MATHI 27

Jisua Pilat hin mdo Ṭhiin

1Ungta Jiingsun mpha mvee thungta, thiimpu kinreel rek leh mii rekki kver rek mkheng ngi Jisu mdo eayo nraan mraal pii lamda karseel lamda; 2Ungu mmaanni ktu lam thida, paam kpupa Pilat hin parlaan lamda.

Judas Diyo

3Ungta Mma kipthlei Judas ava ngi mraal ka am mkirdee thungta, mma ngi plung ren hur da ungu thiir sum som kdum ava thiimpu kinreel rek hin arhai sin pinle da, 4the da, “Neiji mraal ktaak hii kdo pthlei leiji pnu ktla im ping.” Ungu mmaanni theda, “Ava neen kleennu talu ksi rang da? Athi na ngi kursuw cha.” 5Ungta mma ngi thiir sum ava luwbuk Inn thu var pthii thida sun chda; ungu mthi na ngi kurhuwk you da. 6Pdainu thiimpu kinreel rekki thiir sum ava lou lam thida, the lamda, havalea hii man mkurthut leiji, sumbuwr thu tithiik ka Nowlam do rot ava pme.” 7Ava leiji mmaanni karseel lam thida, mal rek mdo alruwl nraan, bil khat ren nlamda. 8Ava ngi mlei kurthuwk da bil ava snii kpha thung ngi hii bil mdo dit. 9Ava dilli khulpu Jeremia ngi mdo the dok ava kurkhum da, mma ngi theda, “Ungta Isreel chapa rekki mdo thiik Mma man thiir sum som kdum ava lou lamda, 10Ungu Mukpu ngi nei kihin mdo tithe pik lulu ngi mmaanni uwm bil tummi pii lamda.”

Pilat ti Jisu Pau mdo Khewl

11Tunva Jisu ngi paam kpupa maiṭhuwm mi rip da, ungu paam kpupa ngi Mhin pau khewl da, “Nah Jehudia rek Kruwng pti mo?” Ungbi Jisu ngi theda, “Nah ado the ava Ping.” 12Pdainu thiimpu kinreel rek leh kver rekki mraal mpiik thungva Mma ngi arthawng sii me. 13Ava dilli Pilat ti Mhin theda, “Nah mraal akpii ngi mmaanni sakhi knempok mdo piik in ava aryaa mti mo?” 14Pdainu Mma ngi mhin inni pau khat lee arthawng me, ungu mraal mdo piik in khdaat ruk arthawng me; ava leiji paam kpupa ava kdung ngi ngak chda.

Jisua Kdiyou ra mdo Dit in

15Tunva paam kpupa va kurtuwl mii rek tummi mmaan do ngei miilai khat rowng inn thung ki mdo pthuw kcholu. 16Ungta mii mkheng do dee dok Barabas ava rowng inn thu ka am daat kurthuwk da. 17Ava leiji mmaanni mkurku in mpha thu, Pilat ti mhin inni theda, “Naan atum raan ni neiji ku kdo pthuw ra angei inna, Barabas rang mo, Khrista mdo dit Jisu rang?” 18Mleija mkheithe inni Mma ava mdo parlaan in tdit mma ngi deida. 19Ava daat kma, mma do kṭewl na longkhom leen mku on daat arlaanni, mnumeiji mhin pau hai pthla da, “Rinkindit Miilai ava hin nang ngi do khat lee ado tlot ro nime, mleija Mma tummi nea jaanklu kmer ri kdung kja cha ping.” 20Tunva thiimpu kinreel rek leh kver rekki Barabas ṭhil lamda ungu Jisu mdo aeyo nraan mii rek ksop lamda. 21Ungta paam kpupa ngi veikhat the nowl da, “Naan atum ra hava miilai knii thung ki ku kdo pthuw ra angei inna?” Ungbi mmaanni theda, “Barabas ra.” 22Ungbi Pilat ti mhin inni theda, “Ava mkurthuttu Khrista mdo dit Jisua neiva talu purlo nik di?” Mkheng inni the lamda, “Mma ava khros leen apthoi pthii.” 23Ungbi mma ngi theda, “Mma va talu kṭha kma mtlot da?” Pdainu mmaanni kheel set setti owng lamda, “Mma ava khros leen apthoi pthii.”

24Ava leiji do khat lee sii me, pdainu kutlur mupṭhunna tdit Pilat ti mdee thungta, kurtuwl mii rek maiṭhuwm mi dii louda mkhut alṭhu thida, theda, “Hava Miilai hii ava nea dei chmaang, adaksaa inni kursuw chaan.” 25Ungta mii rek mkheng ngi mhin arthawng da, “Mma hii ava neen kleen ungu knaole leenni jiam chaso!” 26Ava dilli mma ngi Barabas pthuw pik lamda, ungu Jisua khros leen mdo pthoi nraan parlaan pthii da. 27Ungta ava dilli paam kpupa ava rawlmii rekki Jisua lusang inn thu ṭhi lamda, ungu rawlmii lop mkheng ava Mma maiṭhuwm mi kurkuk lamda. 28Ungu mmaanni mbuw khowk pthii lam thida kning ngi ksen buw pihiil lamda, 29ungta mmaanni tirliing her lamda, mluw leen pkhum lamda, ungu mchang ktongki mkhut leen kchung khat psin lamda. Ungta Mmaiṭhuwm mi pkhup pi tardiil lamda pnii chaak da, the lamda, “Jehudia rek Kruwng roi ksotti ering cha!” 30Ungta mmaanni ptil kbailli pthot lamda, ungu mkhut leen ki kchung mmaanni lou lamda mluw tha prei chlam da. 31Ungta mmaanni mipnii chaak dok dil inni, kuknotti mbuw khowk pthii lamda, mdaksaa ki buw pihiil lamda, ungta khros leen mdo pthoi nraan hanṭhi lamda.

Jisua Khros leen mdo Pthoiin

32Mmaanni hanto mhai kurlo in thungta, Syrini ki mmiing Simon tdit miilai khat kurdut ṭhi lamda; hava mma hin khros mdo kdom Ṭhi nra pnam psuk lamda. 33Ungu Golgotha mdo dit mun khat mmaanni mhai phaak in thungta, (mlei ava luw ru kdimna mun) 34mmaanni kakhaa lang lang do khat ju tu purchuwm lamda Mhin pii lamda; pdainu Mma ngi mpartem thungta nee nuwm me. 35Ungta mmaanni khros leen pthoi lamda, ungu mdo mna ava pchel piik sut nlamda marlak inni them lamda; 36ava dilli ava tha ku ong lamda mmaanni sut pṭoi lamda. 37Ungta mluw thip leenni Mma raal kpii ngi hanto tpat khat thii lamda, “Hava Jehudia rek Kruwng Jisu.” 38Ungta kupru rek knii rukka Mma tu khros leen khatti mchang ktong tha khatti mlee ktong tha pthoi kthen lamda. 39Ungta mbe ngi kurlon mii rekki mluw in hai lamda, ning er plo psuk lamda, 40the lamda, “Luwbuk Inn ea krep thida nii kdum daat thung ngi ksa rang lo, kartlan cha! Nah Isowr Chapa akurthutta, khros leen ki arjung ṭumlo.” 41Anto hep daatti thiimpu kinreel rek ungu Nowlam chukpu rek ungta kver rekki Mma ava pnii chaak lamda, the lamda, 42“Mii murson na ktlan pik thida; mdaksaa ava kartlan pchaangme. Mma Isreel rek Kruwng; tun tunni Mma ngi khros leenki murjun ṭumbi,nenni trin chaak raan. 43Mma ngi Isowr mdo rin chaak; Mma ava Isowrri mbin pikta tun tunni Mma ngi aktlan pik chaso; mleija, ‘Neia Isowr Chapa ping,’ dida Mma ngi mdo the.” 44Ungta Mma tu khros leen mdo pthoi kthen kupru rek rukva anto lulu ngi the psuk lamda.

Jisu Diyo

45Ungta tunva ṭhang truk thungki ngi ṭhang tku kpha dekki mpaam mkheng nga pum jiing ngi jiing chda. 46Ungta ṭhang tku arveelli Jisu ngi krowl kparyaa ngi owng da, “Eli, Eli, lama sabathani?” Mlei ava, “Neiki Isowr, Neiki Isowr, talu lei Neia atmaak pthiia?” 47Ungbi mbe ngi krip daat rek mii angṭhe ngi aryaa da the lamda, “Hava Miilai va Elijah mo ownna.” 48Ungta mmaan thungki khatti va chen tengda buwphown louda, ju kdor thu puhuwm thida, kchung leen daar da, mdo neek ra han piida. 49Pdainu murson rekki theda, “Arda khot, Elijah ngi arjung ṭumda kaktlan sik rangmo suw lap in che.” 50Ungta Jisu ngi mvei knit na krowl kparyaa ngi owng thida mṭut na ki tdaal ṭen chda.

51Ungta asuw in, luwbuk Inn thungki buwkhaar ava karthak ki ngi kurdu kpha dekki karjen chda; ungu dulti kunchun da, ungta lung kui da; 52thlaan rek ruk kparvang da, kintiing mii rek kdiyou dok knempok ava ring kardelda; 53ungta thlaan rek thungki kthuwk mii rek ava Mma ngi mrin karheel diltha,kchiir khuwpii tha mmaanni hang lamda, mii knempok hin ktardet lamda. 54Ungta rawlmii ki klin leh mma miiṭhi rekki, Jisua msut pṭoi in thungta, kthuwk nong ava leh ringnaang kthuwk ava dei lamda, ungbi mmaanna kdung reenni ngak chlam da, ungu the lamda, “Kinditti, hava Miilai ja Isowr Chapa kat thide!”

55Ungta ava thung ngi Galil ki ngi Jisu dil ṭoida Mhin sok klo cha, snu rek knempok ruk va, leer khatti sut pṭoi chlam da; 56mmaan arlakki ava Magdaleni Mery, Jeems leh Joseph nuh Mery, ungta Jebedi chapa rek nuh am lamda.

Jisu mdo Alruwl

57Ungu khuw mjiin thungta, Arimathia ki mmiing Joseph tdit suwang pa khat ungu siikhu khat kurthuwk, mma ava arhang da. 58Mma ngi Pilat hin vada, Jisu kluwng nga ṭhil chda. Ava dilli Pilat ti mma hin mdo piik nlamra pau pṭum da. 59Ungta Joseph pi mukluwng ava louda, ktarnaal dang ngi kartleu deek plaa buw khat louda, 60ungta mma mdaksaa thlaan ra lung kreu da mdo vu ren dang ava thung ngi alruwl chda; ungta thlaan thurngot ava lung klin khatti arkam thida sunda. 61Ungta Magdaleni Mery leh Mery murson rek va thlaan tarngai lamda ava thu ku ong daat lamda.

Thlaan mdo Seel psuk in

62Mupduk nii ditta mdo purchuwl naan ava dil tha, thiimpu kinreel rek leh pharisi rekki, Pilat maiṭhuwm mi kurkuk lamda 63ungu the lamda, “Ocha, leinei pa ngi mrin daat mpha thu, ‘Nii kdum dil tha Neiji ring kardel nowl nik di,’ dida mdo the ava neenni bi phaak innu. 64Ava leiji, nii kdum mvee dok du khim khai thlaan ava mdo seel psuk lam nra pau apṭum, anto mkurthut mabi, msiikhu rekki va da pru dok lam thi donle, ‘Mma ava kdiyou dok thungki kring kardella,’ di lam don mii rek hin ksong lamra, ungu ru kri ki hinva mṭut na thang ki ngi kheel sii ra.” 65Pilat ti mhin inni theda, “Naanni kseel rangki rawlmii rek aṭhiin ra; vaan, ado pchaan ja inni aseel psuk chaan.” 66Ava leiji mmaanni va lamda, thlaan ava kbii nam lamda klu ngi rung lamda.

Currently Selected:

MATHI 27: LAMKBSI

Highlight

Copy