Zãa 13

Jesu í wiɛ isɛi mɔcɔɛ ŋa

1Ajɔ iyi bii iju í má á jɛ jingaui Iku ku kuau í to. Nɔ Jesu í mà iyi waatii nŋu í to mbɛ nŋu ku nɛ hai andunya nŋu ku bɔ bi Baai nŋu. Hai sinte hee ku baa nsɛi í nɛ kubii inɛɛ ŋa si andunya, nɔ kubi nŋa iyi í nɛu í bɔòi hee kɔɔ.

2Ŋɔi Jesu do mɔcɔɛ ŋa à waa jɛ ajɔ. Wee Seetam í tale si Zudasi Isikariɔti amai Simɔɔu ku zambaɛ tã. 3Jesu takaɛ í mà iyi Ilaaɔ̃ Baaba í daa nŋu mii fei si awɔ, í nɔ í mà iyi nŋu í naai hai bi Ilaaɔ̃ nɔ nŋu wa nyi bɛ má. 4Ŋɔi í dede hai bi ku jɛu í bɔ kumbooɛ í jilɔɔ, nɔ í so acɔ gɔ í dĩ si kpakaɛ. 5Ŋɔi í bu inyi si jɛɛ wa wiɛò kutɛi mɔcɔɛ ŋa nɔ wa gbãa do acɔ iyi í dĩ si kpakaɛu. 6Iyi í to si Simɔɔ Piɛɛ ŋɔi Piɛɛ í beeɛ í ni, Lafɛ̃ɛ, awɔi aa wiɛ kutɛm? 7Nɔ Jesu í jɛaa í ni, i kù mà mii iyi ǹ wa n ce nsɛi, amma bii í kɔ̃ɔsi aa na i mà. 8Ŋɔi Piɛɛ í ni, aawo, awɔ si aa wiɛm kutɛm pai. Ŋɔi Jesu í sɔ̃ɔ í ni, bii n kù wiɛ kutɛɛ i kaa jɛ inɛm má. 9Ŋɔi Simɔɔ Piɛɛ í ni, debɛi Lafɛ̃ɛ, kù jɛ kutɛm nŋu akãi aa wiɛ mɛɛ, wiɛ awɔm do irim fei gbakã. 10Ŋɔi Jesu í sɔ̃ɔ í ni, inɛ iyi í wɛ tã kù nɛ bukaatai ku wɛ má í gbe isɛɛ ŋa ku ba ku maaju mam mam. Iŋɛ ì maaju, amma kù jɛ iŋɛ fei. 11Wee Jesu í mà inɛ iyi á zamba nŋu tã, ŋɔi í jɔ̀ í ni kù jɛ aŋa feii à maaju.

12Iyi í wiɛ kutɛ nŋa ŋa í tã, ŋɔi í so kumbooɛ í dasi, nɔ í nyi agbɛɛ má í bɛi í bee ŋa í ni, ì mà yaasei icɛ iyi ǹ ce nŋɛu bɛ ŋa? 13Ì ya maa kpem Mɛɛtu do Lafɛ̃ɛ ŋa. Ntɔi ì waa fɔ ŋa, domi bɛɛbɛi ǹ jɛ. 14To, bii amu iyi ǹ jɛ Lafɛ̃ɛ do Mɛɛtu nŋɛ ǹ wiɛ kutɛ nŋɛ ŋa, í sĩa iŋɛ mɔ i ya wiɛ kutɛi njɛ ŋa. 15Yaase jiidai ǹ nyisi ŋɛ bɛ ku ba iŋɛ mɔ i ya cea njɛ bɛi ǹ ce nŋɛ. 16Ntɔ ntɔ ǹ wa n sɔ̃ ŋɛi, woo ce icɛ ci ya la ku re inɛ ngboɛ. Bɛɛbɛ mɔi inɛ iyi à bɛ ci ya la ku re inɛ iyi í bɔɔ. 17Nsɛi wee ì mà yaasei iyi ihɛ̃ ŋa. Bii ì waa coo ŋa, aa nɛ inɔ didɔ̃ ŋa.

18Kù jɛ iŋɛ feii ǹ wa n fãa. Ǹ mà inɛ ŋa iyi ǹ cicai. Amma kù nɛ bɛi á ce iyi kukɔi idei Ilaaɔ̃ kù kɔ̃. Kukɔu í ni, inɛ iyi wa bam ku jɛ ajɔ, nŋui í sinda í jɛ mbɛɛm.#13:18 Cɔ Iri ku kɔ̃ 41:9. 19Hai nsɛi ǹ wa n sɔ̃ ŋɛi hee ide ŋau ku maa ce ku ba bii í na í ce i dasi naanɛ ŋa iyi amui ǹ jɛ inɛ iyi ǹ ni ǹ jɛu. 20Ntɔ ntɔ ǹ wa n sɔ̃ ŋɛi, inɛ iyi í gba inɛ iyi ǹ bɛ, amui í gba. Nɔ inɛ iyi í gbam, inɛ iyi í bɛm wai í gba.

Jesu wa fɔ iyi Zudasi á zamba nŋu

(Cɔ Matie 26:20-25; Maaku 14:17-21; Luku 22:21-23)

21Iyi Jesu í fɔ bɛɛbɛ í tã, ŋɔi inɔɛ í fɔ kaa kaa. Ŋɔi í sɔ̃ ŋa sãa sãa í ni, ntɔ ntɔ an sɔ̃ ŋɛ, inɛ akã nŋɛi á zambam. 22Ŋɔi mɔcɔ ŋau à waa cɔ njɛ domi a kù mà inɛ iyi wa fãa. 23Wee inɛ akã nŋa, inɛ iyi Jesu í bi jiida jiidau, í wa kɔkɔi Jesu bɛ. 24Ŋɔi Simɔɔ Piɛɛ í ceaa nyinda do awɔ ku bee Jesu yooi wa fãa. 25Ŋɔi mɔcɔ iyi í wa kɔkɔɛu í beeɛ í ni, Lafɛ̃ɛ, yooi ì waa fãa. 26Ŋɔi Jesu í jɛaa í ni, an bu pɛ̃ɛ nɔ n gũsi ayɛ, inɛ iyi ǹ na, lafɛ̃ɛi. Ŋɔi í bu pɛ̃ɛu í na Zudasi amai Simɔɔ Isikariɔti. 27Hai waati iyi Zudasi í gba pɛ̃ɛu gbakã Seetam í lɔ siɛi. Ŋɔi Jesu í sɔ̃ɔ í ni, mii iyi aa ce, coo do njuma.

28Amma si inɔ nŋa inɛ gɔ kù mà mii iyi í jɔ̀ í sɔ̃ɔ bɛɛbɛ. 29Si bɛi Zudasii wa mu bɔgɔi fia nŋau, ŋɔi í jɔ̀ inɛ gɔ ŋa à tamaa Jesu í ni koo ra ngɔgɔ wa iyi aŋa aa jɛò jingaui walakɔ wa sɔ̃ɔ ku mua ilu are ŋa fiai. 30Iyi Zudasi í gba pɛ̃ɛu í jɛ gbakã ŋɔi í fita. Wee í ko idũ í dũ.

Wooda titɔ̃

31Iyi Zudasi í fita ŋɔi Jesu í ni, bɛbɛii inɛ ŋa aa yɛ amboei amu Amai Amanɛ, nɔ aa yɛ ti Ilaaɔ̃ mɔ na irim. 32Si bɛi inɛ ŋa aa yɛ amboei Ilaaɔ̃ na irim, nŋu takaɛ á jɔ̀ a yɛ ti amu mɔ. Á coo mɔm nii kaa kpɛ. 33Iŋɛ baakɔɔm ŋa, waati keekei í gbe iyi an wɛɛ do iŋɛ, nɔ si anyiɛ aa na i maa dɛdɛɛm ŋa. Amma ide iyi ǹ sɔ̃ Zuifu ŋau nŋui ǹ wa n sɔ̃ iŋɛ mɔ bɛ nsɛi. I kaa yɔkɔ i bɔ bii ǹ wa n bɔ ŋa. 34Wooda titɔ̃ iyi ǹ wa n jilɛ nŋɛ wee, i bi njɛ ŋa. Si bɛi ǹ bi ŋɛ, iŋɛ mɔ i bi njɛ ŋa. 35Bii ì bi njɛ ŋa, inɛ fei á mà iyi ì jɛ mɔcɔm ŋa.

Jesu wa fɔ iyi Piɛɛ á jã ku ni nŋu kù màa

36Ŋɔi Simɔɔ Piɛɛ í bee Jesu í ni, iwoi ì waa bɔ Lafɛ̃ɛ. Ŋɔi Jesu í jɛaa í ni, bii ǹ wa n bɔ i kaa yɔkɔ i toom bɛ nsɛi, amma bii í kɔ̃ɔsi aa toom wa bɛ. 37Ŋɔi Piɛɛ í beeɛ í ni, Lafɛ̃ɛ, bɛirei í ce n kaa n yɔkɔ n tooɛ nsɛi. Ǹ tã sɔɔlu n na kuwɛɛm na iriɛ. 38Ŋɔi Jesu í jɛaa í ni, ì tã sɔɔlu i na kuwɛɛɛ na irim do ntɔ? Ntɔ ntɔ ǹ wa n sɔ̃ɛi, hee ajɛɛ ku maa kɔ aa jã isɛ gbɛɛta i ni i kù màm.

Currently Selected:

Zãa 13: MKL

Highlight

Copy