LUK 10
10
Jesu ing Somsarii Ariinii ae Achiir
1Jesu ing reentaang achongthang mee Somsarii ariinii aechu iteerka ama ing siniivachii khuw-ruung chaap tingche, vokhehkho aphamsiir tingche mee ynniinii inche maen ing achiirpae. 2#Met 9.37,38Changlae eningna Jesu ing ariir, “Ikuumfhuw ruwrae ruungpakna, changvakonchu kuumvachii mee tuumpakna; chu-khaenache ruwrae tingche nong tuvachii mee ichiirnii khaena Aafhuw ningtingche thamsaruw. 3#Met 10.16Nenuw nema taarnuwna siruw! Imi ae kaartingche Jaoti vaangkhe ki ing kachiirnahchuw, 4Seerthuung chimahruw, thuungfhuw ivamahruw, vokhehkho kheerkhaang reenmahruw amanche lamna achuw tikho chong buwhmahruw. 5Nenuw ing eensung nenvaruwhrae amaensana idaechu hava eensungne omlasii taruw. 6Ama eensung nache idae ing ipaar amanden mee omnave neningtanii idaechu aningnache omvaata, omahnave neningting athar hunganrirasiing. 7#1 Kor 9.14; 1 Tim 5.18Enuw ing ympeeh vakhaechu saruw, inruw, vokhehkho amanache nenuw ongruw, nong itu meechu ruthamen iphapham suwhna; yngkheh yngkheh ting hungruwh varuwh tumahruw. 8Nenuw ing khuwruung nache nenvaruwhrae ihebariim ae nave, nemaana ensiih vakhae thaeminchu saruw; 9Amanache ina mee omnave mandam nuwna taruw, ‘Thangnang iruwngpaamchu neningnache yn-neengsa.’ 10#Nong 13.51Changvakonchu nenuw ing khuwruung nache nenvaruwh raenche enuw ing ihebariimmah ae nave, lam nache sinuwna taruw, 11#Met 10.7-14; Mk 6.8-11; Luk 9.3-5‘Nentaklina kenrumah chuwchu asaarkhii omnii ing neng khuwruung tanii kengkhina pirkhuwh ikah vakhae kembahuwnah; changvakonchu nenuw ing havi manghuwruw, Thangnang iruwng-paam neningna ynneengsa ichii chuve eningna riirruw.’ ” 12#Met 11.24; Met 10.15Ki ing neningna kariirnah, vajeer inii nache ama khuwruungchu Sodom kha athiseh ing ningchuwhnii phavaata!
Thacha omah Khuwruung
(Met 11.20-24)
13Korazin nakhaena ijaniisapa! Betsaida nakhaena ijaniisapa! Nen-taklina katu kari laetho vakhae chaap i Taire re Sidon khuwna katu vanave, enuw ing bora asii niiae naka, rungvuwh taklina ong ae naka, vokhehkho kembarungriir keng-huungva ichii mandangva enchiichu. 14Chukhaenache vajeer aanturaenche nentaklinakhe Taire re Sidon kha athi ing ijachaam vaata. 15Amanche Kaparnaum, nangcha thangbaen phanii ing ynruung saningka nachiiva? Nangchuve longkong ipha ing bukva nata.
16 #
Met 10.40; Mk 9.37; Luk 9.48; Jhn 13.20 Jesu ing asebok ae ningna ariir, “Nenchong arungae meechu kachong arungaeva; amanche nenuwchu ynrumah mee aechu ynjenchiir Thang-nang chu enrumahva.”
Somsarii ariinii aeng Hunganri ae
17Atii somsarii ariinii ae ing rotha-rohpak ing hunganri aeka enriir, “Aafhuw, naruming nache isamah umlae aerap ingkho kenchongriir derna ongnae.” 18Jesu ing eningna abasang, “Thangbaen tanii tenlungpa chem ynleh vaangkhe Umlae ijungbuw kamu. 19Enruw, nenuw ing baruwr ae, amanche rungmanchiih ae taklina nenchanii chehnii vokhehkho ynjeehnii ae ruwreng aangkhenglaang taklina nenchehnii ruwreng ki ing neningna kapeehpachuw; amanche ynchiitanga ingkho nenuwchu imansuhcheh mahnii. 20Changvakonchu laetha aeng nenderna ongnae ichiine nenrotha rohmah rasiing; thangbaen nache nenruming ynziihsa ichii khaenache nenrotha manrohruw.”
Jesu Rotha Iroh
(Met 11.25-27; 13.16-17)
21Apha ichiinache Jesu ing ynthiing laetha ajaarna arotha irohpak ing ariir, “Thangbaen vokhehkho laaruw paam Aafhuw apa nangchu kamanpahsah nahchii, nang ing hava vakhae i ising ae ningna vokhehkho amanghuw ae ningnache thuurchiika amanche naeduung ae ningna namandangpa, chumna apa, havi nang ing namanden sahrem chuva. 22#Jhn 3.35; Jhn 10.15Hava vakhae i kapa ing kaningna ymmansirpa, chukhaenache ampa ing mahnaka asapa chu achuwva ichiichu achuw ingkho manghuwmah, amanche asapa inche achuw yngkheh ningna mandang ningka achii chumah naka ampa chu achuwva ichiichu achuw ingkho manghuwmah.” 23Aanuwnache Jesu ing asebok ae ningting vaanlehka ynruwhjaeh ing ariir, “Nenuw ing nemuchu emik ing imu empha enuw-chu bor aphapae! 24Ki ing neningna kariirnah, amachuve jaephar ae vokhehkho iruwng aenche nenuw ing nemu ae i munungka enchii muchehmah ae, amanche nenuw ing nensii havi siinungka ta ae khang nakho siichehmah ae.”
Isa Samaria mee taklina Ynghuwnii
25 #
Met 22.35-40; Mk 12.28-34 Enruw, achuw mee yngkheh vajeer tunii amanghuw ama inche Jesu chu chaang enkata taka ariir, “Oja, ki ing ynchiikha tuningka ichen naemah iringnii phava kachiiva?”
26Jesu ing aningna ariir, “Vajeer chonghak nacha ynchii ynziihna? Nang ynsaangkhe napa?”
27Ama ing abasang, “Nang ing naafhuw Thangnang chu nabarungriir aangkheng ing, nalaetha aangkheng ing vokhehkho naruwreng aangkheng inche naning mansiihva nachiiva; amanche naveenchaang aechu natak-sah naning namansiih vaangkhe naning mansiihva nachiiva.”
28Jesu ing abasang, “Nang ichum ing nabasangsa; havi tura, amanache nang ringvaanta.”
29Changvakonchu ama ing ichum ymbusaka Jesu ningna ariir, “Sakna, changvakonchu achuwa kaveen-chaangchu?”
30Jesu ing abasang, “Achuw yng-kheh mee ing Jerusalem na ing Jeriko ting ajungsiraenche lamruw mee aethoh yntuwhsa, amana apeehchu ripeeh aeka vokhehkho bin aeka thikvachii ing emahpa. 31Atii jinge suwhsa amachuve, jaethiim yngkheh inche ama lam nache hungsisa. Changvakonchu ama ing amutah nache reentaang yngkheh lamting repka sisa. 32Amavaangche Levi mee yngkheh ingkho lamchu ahenjiitah nache muka lam yngkheting areppa. 33Changvakonchu Samaria mee yngkheh lamkhii isi inche jenphaka amutah nache inempak aningchu amansiihpa, 34chutahnache apaang veneengka ahakchaang suhnii nache richiithou re vomrip chii inche chirka aarompa; aanuwnache ama ing aveong-nii asha taklinache thinka aruwpa, vokhehkho meetungnii nache mantorka rukuum isajaeh ing atupeehpa. 35Akhuwvaar nache ama ing seer dinari asae ynniimehchu meetungnii een aafhuw ningnache pika ariir, nang ing rukuum tupeehra; nang ing havi athi ing namanruwh chaap vakhae kahunganrirae bariva kata.”
36Havana ynthummeh ae sungne achuw ingkhe lamruw ae ing embin meechu aveenchaang vaate ichii ing namandennah?
37Ama ing abasang, “Ataklina aning amansiih mee chuva.” Jesu ing aningna ariir, “Yngkaenana nangkho havi vaange tura.”
Jesu ing Martha re Meri avaveer
38 #
Jhn 11.1
Atii enuw ing enghungsirae khuwkheh nache varuwhsae; amana Martha ichii rupanuw inche Jesu chu hebariimka a-een sungna abathungpa. 39Martha naenuw aruming Meri inche Jesu khiderna ongka Jesu chongchu arungaesahpa. 40Changlaenche Martha inche rukuum atutahna ja-hohka Jesu ningna ariir, “Aafhuw, kanumpang ing kanaenuw inge ru-kuum imantuka ymbommah i nang ing thova ynsapeehmah vachii? Kanaenuw renkha ymbomnii inche nang ing iriirpeehra.”
41Jesu ing abasang, “Martha, Martha, nanongtu inem khaenakhe nabarungriir sungna fhuwm bavae chiika ija ing omnachii; 42chang-vakonchu athurfhuw ing itufhuw yngkheh omna. Meri inge aningtanii irijoh rumahvachii isapakchu aateerpa.”
Currently Selected:
LUK 10: MOYO
Highlight
Share
Copy
Want to have your highlights saved across all your devices? Sign up or sign in
Moyon Naga New Testament - ITHAR CHONGHAK
Copyright © 2008 by The Bible Society of India
Used by permission. All rights reserved worldwide.
