LUK 22

Jisu Ke eayou rangki Kursop

1Tunva taplaanna ditta thowl ktaak thenpen kmaal ava naida. 2Ungta thiimpu kinreel rek leh Nowlam chukpu rekki, Mma ava tak heppi kjowngda te eayo rang kdingi mlam thlaam lamda; mleija mmaanni mii rek ṭi chlam da.

Juda ngi Jisu mdo Rotma

3Ungta sowm lei knii thungki Iskariot tdit Juda thung ngi seitaan lut da. 4Mma ngi thiimpu kinreel rek leh nong klin kpuw rek hin tak heppi parlaan pthii nikdi kdingi chet da karbiik ṭhi lamda. 5Ungta mmaanna kanpa lamda, mma hinni sum mdo piik nraan kulrot ndok lamda. 6Ava leiji mma ngi roda, kurtuwl mii rek dodee ma ngi mhin inni mdo piik pthii nra mpha kcha mma ngi thlaamda.

Jisu ngi Taplaanna Thenpen Kmaalra Mkirsim

7Ungta taplaanna jao ava tlaai mdo down nraanki, thowl ktaak thenpen kmaal nit ava veida. 8Ava leiji Jisu ngi Pitor leh Johon hinni theda, “Vaanra, nenni taplaanna ava tmaal nraan apurchuwl in.” 9Mmaanni Mhin the lamda, “Talu thu neenni purchuwl chnikaan da?” 10Mma ngi mhin inni theda, “Asuwn, naanni khuwpii thu ahai lu in mpha thu, uwm thung ngi dii kukdom miilai khatti aju kurdut ṭhi raan, mma luna inn ava thu alu pṭoi in. 11Ungta inn kpupa hin atheen, ‘Chukpu ngi ahin theda, malli thlungda, ksiikhu rektu taplaanna kmaal chaak nraan innka ava tu ung rangda?’ 12Ungu mma do purchuwl dok tun knuwng reep innka khat akti det raan, ava thung ngi apurchuwl in.” 13Ungta mmaanni va lamda, mdo parseel lam anto jikki pha chlam da, ungu mmaanni taplaanna ava purchuwl chlam da.

Mukpu Maal

14Ungta ṭhang veida, ungu kenyee rek tu kilṭhi ngi Mma ngi tebol be ngi ko ongda. 15Ungta Mma ngi mhin inni theda, “Neiji suwkthuw du ngi hava taplaanna ava naantu kdung reenni maal chnuwm nu; 16mleija Neiji ahin thaanni kthea, Isowr Kruwngpaam tha hava mkurkhum du khim khai, Neiji chaa purson nimaang.” 17Ungta Mma ngi tong khat louda, mpanpaak diltha Mma ngi theda, “Hava alou in, ungu arlak inni athem in; 18mleija Neiji ahin thaanni kthea, Isowr Kruwngpaam murjun du khim khai, snii ki kupṭhun ni rikrou dii ava Neiji nee pursom nimaang.” 19Ungta Mma ngi thenpen louda, mpanpaak diltha khuida, mhin inni pii thida, theda, “Hava Nei kdaksaa ado kpiik chaak in. Hava Nei ado tbin phaak naanni atlo in.” 20Ungta anto lulu ngi mmaal dil thaanni tong louda, theda, “Hava tong thung ngi kdo ptlon ava naan tumra kdo pbuwk ren paurina Nei kihii. 21Pdainu asuwn, Nei mkipthlei rangki miilai ava khutta tebol tun Neiji ka am ṭhi daatta. 22Mleija mdo reel dok dil kṭoiji Mii Chapa ava kchet; pdainu Nei mkipthlei miilai ava msuw kthi!” 23Ungta marlak inki ku ngi hava nong nga ktlo rang kida kdingi khat leh khatti karkhewl pṭhun lamda.

Klin sii Mlei thu Karteen

24Ungta mmaan thungki ku ngi klin siia kdingi karteen psuk lamda. 25Ungbi Mma ngi mhin inni theda, “Ktlok chati rekka mmaan tun tha kruwng rekki kinreelli nong mdo tlot, ungu mmaan leen rutan kthloi rek ava plap mdo dit in. 26Pdainu naan thungva anto lua kurthuwk me; anto kchang naan arlakki klin sii va kmo lulu, ungta ber ksu miiva sok klou khat lulu ngi ka amra. 27Mleija klin sii rang nga kmaal ra kuk ong khat ava rangmo, sok klou khat ava rang? Tebol hin kmaal ra ku ong ava pme mo? Pdainu Neia naan arlakki sok klou khatti ka am ping.

28Naanna Nei kjat kakham thu kdo parteel ṭhi jesang in pti; 29Ungta Kpah ngi Nei kihin Kruwngpaam khat mdo tsil na ava lulu ngi, 30Nei Ku kruwngpaam tha naanni ado chaak ado neek nraan, Isowr ku onna leen ku ongda Isreel rek sumkhur sowmlei knii ado kṭewl nraan, Neije naan hin Neiki Kruwngpaam ava aksil naanna.

Pitor do Mat ra Jisu Paupurto

31“Simon, Simon, asuw, nang nga kehu kupkhui lulu ado tupkhui nra, seitaan ni atarngai daatta. 32Pdainu ado rin chaak thungki msoi ma nra, Neiji atumra kṭhil chaakka, plungren ahur diltha, a u anao rek ru aptan pik cha.” 33Ungta mma ngi Mhin theda, “Mukpu, nea Nah tu kilṭhi ngi rowng inn thung daat don kdiyou kpha thung ngi kurthlong kcha ping.” 34Mma ngi theda, “Neiji ahin kthea, Pitor nang ngi Neia vei kdum at mat du khim khai, snii va harkhuwng ngi khuwng nime.”

Sumkhao, Thongja, ungu Kaangksaang

35Ungta Jisu ngi mhin inni theda, “Neiji naan ava sumkhao, thongja ungu khukok rek ktaakki aksii in mpha thu kvaat do ka am ngaal mo?” Mmaanni theda, “Kvaat do khat lee ame.” 36Mma ngi mhin inni theda, “Pdainu tunva sumkhao kthloi miiva ahur so, anto lulu ngi thongja ruk, ungta kaangksaang kthloi kma mii rukva mdo mna ajur sora khat aren chaso. 37Mleija Neiji ahin thaanni kthea, hava Laaika ava Nei kthung ngi kurkhum kat ra, ‘Ungta Mma ava pnu ktong rektu ktai kthenra’; mleija Nei ki mlei thung ngi mdo kjit dokka kurkhum sliia.” 38Ungta mmaanni theda, “Asuw, Mukpu, hava thu kaangksaang rek knii ka amma.” Ungbi Mma ngi mhin inni theda, “Kokhoppa.”

Jisu ngi Kruwn Lown tha mdo ṭhil chaak

39Ungta Mma ngi arvan thuwkda, kruwn lown tha Mma nopa ngi hangda; ungta msiikhu rekki mdil hanṭoi lamda. 40Ungu Mma ngi mun ava mhanphaak thungta, mhin inni theda, “Kepthleem thu atlaak ma nraan aṭhil chaan.” 41Ungta lung tipthii pang karlatti mmaan hinki vakursown da, pkhuppi tardiil da ṭhil chda. 42“Apah Nah plung bin mkurthutta, Nei kihin ki hava tong ava mhailo pik cha, anto daat joso Nei kdo bin ava rang pme, pdainu Nah poi bin daat so.” 43Waantamsii kandang ngi Mhin rutan pii chda. 44Ungu Mma ngi plung kurthlutti kja reenni mṭhil chaak thungta, mparthlen ava hii kchai lulu ngi dul leenni chaida. 45Ungta Mma ngi mdo ṭhil chaak thungki rip da, siikhu rek hinni arvang da, ungbi kja langlang ngi ki iip daatti pha lamda. 46Ungbi Mma ngi mhin inni theda, “Talu leiji ki iip daat in ptida? Naanni kepthleem thu atlaak ma nraan kardel inra aṭhil chaan.”

Jisu mdo Kjown in

47Ungta Mma ngi mpau slii arlaanni, sowm lei knii thungki khat, Juda tdit mma ngi bersu da, miiluwngpa ṭhida arva da; 48Kput rangki Jisu hin han naida, pdainu Jisu ngi mhin theda, “Juda, Mii Chapa ava put da parlaan pthi daat nmo?” 49Ungta Mma kuklop dok mii rekva kthuwk ra ava deida, mmaanni theda, “Mukpu, hava lea kaangksaang ngi sur in nimo?” 50Ungta marlak inki khatti thiimpu kparthaang knaa mchang ktongki sel bukda. 51Pdainu Jisu ngi theda, “Hava nowl maan!” Ungu maknaa ava kmeida pdam pikda. 52Ungta Jisu ngi karva rek thiimpu kinreel rek, Nowlam chukpu rek, kver rek mraal kpii ngi mhin inni theda, “Naanni namtrom hal chda kthleng lulu, kaangksaang leh kchung rek sin inti kthleng in ptimo? 53Nit kurnowlli luwbuk Inn thu Neiji aka amṭhiin mpha thu, naanni khut khiingda mukjowng maan ti. Pdainu hava naanki ṭhang ungu kjiing rutan.”

Pitor ri Jisu mdo Mat

54Ava dilli mmaanni kjowng lamda, thiimpu kparthaang inn tha ṭhi lamda. Leer khatti Pitor va mdil ṭoida; 55ungta mmaanni dulbuk ṭimmi mei pchok lamda ku ong lamda, marlak thaanni Pitor ruk ko ongda. 56Ungta mma ngi mei ar awng thung ngi mkon daat arlaanni, sra owr snu miilai khatti deida, ungbi mma ava suw rim thida theda, “Hava miilai rukka Mma doṭhi.” 57Pdainu mma ngi mat da, theda, “Snu, Mma ava neiji dei chliit maang.” 58Ungta ma ambongle ktlok khatti deida the nowlda “Nang rukka mmaan arlakki khat pti.” Pdainu Pitor ri theda, “Miilai, neia ava pmaang.” 59Ungta ṭhang khat arveel diltha, ktlok khat nowlli kdung theda, “Trinkma hava miilai rukka mmaan doṭhi munra; mleija mma rukka Galil mii khat.” 60Pdainu Pitor ri theda, “Miilai nah dothe slii ava neiji dei chliit maang.” Ungbi mma ngi mpau meek daat arlaanni, tun kat daatti harkhuwng ngi khuwngda. 61Ungbi Mukpu ngi mdil kinle da Pitor ra suwda. Ungta Mukpu ngi mhin tak heppi pauna mthe tdit Pitor ri bin phaak da, “Snii katti harkhuwng ngi mkhuwn dungi nangva vei kdum mro nimti.” 62Ungbi mma ngi duwn tha thuwkda mning ksiinni ṭap chda.

Jisua Pnii chaak lamda mdo Bun in

63Tunva Jisu kukjowng mii rekva pnii chaak lamda ungu bun chlamda. 64Mmaanni mmik kuhuwm lamda ungu paukhewl lamda, “Apurphuwng! Nah akipreija ku?” 65Ungta mmaanni mraal kpii ngi pau knempok the psuk lamda, ning er pau lo psuk lamda.

Jisua Karseel Lop Maiṭhuwmmi mdo ṭhiin

66Ungu khuw mvar thungta, mmaanni thiimpu kinreel rek, Nowlam chukpu rek, mii rekki kver rek, own purkuk lam thida, Jisua karseel lop hin ṭhilamda the lamda, 67“Nah Khrista akurthutta mhai the pik in.” Pdainu Mma ngi mhin inni theda, “Neiji athe pik jown ringva rin chni maan ti; 68ungu Neiji pau ajukhewl jown ringva marthawng nimaan ti. 69Pdainu tun ki kupṭhunni Mii Chapa ava Isowr rutan chang ktongtha ku kongra.” 70Ungbi mmaan mkheng ngi theda, “Ava mkurthuttu Nah Isowr Chapa ptimo?” Ungta Mma ngi mhin inni theda, “Naan dothe ava Nei ping.” 71Ungta mmaanni theda, “Arleek setti talu rinpaumin tathlaam raan? Mma ner katti mdo the ndak saanni taryaak sap inna.”

Currently Selected:

LUK 22: LAMKBSI

Highlight

Copy