THA 2
2
Rangii kamateinii humkapyii
1Pentikos piinei leimik tei gongsek-kii, kamalum meihang teinii bam hangninii kito gong nduiwo takle. 2Sateichii binasek-kii tingkai katei gong kajyii takumpii sating gamto khoi hangninii gongsanii, ahnyiinii kabam ki kitei tokryiisek takle. 3Teito mimah malyii takumpii hamkapat ninado tei kito kalei mei nsang nsang go deng kapyii tei ahnyiinii ngoutakle. 4Teito ahnyii mei kalei kaga rangii kama- teipii tokryiisii, rangii teinii ahnyiigo malhii matu katu taiswisii lat katham katham tiisii malhii haotu takle.
5Sateichii sating kangto kalei lui hang kito lung kamatei Jehudimei sapfiimei Jerosalem kito bamle. 6Sateichii khoi ai shii wosii, mei- hangnii gong ndwiwo takle ninado ahnyii tei sung gatakle, kadapokii tam kalei tei mei nsang nsangnii mpou mpoulatpii shiiwo takle. 7Teito ahnyii tei khiipat takle ninado madat takle, “Ai tam kalei meihang ai Galili kito kalungmei makde? 8Sateichii ai kada takumpiinii nyiihangnii mpou mpoulat piinii shiiwopo? 9Nyiinii Persiya, Mediya ninado Ilam kitole sateichii Mesopotamiya, Judiya ni- nado kapadosiya, Pontas ninado Asia kitole, 10Prigiya ninado Pamphaliya, Izip sateichii Sairen ki Libiya pungbang kitole, nyiikak kito mei kangkanii Rom kito gongle. 11Jehu- dimei ninado lui kakimei Jehudimei mah kanat kajum meile. Sateichii nyii mei kangkanii kret ninado Arabiya kitole; nlenii Saraanii tha kadi tiikapyii kaang kito ahnyiinii tam kaleihang ai nyiinii mpou mpou latpii shiiwole.” 12Meihang tei sung gasii rampou takle, ahnyii mei hangninanii hangninii dakii tamle, “Ai ai dapeipo?”
13Nlenii mei kakimei teinii ka- malum mei gotei hoksii nuisii tamle, “Ahnyiinii jousak panhii takle.”
Pentikos piinei leimik Pitarnii ralikapyii
14Nlenii Pitarnii keariisiikan- khiigo kaswisii gongtu satsii, rok sagoisii ahnyii dakii tamle, “He Jehudimei ninado Jerosalem kito kaleimei hang, ai ai gonyiinii tilo sateichii gusam kikii gonyii koi tei koikingseilo. 15Kadaponii gonyiinii kamaning takumpiinii ahnyii ai jou sak panhii makle kadaponii tingna mah hangtum kashang pungtei roinii taleile; 16nlenii ai ai Lungkaka- lingpii Joelnii tam kabam teile:
17‘Sateichii Saraanii tamle,
kana tinglang hang kitei aitiisii pat tangle,
Inii meihang phyiiryiikii gumah rangii tei rui m-mangpyii katuni Inii meihang phyiiryiikii gu rangii tei rui mpat tangle,
gonyii nah sapfiimei ninado sapwimei hangteinii gusam saa mpat tangle sateichii gonyii nah karanumei hangteinii madhangkapyii tei ngoutangle;
sateichii kating kateimei hangnii mang mai tangle.
18Nle, sateichii goki kalei sapfiimei ninado goki kalei sapwimeihang phyiiryii teikii teitinglang hang kak kitei Gu rangii tei Inii rui m-mangpyii tangle;
sateichii ahnyiinii Gusam saa mpat tangle.
19Sateichii Inii kasagoi sating gamto kamadat kamadat ninado sazyii kangto tiikamangou hang katunii,
zai, mi sateichii mika mah kajekdwi tei mangou tangle.
20Bangpii mah kadi ninado pumtei kava piinei leimik tei gong kasunii,
leimik tei myiitu tangle,
ninado sakhii tei zai takumpiinii ghangtu tangle.
21Sateichii aitiisii pat tangle, katunii, Bangpii zeigo kalatmei hang gotei keipyii tangle.’
22“He Isrelmeinah, sam hang ai shiipyiilo–Nazaretki Jisu, Saraanii gonyii kak kito mpou tha kadi ninado kamadat tha hang sateichii tiika- mangou hang kamangou, teipiinii mpou ai Saraanii mazhii kapyiimeile katu tei gonyii pum sekpiiniido tile. 23Saraanii reipii tisii kalei ninado mpoumah kamaning taiswisii, go- nyiinii kem katiimei bah kikii mpougo pyiitoi aisii jotpyiipii gisii krosh gamkii dhangsii gi aitakle. 24Nlenii Saraanii katai mah kamage kalak kiteito mpatpyiisii, mpougo tiima- ringpyii takle, kadapochiinii teiteinii mpougo ngam makle. 25Kadapokii devitnii mpou mah kaang kito tamle,
‘Inii Bangpiigo gudoikii taksupii ngoule,
kadaponii Inii nlai kasu tiisii mpounii gubah ajiilam pangto bamle;
26teijangpii gulungswinii ntale,
ninado gu malyiinii karangapii tokryiile,
teiphyiiryiito gupum guzainiido maning kamalum kito lung tangle.
27Kadapokii nangnii gu rangii go kataibam kikii toipyii lakle,
mak-kii gomah kamateimeigo kashyii kahong tei ngoumatu lakle.
28Nangnii n-gu karing pwidi tampyii takle;
godoito n-gu kan-ta piinii tiitokryii pyii tangle.’
29“He lungkasyii kangsanamei, Inii gonyii dakii nyii pfii Devit mah kaang kito kasang tei tam wobuile, katunii mpou ai taitakle, sateichii poigoi aitakle sateichii mpou mah roubam tei tingnei katangpii nyiikak bamle. 30Teijangpiinii mpounii Lungkakalingmei hangninii tiisii, mpouki tatreng hangninanii mpoumah sagongbam ki bam tang karamle sii Saraanii mpou dakii riishii hangninii tiipyii takle katu tei mpounii tiwo takle. 31Mpounii ai ai reipii ngou wosii Kristanii ringkakhii mah kaang kito tam mpatpyii takle, katunii, mpougo katai bam kikii toipyii makle, sateichii mpoupum niido kamage kalak tei ngousu takle. 32Jisu aigo Saraanii tiimaringpyii takle, tei kaang kito nyiihangnii sakchyii tii- ziile. 33Teijangpiinii Saraa mah bah ajiilam pang teikii poisagoi kapyii taiswisii sateichii rangii kamateigo pyiitang lesii riishii tiikabam tei Pfii dato doukalu taiswisii, gonyiinii aitoi ngou kalei ninado shiikalei ai mpounii rui mpat pyiile. 34Kadapo- chiinii Devitnii sating gam khiimakle, nlenii mpou pum sekpiinii tamle,
‘Bangpiinii gu Bangpii dakii tamle,
n-go ngoukarou meigo Inii gupi kangkii kai kasuta,
35gubah ajiilam pangto bamlo.’
36“Teijangpii gonyiinii krosh gamkii dhangsii gitoi kalei Jisu aigo Saraanii Abangpiido Kristado tiipyii takle katu Isrelmeinah hangnii tiigatpii timatulo.”
37Teito meihangnii ai shii wosii ahnyii lungtei hangkapii dengsii Pitar ninado Tiilamlwi kapyiimei ka- kimei dakii tamle, “He kangsanamei, nyiinii kadapei tiitangpo?”
38Pitarnii ahnyii dakii tamle, “Gonyii mah kem kaleipyii matutang karam jangpii gonyiinii lung kali wolo sateichii Jisu Krista zei kito gonyii hangnii dwi mpum wolo ninado gonyiinii rangii kamatei mah luha tei doutangle. 39Kadapochiinii gonyii dakii, gonyii nahmei dakii, sateichii kadhii kito kaleimei hang dakii, nyii Saraa Bangpiinii latpyii tang karam meihang dakii riishii tiikabam tei bamle.”
40Sateichii kaki kaki sam hang- kapiiniido mpounii sakchyii pyiile, nyiigo katwido katwikai pyiisanii tamle, “Kashyii lung kapung aiha ki aito mpou mpou roinapiinii keiwolo.” 41Teijangpiinii mpou sam lukai kalu ahnyii hang gotei dwi mpum pyiitakle sateichii teipiinei leimik tei mei tangtumkii ahnyiida gong mpam wole. 42Sateichii ahnyiinii tam ralikapyii kito, riita ndwi kiteito, tiirok tiirak katu kiteito sateichii kariita kiteito taksupiinii lungliitsii tiile.
Kamalum mei kak kito kalung
43Sateichii meihang phyiiryii tei kahing pat takle, kamadatdo tiika- mangoudo hangkii tiilamlwi kapyii meinii tiitakle, 44sateichii kamalum meihang teinii gong ndwi wosii, amahlyii hangtei machii mah tiisii jumle, 45sateichii ahnyiinii ahnyiimah kabam hangtei joitoi aisii kagamei dakii jaipyii aitakle. 46Sateichii sating kata Saraa kamaning kilungto lungswi hangninii tiisii taksupii nduisii, mpou mpou kito tiirok tiiraksii ahnyiinii ntasii ninado lung rangasii mah chii njoile. 47Ahnyiinii Saraago tam matoisii meihang doitodo tiikaha tei doule sateichii keikapyii dou kalumeihang gotei bangpiinii sating kata ahnyii dakii kai mpam pyiile.
Currently Selected:
THA 2: NAG2
Highlight
Share
Copy
Want to have your highlights saved across all your devices? Sign up or sign in
Maram Naga, KARANU KABI SAMTAM © Bible Society of India, 2007.
