Luku 24

Kujĩi Jesu hai si balɛ

(Cɔ Matie 28:1-10; Maaku 16:1-8; Zãa 20:1-10)

1Ajɔ amaazuma daadaakɔu inaabo ŋau à bɔ bi balɛu à waa mu ikpo nŋa ŋa do tuae jiida iyi à ce sɔɔluɛu. 2Ŋɔi à ba kutau í bimbili hai andɛi balɛu. 3Ŋɔi à lɔ inɔ balɛu amma a kù yɛ ikui Jesu bɛ. 4Si bɛi à waa leekĩ do bitiu ŋɔi amanɛ minji gɔ ŋa à naa si ŋa à waa dasi ibɔ ku daana gɔ ŋa. 5Ŋɔi inaabo ŋau à waa ce njo nɔ à kɔmba iri nŋa ilɛ, nɔ inɛ ŋau à sɔ̃ ŋa à ni, na mii í ce ì waa dɛdɛ ilu hunde bi kuwai iku ŋa. 6Kù wa ihɛ̃ má, njɛ í jĩ hai si balɛ. I ye gigii ide iyi í sɔ̃ ŋɛ si waati iyi í wa Galilee. 7Í ni kù nɛ bɛi á ce iyi a kù mu nŋu Amai Amanɛ a kù dasi nŋu si awɔi ilu dulum ŋa. Í ni aa kpakpa nŋu si jĩi ku gaau, amma nŋu á jĩ má si ajɔ mɛɛtasia.

8Ŋɔi inaabo ŋau à ye gigii idei Jesuu. 9Ŋɔi à sinda à nɛ hai bi balɛu. Nɔ bɛi mii ŋau í ce fei à koo à sisia mɔcɔ maatakã ŋau do inɛ ŋa iyi à gbeu fei. 10Maari inɛi Madala do Zoana do Maari iyei Zaaki do inaabo gɔ ŋa má, aŋai à koo à sɔ̃ woo bɛ ŋau ideu. 11Amma ideu wa jɛ nŋai bɛi ara, a kù dasi idei inaabo ŋau naanɛ. [ 12Do nŋu fei Piɛɛ í dede í sɛi í bɔ bi balɛu. Iyi í to í bate í cɔ inɔ balɛu, amma acɔ iyi à woo dou nŋu akãi í yɛ wa timbi ilɛ, nɔ í sinda í nyi kpasɛ̃ do biti.]

Jesu í tusɛa mɔcɔ minji gɔ ŋa araɛ

(Cɔ Maaku 16:12-13)

13Si ajɔ akãu mɔcɔ minji gɔ ŋa à waa bɔ ilu gɔ iyi à ya kpe Emayusi. Zakai kiloo maatakãi í jĩò Zeruzalɛmu. 14À waa nya faajii mii ŋa iyi í ceu fei à waa nɛò. 15Iyi à wasi ku nya faajii ideu, ŋɔi Jesu takaɛ í sɛkɛɛ si ŋa aŋaò ŋa à waa nɛ ajɔ. 16À yɔɔ amma ngɔgɔ í ganji ŋa a màa. 17Nɔ í bee ŋa í ni, ide yoomai ì fɔ ì waa nɛò bɛɛbɛ ŋa. Ŋɔi à leekĩ à bɛjɛ waju do inɔ kufɔ. 18Inɛ akã iyi à ya kpe Keleopa í ni, bii kù jɛ awɔ akã baasi, yooi í wa si Zeruzalɛmu iyi kù mà mii iyi í ce si ajɔ gbeejiu ihɛ̃. 19Ŋɔi í bee ŋa í ni, mii í ce.

Ŋɔi à ni, idei Jesu inɛi Nazarɛtiu ni. Mɔkɔu walii ilu gbugbãi si icɛ do si ide ku fɔ si wajui Ilaaɔ̃ do si wajui amanɛ ŋa fei. 20Ŋɔi inɛ ngboi woo weei Ilaaɔ̃ ŋa do inɛ ngbo nwa ŋa à daa inɛ ŋa si awɔ à yɛ taaleɛ à kpakpaɛ si jĩi à kpaa. 21À waa tamaa nŋui á faaba inɛi Izirɛli ŋa wo, amma ajɔ mɛɛtaɛi ihɛ̃ iyi ideu í ce wa tã. 22Si anyii nŋu, inaabo gɔ ŋa si inɔ nwa à naa à gidi wa do ideu má. Inaabo ŋau à dede daadaakɔ à bɔ bi balɛu. 23Iyi à to nɔ a kù yɛ ikui Jesuu bɛ. Ŋɔi à naa à sɔ̃ wa à ni amaleka ŋa à naa si aŋa nɔ à sɔ̃ aŋa à ni í jĩ má. 24Ŋɔi inɛ gɔ ŋa hai si inɔ nwa à bɔ bi balɛu nɔ à koo à ba mii ŋau í cei dee dee si bɛi inaabo ŋau à sɔ̃ wau, amma a kù yɛ nŋu takaɛ.

25Ŋɔi Jesu í sɔ̃ ŋa í ni, iŋɛ hai nɛ bisi ŋai, i ci ya dasi ide iyi walii ŋa à fɔ fei naanɛ gbãa gbãa ŋa. 26Kù nɛ bɛi á ce iyi inɛ iyi Ilaaɔ̃ í cicau kù yɛ ijuukpã, inɛ ŋa a bɛi a yɛ amboeɛ. 27Ŋɔi í sisi nŋa ide iyi à fɔ si kukɔi idei Ilaaɔ̃ fei si gãmɛi nŋu takaɛ. Í sintiɛi hai si tiai Moizi ŋa do ti walii ŋau fei.

28Waati iyi à maai si ilu bii à waa bɔu, ŋɔi Jesu takaɛ í ce bɛi inɛ iyi wa bɔ waju. 29Ŋɔi à mante manteɛ à ni ku gbe bi aŋa domi alɛ í lɛ tã nɔ inunu wa lɔ. Ŋɔi í sinda wa í naa í gbe bi tu ŋa bɛ. 30Ŋɔi aŋaò ŋa à waa jɛ. Waati iyi à waa jɛu ŋɔi í so pɛ̃ɛ í ce si kutɔɔ í bɛi í bububuɛ nɔ í na ŋa. 31Waati bɛɛbɛi iju nŋa í cĩ bɛi nɔ à màa. Amma tengi bɛ má gbakã à kuaɛ. 32Nɔ à sɔ̃ njɛ à waa ni, baa si waati iyi wa sɔ̃ wa idei kukɔi Ilaaɔ̃u hai si kpãau wa inɔ nwa kù tũ de.

33Nɔ aŋa mɔ à dede gbakã à nɛ ikpa Zeruzalɛmu. Iyi à to bɛ à koo à ba mɔcɔ maatakã ŋau à waa tɔtɔɔ do inɛ gɔ ŋa. 34Ŋɔi inɛ ŋa iyi à tɔtɔɔ ŋau à waa sɔ̃ amanɛ minji ŋau mɔ à ni, Lafɛ̃ɛ í jĩi hai si balɛ ntɔ ntɔ, nɔ í nyisi araɛ bi Simɔɔ. 35Nɔ amanɛ minji ŋau mɔ à sisi nŋa mii iyi í ba aŋa si kpãa do bɛi aŋa à mà Jesu si waati iyi wa bu pɛ̃ɛu.

Jesu í tusɛa mɔcɔ maatakã ŋau araɛ

(Cɔ Matie 28:16-20; Maaku 16:14-18; Zãa 20:19-23; Woo bɛ ŋa 1:6-8)

36Iyi à wasi ideu ku fɔ bɛɛbɛ, ŋɔi nŋu takaɛ í faata wa si anini nŋa [nɔ í ni, Ilaaɔ̃ ku mu nŋɛ laakai ku sũ.] 37Ŋɔi njo í mu ŋa, zigi nŋa í da. À tamaa bɛi zĩii. 38Ŋɔi í bee ŋa í ni, mii í ce ì waa biti ŋa. Na mii í ce dimii lasabuu ihɛ̃ í wa si idɔ nŋɛ. 39I cɔ awɔm do isɛm ŋa. Amui, i lum i cɔ ŋa. Zĩii ci ya nɛ ara do kũkũ si bɛi ì waa yɛm ŋau ihɛ̃ ŋa. [ 40Iyi í fɔ bɛɛbɛ í tã nɔ í nyisi ŋa awɔɛ do isɛɛ ŋa.] 41Ŋɔi inɔ didɔ̃ nŋa í jɔ̀ a kù dasi naanɛ gbãa gbãa nɔ à wa si biti nla nla, ŋɔi í jɔ̀ í bee ŋa í ni, i kù nɛ mii ku jɛ gɔ ihɛ̃ ŋa? 42Ŋɔi à nya cɛ̃ɛ ku banda akã à naa. 43Nɔ í gba í ŋɔɔ si waju nŋa. 44Ŋɔi í ye ŋa gigi í ni, ide ŋa iyi ǹ sɔ̃ ŋɛu mbɛ si waati iyi ǹ wa inɔ nŋɛ wo. Ǹ tako ǹ sɔ̃ ŋɛ wo ǹ ni mii ŋa iyi à kɔ na irim si tiai woodai Moizi ŋa do si ti walii ŋau do si iri ku kɔ̃i Davidi ŋau kù nɛ bɛi á ce iyi kù ce.

45Ŋɔi í mu nŋa laakai jiida ku ba a gbɔ yaasei kukɔi idei Ilaaɔ̃u. 46Nɔ í sɔ̃ ŋa í ni, bɛɛbɛi à kɔɔ à ni amu iyi Ilaaɔ̃ í cica an yɛ ijuukpã. Aa kpam, amma an jĩ hai si balɛ si ajɔ mɛɛtasia. 47Nɔ aa waazo do irim si dimi fei, aa sintii hai Zeruzalɛmu. Aa waazo a kpe inɛ ŋa a kpaasi idɔ nɔ Ilaaɔ̃ ku kpa idei dulum du ŋa. 48Iŋɛi aa jɛ sɛɛdai ide ŋau bɛ fei ŋa. 49Nɔ an samba nŋɛ mii iyi Baam í wã ŋɛ dou wa. Amma si iluu ihɛ̃i aa maa wa ŋa hee gbugbãi Ilaaɔ̃ ku naa si ŋɛ wa.

Jesu í nyi kɔkɔi Ilaaɔ̃ má

(Cɔ Maaku 16:19-20; Woo bɛ ŋa 1:9-11)

50Ŋɔi Jesu í gbã mɔcɔɛ ŋau í fitaò ŋa hai inɔ iluu. Nɔ í bɔò ŋa hee ikpa Betani, nɔ í wu awɔ lele í wee nŋa. 51Waati iyi wa wee nŋau, ŋɔi í sɛkɛɛ hai bi tu ŋa nɔ í so araɛ í nɛ lele. 52Aŋa mɔ iyi à gulɛ à tɔɔɛ ŋɔi à nyi ikpa Zeruzalɛmu do inɔ didɔ̃ nla nla. 53Nɔ kpasɛ̃i Ilaaɔ̃ bɛi à ya maa wa waati kãma fei a maa saabu Ilaaɔ̃.

Currently Selected:

Luku 24: MKL

Highlight

Copy