METIU 19
19
Nou-naa n-nou katu mah kaang kito ralikapyii
(Mrk 10.1-12)
1Jisunii aihang ai tamsang sek-kii mpounii Galili kito tat pat tosii Jordan karyii lugangto kalei Judiya sazyiiki tat tutakle. 2Satei- chii meimoinii mpoutai swi wotakle sateichii mpounii ahnyiigo tei kito tii mbipyii takle.
3Sateichii Farasismei kangkanii mpouda gongsii mpougo ajai jusii n-nhiile, “Sapfiimei hangninanii kaang kata hangninii jangpiinii mpou- nougo n-nou katu ai ajaimakpo?”
4Mpounii khekalatle, “Saroisekto tiikapyiipiinii meinahgo sapfiimei ninado sapwimei tiipyiile, 5sateichii ‘kaang aijangpii sapfiimei hangni- nanii mpou-pwi mpou-pfiigo toi aisii mpou nou gotei kaswisii lungtu tangle; sateichii hangna tei hangninii tiitangle sii tam kabam ai gonyiinii fii makpo?’ 6teipiinii ah nei teinii hangna sutakle nlenii hangninii takle, teijangpii Saraanii poi nja kabam tei meikaniido chyii kapak matu sulo.”
7Ahnyiinii mpou dakii tamle, “Teitiileponii, Moses nii n-nou katu mah larek pyiisii mpoupeigo n-nou ailosii kadajangpii kakhatbampo?”
8Mpounii ahnyii dakii tamle, “Gonyii lung katei jangpii Mosesnii gonyiigo n-nou katu mazhiipyii takle, nlenii saroisektonii aitii makle. 9Sateichii Inii gonyii dakii tam leile, mei kata kangkanii mpou-nougo matei kasu jangpii supiinii kaang kata hangninii jangpii mpou-nougo n-nou aisii sapwimei kaki hang- niniigo manou woleponii, mashung maha aitakle. Sateichii n-nou kalei sapwimeigo manou kalu ah teinii mashung maha aitakle.”
10Boumeinii mpou dakii tamle, “Sapfiimei hangninii nei mpou-nou kak aitiisii leile leponii, nou tiikasupou bibwile.”
11Nlenii mpounii ahnyii dakii tamle, “Tam kalei ai meihangnii lu- kaipei womakle, nlenii ai ai Saraanii pyii kabam mei roinale. 12Kadapokii kangka pwi moilungto teitiisii lung kalu, sateichii kangkanii meinahnii tiikatu; sateichii kangkanii sating gam sazyii jangpiisii ahnyii roina- piinii nou tiikasu leile. Ai ai lukai kabuimei teinii lukai wolo.”
Jisunii nahmei kachengmeigo satoi kapyii
(Mrk 10.13-16; Luk 18.15-17)
13Jisunii nahmei kachengmei phyiiryiikii mpou-bah poikai pyiisii riita kaipyii matutang karam jangpii mei kangkanii nahmei kachengmeigo mpouda pang gongle, nlenii boumei teinii ahnyiigo n-gitakle. 14Nlenii Jisunii tamle, “Nahmei gotei guda gong matulo, ahnyiigo nam sulo, kadapokii sating gam sazyii tei aikakum mei mahle.”
15Sateichii mpounii ahnyii phyii- ryiikii mpou bah poikai pyiitakle, sateichii teibam kiteito tat tutakle.
Mah kani rahang kaleimei hangninanii kalui kaga karing fiikatu
(Mrk 10.17-31; Luk 18.18-30)
16Sateichiijulo, mei hangninanii mpouda tatpisii tamle, “Madhiika- pyiipii, Inii kalui kaga karing doutang karam jangpii kadapei tha kabi tiitangpo?”
17Teito Jisunii mpou dakii tamle, “Kabi mah kaang kito nangnii kadajangpii gudato n-nhii leipo? Kabi teinii hangninii roile, nangnii karing bamni tei liitnyii leponii, kakhatsam hangtei swi wolo.”
18Mpounii Jisudakii tamle, ‘Ka- dapei kakhatsam?’ Sateichii Jisunii tamle, “Meigo gisulo, mashung maha sulo, mei mah raga sulo; kasang kasu sakchyii pyii sulo, 19gopwi go pfiigo sadzyii ngariit tiilo, sateichii goki tiinaniipameigo nangnii goroinapii n-go lungkasyii takumpii lungsyiilo.”
20Rahang kaleipii teinii mpou dakii tamle, “Ai hang ai Inii swi wotakle, Inii kadapei tiimakpo rei?”
21Jisunii Mpou dakii tamle, “Nangnii bimatui bimasangnyii lepo- nii, tat tulo gomah kabam hangtei maa joisii mah kagameigo pyii ailo, teitiileponii nangnii sating gamto kani kahii tei doutangle; sateichii gonglo, gutai swi wolo.”
22Rahang kaleipii tei ai shii wosek-kii mpou swi kamagesii tat-tu takle; kadapokii mpounii mah hangkapii nile.
23Jisunii mpou-boumei dakii tamle, “Inii gonyii dakii kasangpii tam leile, mah kanimei hangninanii sating gam sazyiiki liit tang karam ai hangkapiinii hungle. 24Nlailoisii Inii gonyii dakii tam leile, mah kanimei hangninanii sating gam sazyiiki liit tang karam sungnii poutungki kounah hangninanii mahum-mi kito joupat katu teinii malabwile.”
25Sateichii boumeinii teitei shii wosek-kii, ahnyii tei hangkapii sung gasii tamle, teitiileponii, “Tanii keikapyii karing tei dou wotangpo?”
26Jisunii ahnyiigo jusii tamle, “Meinah jangpiinii ai ai tiipei wolakle, nlenii Saraa jangpiinii mahlyii hang tiipei wobuile.”
27Teito Pitarnii mpougo tamle, “Julo, nyiinii mahlyii hang toi aisii gotai swi wotakle, Saraanii nyiigo kadapei pyiitangpo?”
28Jisunii ahnyii dakii tamle, “Inii gonyii dakii kasangpii tam leile, Kasatai sazyii pouryii kiteito meinah sapfii mpou teinii mpoumah pumtei kava sagong bamki kabam tinglang kitei gutai swikalu gonyiido sagong- bam keariisiinakhii gamtei bamsii Isrelmei mah Lui keariisiinakhiigo samtak tiitangle. 29Sateichii guzei jangpii kihang mak-kii sanamei hang mak-kii taipwimeihang, mak-kii pwi-pfii mak-kii nahmei mak-kii lu hang kado toi kalei meihangnii tei njai mazhii-hai doutangle sateichii kalui kaga karing tei pyiitangle. 30Nlenii karei mei hangkanii natu tangle, sateichii kanamei teinii reitu tangle.
Currently Selected:
METIU 19: NAG2
Highlight
Share
Copy
Want to have your highlights saved across all your devices? Sign up or sign in
Maram Naga, KARANU KABI SAMTAM © Bible Society of India, 2007.
