Matyu 16
16
Meir suwon kamon nonkumey ko se ma meio mesopok hok non
(Mak 8:11-13; Luk 12:54-56)
1Sawk Farisi-uwr o, Sadyusi uwr o, hom Jisas so owh mon le nok, Jisas se senkin mon eykawn mesopok, hiy hme meir suwon kamon nonkumey ko se meio mesair. #Mat 12:38; Luk 11:16
2Wo, hme kokwe hiykwe sawk senkin ma-sahre onuayk me, “Eyrowpwar lwak lopay hain ankin, homkwe senkin senaw ar-ira me lopay, ‘Ohokwe pau, ey-pow lo ey. Payhokuaw, waw-ku kokwe oupuey unkawk lopay hain.’ 3Seyr leisnon mokwe homkwe senkin senaw ar-ira me nerie, ‘Ohokwe pau, sueyr howniy non lwak ey, payhokuaw waw-ku hokwe oupuey eyn lira, sawk waw homkwe non-ku se po nuw-swakuwmay.’ Okar, homkwe waw-ku kokwe senaw lira memeir popriy ohruw-a. Sawk meir suwon pokon ko enkin ma kiy-ousne omokwe, homkwe liy lira memeir ohruw-a nonkway popriy ley. 4Unsaney pokon ko homkwe piap-araw, seyr God se po lokriy hain. Hai, homkwe hane kokwe meir suwon kamon ke meio e panoke mesopok o? Sohokwe liy so, hmekwe meir suwon liy kow ley. Sawk hakwe hme kokwe profet Jona so meir ke-aw mekow.” Sa Jisas hiykwe uwr seme lokriy hain nok, nuw-ey. #Mat 12:39; Luk 11:29
Farisi, Sadyusi, hmo okrei-yor mokwe yis me hieyn
(Mak 8:14-21)
5Enekwei hyo ki-wayh hom howk-nawp menki mon ma lokuan hokwe, homkwe ihey mo naw me uron lorionay hain; homkwe nak-onokyaw nok pa. 6Jisas hiykwe sawk hyo ki-wayh me kokwe senkin kiynuw-me kupaku kow, “Hey-e, homkwe iray-iray non kwa nak-wak. Farisi, Sadyusi-om mo yis, seme kwa hok.” #Luk 12:1
7Sawk hyo ki-wayh homkwe homkiaw-ayay-aw senkin nan ohruw-a, “Ama, hiykwe mo sehe me, hromkwe ihey mo naw mokwe siraw nak-onokyaw nok pa.”
8Sawk Jisas hiykwe hyo ki-wayh mo ok somokwe po nonkway, hiy sa hme senkin kiy-mekow, “Ama, homkwe ok senkin panoke lohruw-a o, ‘Hromkwe ihey mo naw mokwe nak-onokyaw nok pa’? Hmo nan kiykiy-ay yor mokwe paswaw-aw nopre. 9Hmey, homkwe nonkway nuw-wak popriy pey? Ha ihey mo naw iha sirom-aw me, uwrsa 5000 me ma kow-a mokwe, homkwe seme pankaw nanpanan o? Ayay somei kopi kopi ma la prue mokwe, homkwe yowr pankaw kawk kreik nak-yay sowkriy mo? #Mat 14:17-21 10Hai, enekwei ha, ihey mo naw iha sirom mu nareysyar non me, uwr 4000 me ma kow-a mokwe, homkwe ayay somei kopi kopi ma la prue mokwe, yowr pankaw kawk kreik nak-yay sowkriy mo? #Mat 15:34-38 11Hai, suw penkin so, hom hano ok ke ma kiy-nonkway popriy pa ma lwak ohokwe? Hakwe ihey mo naw me lohruw-a pa, sawk homkwe iray-iray non kwa nak-wak, Farisi, Sadyusi-om mo yis piap-araw me.” 12Hyo ki-wayh homkwe sa seme nonkway, hiykwe hme kokwe yis ihey mo naw me ma nak-mon oun sian ie ey seme me pa. Sawk hiykwe Farisi, Sadyusi om mo ok piap-araw senkin senkin seme iray-iray nonaw nak-wak e me.
Pita hiykwe senkin me sanion sow kow, Jisas hiykwe Krais
(Mak 8:27-30; Luk 9:18-21)
13Jisas hiykwe sawk kipay, taun Sisaria Filipai ma lwak mon ley, hyo ki-wayh siraw. Enekwei sohiy non kokwe hyo ki-wayh me kokwe senkin kiy-mesopok, “Hai, uwrsa homkwe Uwrsa mo Ney se kokwe penkin kiy-ohruw me o?”
14Sawk hyo ki-wayh homkwe hye kokwe senkin makiy-sahre mekow, “Hne kokwe har homkwe senkin me, hunkwe Jon hu mon prouk uwr, har homkwe senkin me, hunkwe Elaija. Wo, har homkwe senkin me, hunkwe Jeremaia. Har homkwe senkin me, hunkwe profet prueyn.” #Mat 14:1-2; Mak 6:14-15; Luk 9:7-8
15Jisas hiykwe hyo ki-wayh me nian makiy-mesopok, “Hai, homkiaw kokwe hane penkin kiy-ohruw me a, hakwe posokwaw so?”
16Sawk Pita hiy lonuayk me, senkin, “Hunkwe Krais, uwr God hiy ma liaup hiy non, hyo uwrsa me ma-huonokyaw prosue e. Hunkwe God su ma lwayr peyow peyow ey so ney-ar.” #Jon 6:69
17Sawk Jisas hiykwe Pita se kokwe senkin mekow, “Saimon, Jona so ney ara, hunkwe God so uron ihey-ar so ouon mon lwak. Payhokuaw, ok hwon ma kiy-me somokwe, hne kokwe uwr prueyn ki ko hiy hiy-mon nanpanan ohruw-a kumay pa. Sawk hne kokwe hano Aio arian nonkumey ko hiykiaw hiymon nanpanan ohruw-a kumay kow. #Ga 1:15-16 18Sa hakwe hne senkin kiy-me ley, hunkwe Pita, sa hunkwe peir ke hieyn, sa peir sohok ko eir mon kokwe, hakwe hano sios se meio kraipakrai iarok ey. Sawk lokrue-yier mo yerki-wouk hokwe sios sehe liy swakakar ley, korey law. #Jon 1:42; Ef 2:20 19Hne kokwe hakwe ki, Nonkumey so Wayr-hre-yier so a-yerki me kampi kow ey se kow ey. Hunkwe ki erey mon kokwe payay me me-piar sous e, God hiy seyn, nonkumey mon piar sous. Seyr hunkwe ki erey mon kokwe payay me me-hrorsay kumay e, God hiy seyn, nonkumey mon me-hrorsay kumay kow.” #Mat 18:18; Jon 20:23
20Jisas hiykwe sawk hyo ki-wayh me senkin nak-me-kupaku, homkwe uwr har me senkin peie mesor kow o, hiykwe Krais.
Jisas hiykwe senkin me, hakwe lokrue nok, ma-loksian ok
(Mak 8:31–9:1; Luk 9:22-27)
21Enekwei sohiy so meyki mon hokwe Jisas hiykwe hyo ki-wayh me kokwe senkin hiy-me sorasor kumay kow wayr-wayr. Hiykwe mo Jerusalem mon manuw-iau nok, hyo owh hokwe ya non kraiar nak-oum ok. Hiykwe Juda mo uwr hakamay o, pris karmay o, sow ke hiymon-sorasor uwr o, hmo iha mon lwak ey, sa homkwe hye lokin kwor krue ey. Sawk eypok krompri so meyki mon hokwe hiykwe su ma-loksian wayr ey.
22Pita hiy ok sokwe lonuayk menkin, hiykwe Jisas se huonok nok, meykyay mon hiy-ey ohya nok, Jisas se senkin me-sous kraiay, “Hakamay ara, korey law-ar, weynpaweyn senkin sokukwe, hno owh mon liy lousne ley.”
23Jisas hiykwe makiy-orok swahre sow nok, Pita se senkin kiy-mekow, “Satan ara, hey-e, hano meyki meiaw-ar kwa ley. Hakwe hne senkin lira, hunkwe mein lour swanor kuayk ey se hieyn. Hwon ma lohruw-a sohokwe God so uron ko me lohruw-a pey, sawk uwr mo uron ko nian me nan ohruw-a.”
24Seyr Jisas hiykwe hyo ki-wayh me kokwe senkin mekow, “Uwr prueyn hiykwe hano meyki mon pyay ha e mon ankin, peyr hiykwe hyo uron arian ko me meykyay mon ka kekie hain. Senkin lon nok, hyo now arian nak-okin pror kawk sawan ey se lway nok, sa seyn nak-pyay ha, hano meyki mon. #Mat 10:38; Luk 14:27 25Sawk uwr prueyn hiykwe hyo wa arian se-aw yaprue hiy-wayr peyow peyow e nan ankin, hyo wa hokwe lokrue pror kawk ha. Wo, sa uwr prueyn hiykwe hano mey ke meio se lokrue ankin, hiykwe ya lira a, hyo wa hokwe yaprue lwak. #Mat 10:39; Luk 17:33; Jon 12:25 26Sawk uwr prueyn hiykwe ki ohi so omeme lowpwarowp me nak-swakakar wayr ankin, sa hyo wa hokwe God se nak-nonkway pa lwak ankin, hai, omeme ki ko somokwe omok kokwe hyo wa se kokwe penkin hiymon ey so? Hai, uwr sohokwe hyo wa se kokwe pay non manon-swawos onok a? #Mat 4:8-9 27Payhokuaw, Uwrsa mo Ney hiykwe hyo ensel me nion hyo orih so krai arian non nak-aye ankin, hiykwe enekwei sohiy non kokwe uwrsa lowpwarowp mo mey mokwe ya nakway a, hom mey penkin me meio e, sohom mo memeir nonaw nakway ey. #Sng 62:12; Snd 24:12; Ro 2:6 28Hakwe hme ok-ar kiy-mekow, uwr har erey ma nakrok onuayk omokwe, homkwe saw-okrue lopa, sawk su lwayr ira huon, enekwei Uwrsa mo Ney hiy hyo Wayr-hre-yier se lay-hiynak-aye ey hokwe.”
Currently Selected:
Matyu 16: aau
Highlight
Share
Copy
Want to have your highlights saved across all your devices? Sign up or sign in
© 2006, Wycliffe Bible Translators, Inc. All rights reserved.
