem te ahiu hi. 25Ziehaw chuh Laban in a chanu Rachel a piek Bilhah chapate chuh ahiu hi. Ziehaw chuh Jakob ahin saka; abawn un sagih ahiu hi.
26Jakob chapate zite simloh in Jakob tawh Aigupta gama lut, a khalbe a pawt chengcheng chuh a bawn un sawmgup leh gup ahiu hi, 27Chun, Joseph in Aigupta gama chun chapa nih a nei a, chun Jakob inkawte chengcheng Aigupta gam a lut haw chuh sawmsagih ahiu hi.#Nas 7.14
Aigupta a Jakob leh a Inkawte
28Jakob in Gosen gam lam lampi a na hilh dingin, Juda chuh Joseph kawmah a chieh masak sak a, tichun, Gosen gam achun a lut tau a.
29Joseph chun a kangtalai a guonggalh a, Gosen gam achun a pa muok dingin a va chieh ta a; a kawmah a kihetsak a, a ngâwng uh a sutuoh a, sawttak sung chuh ngâwng leh ngâwng sutuoh in a kap u a. 30Chun, Israel chun Joseph kawmah, “Hing leh dam in na na um a, na mel ka muh kit tak ziek hin tuhin chuh thih le khawk ka sa ta puoi,” a ti a.
31Chun, Joseph chun a suohpihte leh a pa inkawte kawmah, “Va chieh ing ka ting, Pharaoh hilh ka ting a kawmah, Ka suohpihte leh ka pa inkawte Kanaan gama umte kha ka kawm a hungtung tau hi; 32amau haw chuh ganvulh mi a hih ziekun belam chingte ahiu a, a belam hawn u leh a bâwng hawn teu leh a neih chengcheng uh a hun sawm vek ui,” ti’n va gen ing ka. 33Chun, hiti hi hung hi’n tin, Pharaoh chun a hun sap a, “Bang nasem na hiu hi?” a hun tih tak leh, 34Nang un, “Na suokte hi ka pileputeu apat ganvulh mi ka hiu hi, tiu in: khutichun, Gosen gam ahin um thei ding na hiu hi,” a ti a. Belam ching mi mawngmawng chuh Aigupta mite’n a kihdak lam tak uh ahi ngâl a.
Currently Selected:
THILSIEMBUL 46: GANGBSI
Highlight
Share
Copy
Want to have your highlights saved across all your devices? Sign up or sign in
Gangte Holy Bible - PATHIEN LEKHABU THIENGTHO
Copyright © Bible Society of India, 2010.
Used by permission. All rights reserved worldwide.
