METIU 22

Myiikapang takbai mah ndasam

(Luk 14.15-24)

1Jisunii ahnyii dakii ndasampii nlailoisii tamle, 2“Sating gam sazyii teinii mpounah sapfii mpou jangpii myiikapang mah takbai pyiikalei sagong hangninii takumle, 3Sateichii ‘myiikapang takbaiki gong hailosii lat kalu meihang gotei maa lat tulosii mpouki kaleimeigo lang matu takle, nlenii ahnyiinii gongnyii sutakle. 4Nlailoisii mpounii kikalei- mei kakimei dakii aitiisii lang matu takle; gong hailosii lat kalumeihang dateikii tamlo, Julo, Inii pyii-chii tang karam takbai tei tiikada bam takle; gumah twom madang ninado twomnah hangtei gibam takle, sateichii mahlyiihang tiidasang bam takle, myiikapang mah takbai kitei gonglo.’ 5Nlenii ahnyiinii teigotei mah kado lung hungsii poisei supii tat tutakle; hangninanii mpoumah luki, kaki hangninanii mpoumah li-laa katiini tat tutakle. 6Sateichii kakimei hangteinii mpou mah kikalei mei gotei jumsii tii-nroupyii takle sateichii ahnyiigo girang aitakle. 7Sagong tei hangkapii rarhii takle sateichii mpou mah saryiimei gotei lang matusanii meigo kagimei hang gotei tiimaga aitakle, ahnyii mah namdi teido mi rutoi malei takle. 8Teito mpounii mpouki kalei- mei dakii tamle, ‘gumah myiikapang mah takbai tei tiikadabam takle, nlenii gonghailosii Inii lat kalumei hangtei gong haikajyii sutakle. 9Teijangpiinii pwidi lamjang kadi hang kitei maasii gonyiinii kangou kangou hang gotei myiikapang mah takbaiki gong hailosii lat tulo.’ 10Teipiinii ki kaleimei teinii pwidi kadi hang kitei maasii kabigodo kashyii godo, ahnyiinii kangou hang gotei poi ndwi wotakle sateichii sabato kagongmei hangteinii myiika- pang bam tei tokryii takle.

11“Nlenii sagongnii sabato gong kalei meihang gotei julesii tat kaliit tinglang kak, myiikapang nat kai ka- sumei hangninii teikikii ngoutakle; 12teito sagongnii mpou dakii tamle, ‘Kangpiiwo nang myiikapang nat kaisupii aiki kadakumpii liit topo?’ Sateichii mpounii mah kado malhii wolak takle. 13Teito sagongnii nga kangamei dateikii tamle, ‘Mpougo pi- bah reng peisii saba kamyii kiteikii toikai ailo, teibam kiteito mpounii ghii kagetsii hat tangle.’

14“Kadapokii Saraanii mpou mah sating gam sazyiiki gong hailosii mei hangkago latsii leile, nlenii mei chengniikanii lat kalei tei lukaile.”

Aha kapyii mah kaang kito kachyiinhii katu

(Mrk 12.13-17; Luk 20.20-26)

15Teito Farasismei teinii maasii Jisugo kada takumpii mpoumah samtam kito maiwo tangpo katupii sam rashii takle. 16Sateichii ahnyii- nii Herot tai kaswimeigo kaswisii ahnyii mah boumeigo lang magongsii tam matule, “Madhiikapyiipii, nangnii kasangle, sateichii Saraamah kasang pwidi tei kasang kasangpii ralipyiile sateichii mei kagodo hingmakle katu nyiinii tile, kadapokii nangnii mei-ju juleimakle. 17Teipiinii nyiidakii tam seilo, nangnii kadalesii maningpo? Kaisar dakii aha kapyii ai ajai manii ajaimakpo?”

18Nlenii Jisunii ahnyii mah lungchoi kashyii tei tiwosii tamle, “Kabijai katiimei, gonyiinii n-gu ka- dajangpii ajai juleipo? 19Aha kapyii jangpii sanahgyii tei n-gu mangoulo!”

Ahnyiinii sanagyii hangninii mpou- da poigong takle. 20Teito mpounii ahnyii dakii tamle, “Phyiibung ninado zei ai tamahpo?”

21Ahnyiinii khekalatle, “Kaisar mahle.” Teito mpounii ahnyii dakii tamle, “Teitii leponii Kaisar mah tei Kaisar dakii sateichii Saraa mah tei Saraa dakii pyii ailo.”

22Sateichii ahnyiinii ai shii wosek-kii sung gatakle, sateichii mpougo toisii tat tutakle.

Ringkakhii mah kaang kito kachyiinhii katu

(Mrk 12.18-27; Luk 20.27-40)

23Ringkakhii katu ai galesii tam kalei Sadhumei teinii teipiinei mpouda gongsii n-nhiile, 24“Madhiikapyiipii, Moses-nii tambamle, ‘nah kaga sapfiimei hangninanii tai aileponii, mpou-tai karhiimeinii mpou-nou gotei manou wosii mpou jangpii atii- anah mbam tang karamle.’ 25Aitoinii nyii kak ki sanamei sana leile; sung kating tingsangpii teinii nou tiisii taitakle, sateichii nah lungkasu taiswisii, mpou-nou tei mpou-tai ka- rhiipii dakii kaidek aitakle. 26Hangna kashang ninado hangtum kashangdo sateichii sana kashang katang tei teitiisii pat takle. 27Sateichii kalui luisang kito sapwi mpei tei taitakle. 28Teijangpii ringkakhii piinei leimik sapwi mpei tei ahnyii sana kak kito tapii-noule tangpo? Kadapokii ahnyii hangnii mpoupeigo manou takle.”

29Nlenii Jisunii ahnyiigo kheka- latle, “Gonyiinii ma-aitakle, dapo- dinchii gonyiinii kabi rasam ninado Saraa mah teimaham gotei tisu takle. 30Kadapokiiringkakhii kiteito ahnyiinii kalakna tiimakle sateichii ahnyiigo kalakna tiisii pyiimakle, nlenii ahnyiinii sating gamto sating gamlui hang takumpii leile. 31Sateichii kataimei ringkakhii mah kaang kito, 32‘Inii Abraham, Isak ninado Jakob mah Saraale sii gonyii dakii Saraanii tam kabam tei gonyiinii fiimakde?’ Mpounii katai mei mah Saraa makle, nlenii karingmei mahle.”

33Sateichii meimoi teinii teitei shii wosek-kii ahnyiinii mpou mah ralikapyii tei sung gatakle.

Kadi kakhatsam

(Mrk 12.28-34; Luk 10.25-28)

34Nlenii Sadhumeinii mah kado khekalatpei kalak tiisii mpounii ahnyiigo khepyii takle katu tei Fa- rasismeinii shii wosek-kii, 35Ahnyii kak kito Ajaitingshang kati ojamei hangninanii mpougo ajai jutang karam jangpii mpougo sam hangninii kachyiinhiile. 36“Madhiikapyiipii, ajaitingshang hang kak kito kadapii teinii kadi disangpiipo?”

37Teito Jisunii mpou dakii tamle, “ ‘Nangnii Bangpii go Saraago golung matum madumpii, rakot matum madumpii sateichii lungswi matum madumpii haisii lungsyii tang karamle.’ 38Ainii kadi disang ninado karei kakhatsam teile, 39sateichii aitakumpii hangna kashang tei aile: ‘Nangnii goroinapii n-go lungkasyii takumpii nangnii goki tiinaniipa- meigo lungsyii tang karamle.’ 40Ajaitingshang ninado Lungkaka- lingmei mah ralikapyii hangtei ai kakhatsam hangna kikii poi njabam takle.”

Krista mah kaang kito kachyiinhii katu

(Mrk 12.35-37; Luk 20.4-44)

41Farasismei hangnii ndwi kalei tinglang kak, Jisunii ahnyiigo sam hangninii kachyiinhiile, 42“Krista mah kaang kito gonyiinii kadalesii maningpo? Mpou ai ta-nah Sapfii mpoupo?” Ahnyiinii mpoudakii tamle, “Mpou ai Devit nah Sapfii mpoule.”

43Mpounii ahnyii dakii tamle, “Teitiileponii, ‘Devitnii rangii lamto mpougo kada takumpii Bangpii latpo?’ Devitnii tamle, 44‘Bangpiinii gu Bangpii dakii tamle: Inii n-go ngou karoumeigo gupi kangkii poikai kasuta, gu bah ajiilamto bamlo.’ 45Devitnii mpougo ‘Bangpii’ lat leponii, Krista ai kada takumpiinii mpou nah sapfii mpou tangpo?” 46Sateichii mei kado mpougo sam hangninii kado khekalatpei wolak takle, sateichii teipiinei leimik sekpii meikado mpougo nlailoisii kachyii- nhii hingtakle.

Currently Selected:

METIU 22: NAG2

Highlight

Copy