YouVersion Logo
Search Icon

THILSIEMBUL 49

49
Jakob Vangsakna
1Chun, Jakob in a chapate chuh a sama, hiti hin a gen a, “Tunung a na chung u a thil hungtung ding chuh ka hun hilh theihna dingin hung kikhawm un:
2“Nang uh Jakob chapate, hung kikhawm unla, ngaithau in:
na pau Israel thugen hi ngaithau in.
3“Reuben nang hi ka cha lutîl,
ka thilhih theihna,
ka hatna gah masapen na hi;
Sânpenna leh thuneihna chuh nanga ahi.
4Himahleh, tui banga detlo na hi a;
chungnun pên na chuh chang puo’n la;
Na pa zalkhunpi na kaih ziekin;
zielai chun zie chuh na hih buok a.
5“Simeon leh Levi hi unau ahiu a;
A chemzâm hawu chuh thisan suohna matchâk ahi a,
6Aw ka thagau, a kiholim nau achun tel ki’n la,
Ka lopina, nang vang a kikhawpkhawm nau achun le,
chanmun nei diek ki’n,
A lungnat un mi a that u a;
a genhak un bâwngchal tha a sat u a,
7A lungnat nau achun hansie dawl u hen,
lauh-um tak ahi ngâl u a:
A lungnatnau achun le hansie thuok u hen,
nunsie tak ahi ngâl u a:
Jakob achun amau chuh hih dalh ing ka ting,
Israel lak achun thehdalh ing ka.
8“Juda, nang vang na suohpihte’n hun pakcha’n au.
Na khut chuh na melmate ngâwng ah nga’n na tin;
na pa chapate chuh na masang ah khun un au.
9Juda chuh sakeibaknei bang ahi a,
A sa nek ding that a, a kul lama vai kit a,
Kizeh a, kuol tawbang ahi,
Kuoma’n a subuoi ngam puou hi.#Kis 24.9; Thp 5.5
10Leng mawlh chuh Juda apat chun mang puo’n tin,
Vaihawmna mawlh chule a kengkal apat in mang diek puo’n a;
Shiloh hung masangsieh chun;
chun, namtin in amah thu awi un au.
11A sakawlno chuh grep gui ah a hen a,
a sabiltung no chuh Grepgui hawih chi achun a hên a;
a silhlechen hawu chuh uain ah a sawp a,
A puon chu le grep tui san in a sawp a,
12A mit haw chuh uain in hih san intin,
A ha haw chule bâwngnawi a hih vam in um ina.
13“Zebulun chuh tuisuohgiet pang ah cheng intin:
Lawngchawlhna mun hung hi’n a.
A gamgi chuh Zidon chan hi’n tin;
14“Issakar hi sabiltung hattak,
Belam huong kal a bawk ahi.
15Kichawlh chuh pha’n a he a,
Gam chule nuom a sa a;
Tichun, thil gik puo dingin a liengko a hih niem a,
pawngbawl a nasep sak dingin suok in a hung um ta a.
16“Dan hin a mite chuh,
Israel nam laka nam khat hi dingin vaihawm sak in a.
17Dan hi lamlien a gulsie um tawbang hi’n tin,
Lampanga gulsie,
A chunga chuongte a thalngadêk a kie khawp hiela,
sakawl keng bawm chu sek bang hi’n a.
18“Aw Lalpa, na hukdamna chuh ka ngak zing hi.
19“Gad hi gâl in nawh intin,
Himahleh amah chun lehnawh in, delhzui zaw’n a.
20“Aser hi a nek lim in tin,
Lengte nek chi lim taktak hihdawk in a
21“Naphtali hi sazukpi thahdawk ahi;
Thu phatak haw a gen sek hi.
22“Joseph hi bâk gah nuom tak ahi,
Tuikhuk panga bâk gah nuom tak chuh;
A bâkneu haw chun suong bang a zam khum a.
23A melmate chun amah chuh nasatak in a do u a,
A kap u a, nasa takin a hosie sek u a:
24Himahlele, amah thalpo chuh khauh tak in a um zing a,
A bân tha haw chuh hihhat in a um a,
Jakob Mi Hat Pathien khut ngêi leh,
(zie apat chun Belam chingpa Israel te Suongpi chuh ahung uma.)
25Na pa Pathien, nang hun panpih ding a Bangkim hihtheipa,
Chunglam van vangsakna haw,
Nuoi lam a tui thuk tak vangsakna haw,
nawitui leh sûla vangsakna haw,
Nang mah hun vangsak ngêi ding pa,
Bangkim hihtheipa sukhat in a um a.
26Na pa hun vangsakna te hin,
ei suonte vangsak sakna te chuh;
Kumsawt tâng tâwp dawng chanin a khup zaw ta ahi.
Ziehaw chuh Joseph lu chung ah um intin,
A suohpihte kawm apat kawih chuom a um lusip achun um ina.
27“Benjamin hi ngei gawlham tak bang ahi a,
Zingkal in a sapeh chuh ne’n tin,
Nitâk lam leh a gâllâk chuh hawm ina,” a ti a.
Jakob Thihna leh Vuihna
28Ziehaw cheng hih Israel nam sawmlenihte chuh ahiu a: zie thu chule amau haw vangsakna a a pau thugen chuh ahi: vangsakna a chan ding bang chiet un vang a pie chiet tai.
29Chun, amau chuh thugo sieh a pie a, a kawm u ah, “Ka chipihte kawma puih a um ding ka hi tai: Hit mi Ephron lo a kâwlhâwm, 30Kanaan gama Mamre zawn a Makpelah lo a kâwlhâwm, Abraham in kivuihna mun go ding a,#Tsb 23.3-20 31Hit mi Ephron apat a a lo puma a châwk a khan ei hun vui un.#Tsb 25.9, 10; 35.29 32Zie tak achun Abraham leh a zi Sarah chuh a vuiu a; zie tak achun Isak leh a zi Rebekah chuh a kivui a; zie tak mah achun Leah le kavui hi.” 33Chun, Jakob in a chapate kawma thu a vaithak zawh chun, a keng haw chuh zâlkhun ah a khang kai a, a hat a hung tawpa, a chipihte kawm a puih in a um tai.#Nas 7.15

Currently Selected:

THILSIEMBUL 49: GANGBSI

Highlight

Share

Copy

None

Want to have your highlights saved across all your devices? Sign up or sign in