DOWLLO 2
2
Pthla Kchiir Arjun
1Pentikos nit mphaak thungta, mkheng inni mun khat thung ngi kurkuk lamda. 2Ungta tun kat daatti tirthli kraang heppi parwaanki krowl khat thlengda, ungu mmaan ko onna innka ava pum dimmi dim chda. 3Ungta mei lulu ngi mhin inni ktardet da, ungu mii pum ktai leen tuwngda themda. 4Ungu mkheng kheng inni pthla kchiir ri dim chlamda, ungta pthla do the dil kṭoiji msik msik pauvi kpau pṭhun lamda.
5Tunva parwaan kurdu ngi ka am chati khim khai thungki plung klut Jihudia mii rek Jerusalem thung ngi am lamda. 6Ungta hava krowlli miiluwngpa thuwk kurkukda, ungu mmaanna psum chda, mleija mpau inna mdak mdak inki pauvi mii pum ktaiva aryaa da. 7Ungu mmaanni ngak chlam da, ungta tngana a kdingi the lamda, “Hava kpau mii mkheng nga Galil ki lam pme mo? 8Ungta nen nenki nkhuwpaam pauvi mii pum ktaiva naryaak daat inmo? 9Parthia, Media, Elamait, ungu Misopotamia ki mii rek, Judia leh Kapadosia, Pontas leh Asia, 10Phrygia leh Pamphylia, Egypt leh Kurini ki Libia arveelli ka am mii rek, Romia ki kvel kcha rek, Jihudia leh Jihudia no kupṭoi kcha rek, 11Kritan leh Arabia rek, hava klin langlang ngi Isowr nong rekki kpau ava npau npau inni naryaak chaak inna.” 12Ungta mkheng kheng inni ngak chlam da, kupsum kcha ngi khat leh khatti the lamda, “Hava talulu daat da?” 13Pdainu ktlok rekva kipnii chaakki the lamda, “Mmaanni rikrou dii nee reen lamda kipri kcha lamma.”
Pitor Doparyaam
14Pdainu sowm lei khat tu kilṭhi ngi Pitor ri ripda, mukrowl kparyaa ngi mhin inni theda, “Judia leh Jerusalem thung ngi ka am mii mkheng naanni hava adei chaan, ungu nei kpauna rekka knaa atkiin in. 15Mleija naan dobin lulu ngi hava mii rekka kipri ava pme, mleija nit avaki ṭhang kdum daat roa; 16Pdainu hava ava khulpu Joel li mdo the dok:
17‘Isowr ri theda, mṭutna
nitti kthuwkra,
Neiji dulti mii mkheng leen kapthla ptlong nikdi,
ungta achapa rek leh achanurek inni pau kphuwngra,
ungu ksenao rekki mik kleng kdei kpha chra,
ungta kder rekki mer kmer lamra.
18Oji, ungu hava nit rek thung ngi,
Nei ksra owrpa rek leh ksra owrnu rek tunni,
Neiji Kapthla ptlong nikdi;
ungu mmaanni pau kphuwng lamra.
19Ungta tun knungki
parwaan tha tngana,
ungu kurdu dulti thung ngi titinna ki hii,
ungu mei ungta meikhut Neiji tdet lam nik di.
20Mukpu ki klin lang lang leh kunlor nit mthlen dungi,
kniw ava kvom chra ungu thla ava hii kur owl chra.
21Ungta hava kthuwkra, Mukpu miing
ko own kcha mii khim khaija kaktlan pikra.’
22Isreel mii rek hava pauva aryaa chaan: Nasareth Jisua Isowr ri klin klin nong rek, ungta tngana rek ungu titinna rek mdo ptlot ava ngi Mma Isowr do rot Miilai khat tdit adak kat inni adodee in 23Hava Jisua, Isowr ri krip merri mdo bin, ungu mdungi kdei chdok dil kṭoiji parlaan da, naanki Nowlam kṭoi kma mii rek khutti khros leen pthoi lamda, ungu eayou da. 24Pdainu Isowr ri suwkthuwkki mdiyo thungki parthlet da, pring pinle da, mleija ava ngi khut pnen pchaangme.
25Ditta Mma mlei thung ngi Devid ti theda,
‘Neiji Mukpu a mpha ktai thu kdu sukki dei chnu,
mleija neiji kukunchun ma nra,
Mma ngi kchang ktong tha amda;
26ava leiji kuplung ngam chda,
ungta kiplei kanpa chda;
ava kheelli kdaksaa rukva plung pnet psuk da am nik di.
27Mleija kraothla ava sim thu sii nimti,
mata Nang ki kchiir khat ava kmawng pdee nimti.
28Nang ngi rinkhu lam rek mipdee chtinu;
Nah awng ngi kdung plung kngam mpur owl nadi.’
29“Ku u knao rek, charuwl Devid mlei thung ngi mma diyou dokda, kulruwl dok, ungta mma thlaan ava snii kpha thung ngi ta am ṭhi daat in dinu neiji plung ktangarri kthe chaakka. 30Ava ngi mlei kurthuwkda, ungta khulpu khat kurthuwkki mma charuwl rek thungki khatti mma ku onna tunni kuk ongra, dida mhin inni Isowr ri paureel khatti mdo reel pik dok lam tdit deida. 31Mma ngi mdungi deida ungta Khrista rinkarheel nrangki theda, mleija Mma ngi sim thu siime, mdit mata mdaksaa ngi kṭop deime. 32Hava Jisua Isowr ri pring pinle da, ungu ava leiji nen nkheng ngi sakhi tkurthuw in. 33Ava ngi mlei kurthuwkda, Isowr chang ktong tha khiingda, ungta pthla kchiir paureel Mpah hinki arlaang chda, naan dodee ungu do aryaak hava aptlon pik chaanda.
34Mleija Devid ta parwaan
tha hunkal me;
pdainu mma mdak katti theda,
‘Mukpu ngi neiki Mukpu hin theda,
35Neiji Nah arawlmii rek akhu tingi kthiik du
khim khai,
Nei kukhut chang ktong tha ko ong cha.’
36Ava ngi mlei kurthuwkda, naanni khros leen ado pthoi in Jisu ava Isowr ri Mukpu ungu Khrista mdo tpur owl tdit Isreel innbung mkheng ngi adeiso.
37Tunva mmaanni hava maryaak in thungta muplung ril inna kdetbuk heppi tloda, ungbi Pitor leh kenyee rek angṭhe hin the lamda, “Ku u knao rek neenva tak tlo nikaan da?” 38Ungbi Pitor ri mhin inni theda, “Apnu ton in ado tuptlot pik nraan leiji plung ren ahur chaan, ungu Jisu Khrista miing ngi naan mii pum ktaiji baptis alou chaan, ungta naanni pthla kchiir chla arlaang chnaandi. 39Mleija naan hin tha ungu anaoleen hin, ungu lam kla ngi ka am mii mkheng hin, nenki Isowr Mukpu do own ava mii pum ktai hin mpaureella ka am.” 40Ungta pauna rek knempokki sakhi purthuwda, ungu ksop lamda theda, “Hava kṭha kma charuwl thungki adaksaan kirtleu chaan.” 41Ava leiji mma pauna karlaang cha rekka baptis ptlot lamda, ungu ava nitti raothla pun kdum arveelli tpom chlam da. 42Ungta mmaanni kenyee dopurchu thu, ungu kurbuk thu thenpen kupkui thu ungta kṭhil cha thung ngi plung plut lamda.
Krin cha rek Arlakki Rinkhu
43Ungta raothla khim khai leen kṭi amda; ungu kenyee rekki tngana leh titinna knempok tlo lamda. 44Ungta krin cha mii mkheng ngi kurkuk lamda ungu do mkheng nga khdaat ti tlo lamda. 45Ungta mdo thloi mdothloi in jur lamda, ku mii khat kikriing hin them pik lamda. 46Ungta mnii ktaiji luwbuk Inn thu thuwk kurkuk lamda, ungu innbung kteen thung ngi thenpen pkui lamda, ungta plung kngam leh plung kneiji chaanee lamda, 47Isowr panpaak lamda mii mkheng dosanni am lamda. Ungta mdo ktlan dok rek ava Mukpu ngi mnii ktaiki tpom pik lamda.
Currently Selected:
DOWLLO 2: LAMKBSI
Highlight
Share
Copy
Want to have your highlights saved across all your devices? Sign up or sign in
Lamkang NT with PSA and PRO - REN PAURIINA
Copyright © Bible Society of India, 2002.
Used by permission. All rights reserved worldwide.
