IRPHUTNA 40
40
Josefa’n intângna ina omhai irmang a hrilfiana
1Khanchu zoro sôtnote hnunga chu Aigupta rêng uain le bai siamtuhai ruaiin an pu ning an inmurtir pea. 2Khanchu Faroa’n hi hruaituhai inhni chunga hin a sate’n a ning an mur pea, 3khanchu intângna ina a khumhaia; Josefa a ikhumna ina khan hmunkhatin an oma. 4Khanchu intângna in enkoltupa khan Josefa kha annihai enkol hrangin a tia, khanchu a sintho’n zoro sôttak an om suama. 5Khan intângna ina khan, zân khat chu uain le bai siam sinthohai inhni khan irmang an phana, omzia da dangin. 6Zînga chu an omna hmuna khan Josefa a va fea, an hmêl ngûi khakhakin a va hmuhaia. 7Khanchu Josefa’n, “Itho mo a vuan hin te nin ngûi bâka?” a ti pehaia. 8Anni khan, “Irmang kin neia, tûte’n a ni hrilfia pe thei om mahaia,” an tia. Khanchu Josefa’n, “Irmang hrilfia theina chu Pathian ta mo ni ma? I irmang mo nin iphan ni hril roi ba,” a tia. 9Khanchu uain siamtupa khan a’rmang a hrila, “Ki’rmangin, ki maton tiang hin grep kung a oma; 10grep kunga khan ôn inthum a oma; a pâr irmuamin a hong pâr suaka, a pâra khan a ra hmin a hong oma. 11Khan Faroa khilât chu ki kuta hin a lei oma, a ra ki’rhmala, Faroa khilâta khan ki sôm pea, Faroa kha ki lei pêka,” a tia.
12Khanchu Josefa’n, “Kha kha chu hiang hin ni a ti: a ôn inthum kha chu sûn thum a nia, 13a vuan ata sûn thum zoia chu Faroa sintho nôk ni ta: khanchu a uain pêktu ni ni laia ang khan Faroa khilât pêktu la ni nôk ni ti, a tia. 14Khannisianlân ni vân a sa nôk tena chu a’rnghil vai ni hong irnghil no’n lân, Faroa kuang ki thurchi hril pe ngêtin lân, hi in ata hi ni hruaisuak lam ngaitua roh. 15Kei hi Hebrai-hai ram ata mi’n an nin rûka, mi’rhmang ki nia, hi rama lak hin hianga irkhumna ina khum inruk hrang lakin ite ki insiatna om maka,” a tia.
16Khanchu bai siamtupa khom khan hrilfiana thu kha an hriata, Josefa kuang khan, “Kei khom irmang ki phana, ki lu chunga hin bai khamphulu thum ki lei tiang irchuana, 17a chungtaka khan Faroa hranga bu, bai chi tinrêng a oma; khanchu ki tiang pum khan vatêhaiin an hong inchuka,” a tia. 18Khanchu Josefa’n, “Hi hi a hrilfiana chu a ni: khamphulu thum chu sûn thum ni a ta; 19a vuan ata sûn thum tena chu Faroa’n ni taksa ata ni lu chôikâng a ta, thingrêla nan khâi a ta; khanchu vatêhaiin nang an inchukin nang an ifâk hrang a ni,” a tia.
20Khan sûn thum ni tena chu, Faroa suak ni sûn chu a nia; Faroa’n a suakhai hrangin hruai an thea, a siahlohai laia mi uain siamtu le bai siamtu lu a chôikânga. 21Josefa’n a ihrilfia pehai ang takin, uain pe ngaitu chu uain petu ni nôk hrangin an sintir nôka. 22Bai siamtupa rêk chu an khâi thatpaia. 23Khannisianlân uain pêktu khan Josefa kha inhre loiin a’rnghil rak tâk a ni.
Currently Selected:
IRPHUTNA 40: HRACLBSI
Highlight
Share
Copy
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
