LUK 12
12
Isachaang ituae tanii Ynriimsahnii
(Met 10.26-27)
1 #
Met 16.6; Mk 8.15 Apha ichiinache iteennii isamah ing mee inempak yngkong-poh aeka yngkheh taklina yntaar cheehcheeh ing aomraenche, Jesu ing amaensana asebok ae ningna ariir, “Pharisi ae isachaang itu chor khaenakhe nenuw ynriimsaruw. 2#Mk 4.22; Luk 8.17Yng-khumjaeh naka yndangmah vachii yntanga omah, amanche ynghuwmah vachii ynruwh yntangakho omahnii. 3Chukhaenache nenuw ing ynthim sungna ynruwh ing nenriir chaapkha ireng nache siivataruw; vokhehkho arakiing yngkhehna nenganana nenriir chongkha een chungting ynthang vaata.”
Achuwva chiiva Ichiifhuwchu
(Met 10.28-31)
4“Kaarang ae neningna ki ing kariirnah, hakchaang thehcheh naka, aanuwting ynchiikho amanruchehmah ae enuwchu chiimah aeruw. 5Changva-konchu nenuw ing achuwchu chiiva nenchiiva ichiichu neningna ki ing riirpeeh kachuw: Yntheh aanuwting longkong ting ynrencheh ruwreng adeenchu nenuw ing chiiruw; ki ing ichumchu neningna kariirva, atakchu chiiruw!”
6“Vasak runga pesa ynniimehna nenjuwrmah vakhang? Thangnang mik barengna vasak aechu yngkheh pangkho inghir omahnii. 7Nenrusaena sambur khakho ateenchir vasahva. Nenuw ynchik mahruw; nenuwve vasak ae ithi ing nemen inemva!”
Khrista Arure Arumah
(Met 10.32-33; 12.32; 10.19-20)
8“Ki ing neningna kariirnah, mee vakhae maekungna kichu ynru meechu Mee Sapa inche Thangnang vaarmee ae maekungna ruvaata; 9amanche mee ae maekungna ynrumah mee vakhae chuve Thangnang vaarmee ae maekung nakho rumah aening.”
10 #
Met 12.32; Mk 3.29 “Amana Mee Sapa taklinache achuw yngkheh mee ing arumah ing ichongchu yngkuhpeeh vaata; changvakonchu achuw yngkheh mee ing ynthiing laetha taklina arumah ing chongnave yngkuhpeeh mahnii.”
11 #
Met 10.19,20; Mk 13.11; Luk 21.14,15 “Amana enuw ing nenuwchu meekongnii chaapna vokhehkho aapuh ae amanche aatuaricheh chaap ae maana ynghenruw ae raenche, nenuw ing ynchiikha basangva kente tanuwna jamahruw; 12changlaenche ynthiing laetha ing ynchii riirva nente ichiichu imanchuw vaata.”
Ipang Savangna Ynghuwnii
13Mee inempak kaarnache mee yngkheh inche Jesu ningna ariir, “Oja, ki ing iphapham isuwh lerchiichu isemnii khaena kaipa ningna iriirpeehra.”
14Jesu ing aningna ariir, “Kaarang, achuw ing kichu nentaklina vajeernii vokhehkho isemnii khaena pham ithinkhang?” 15Jesu ing eningna ariir, “Ynriimruw, amanche ymphaam vakhae ae tanii nentaksah yncheer saruw; laaruw mee iringniichu lerchii inem adeen nachenpang omahva.”
16Aanuwnache Jesu ing eningna ynghuwnii thamin yngkheh atong: “Achuw yngkheh savangpak mee inche apaamsah nache inempak lerchii amanla pohpa; 17amana abarungriirna ama ing amanden, ‘Lerchii isahfhuw kadeenpoh havi asiihnii apham omahsa. Ki ing ynchii tukate?’ 18Havi ki ing tukata taka ataksahna ynriir, ‘Kaatom havi isehchir ningka, havi chungna iruunghak yngkheh tukata; amanche asung nache kasaang kabaar vokhehkho kapeehchae vakhae thinpoh kata. 19Amanche ki ing kalaetha ningna riirkata, kalaetha, kum aajaeh isahfhuw khaena lerchii nasiihpa; ongjaeh nana sara inla vokhehkho nungaesara!’ 20Changvakonchu Thangnang ing aningna ariir, ‘Ipang nang! Atanii jaen nalaetha ringkum jeriva kata; changlae nalerchii chaapkha achuwta ynsuwh vaate?’ ”
21Chukhaenache achuw yngkheh ing ataksah khaenapang lerchii amanghuwng meechu Thangnang maana savangmah.
Thangnang Ynden
(Met 6.25-34)
22Jesu ing asebok ae ningna ajeer, “Chukhaenache ki ing neningna kariirnah, nenringnii khaena nenuw ing ynchii savakente vokhehkho hakchaang khaena ynchii peendiir niivakente tanuwna nenbarungriir manjamahruw. 23Isahfhuw chungna ringkum ing vokhehkho peendiir chungna hakchaang ing athurfhuw-sehna. 24Phaenva vaak ae i enruw: Enuw ing ivorkho vormah ae, ikuumkho kuummah ae, amanche enuw ing itomkho, pangkho deenmah ae, changvakonchu Thangnang ing enven amamva peehsae. Chukhae-nache vaati ae thoh chembe nenuw nemen aajaehmeh ruwne! 25Nenuw achuw yngkheh ing havi khaene abarungriir jaka aringkum khaapkheh amanthicheh omkhang? 26Chukhaenache aasiingseh rapkho nenuw ing tuchehmah tanuwve, ynchii khaena reentaang reentaang khaena nenbarungriir nemanjava? 27Riibur aeng ynsaangkhe ihangruungpae ichii mandenruw, nongkho tumah ae, itaarkho taarmah ae; chukhaenache ki ing neningna kariirnah, Solomon rap ingkho lerchii aajaeh adeen ingkhe enuw vaange ynthongmah. 28Atanii lampana om fuwrchu atuknuw mi sungting ynthuvachii rapkho Thangnang ing hangjaehmeh aning mansiih nave, O thacha ivaeh ae! Aafhuw ing nenuwchu athiseh ing eerommah niikhang?”
29“Chukhaenache nenuw ing ynchii savakente, vokhehkho ynchii invakente tanuwna jongmahruw, vokhehkho nenbarungriir manjamah-ruw. 30Akhaechuve laaruw paamna Thangnang yndenmah mee chaap ing hava vakhae i enjongnah; amanche peeh vakhae i neningna ikaniina ichii nenpa ing amanghuwsa. 31Chukhaenache amaensana Thang-nang iruwngpaamchu jongruw, amana hava vakhae i neningna ipivaata.”
Thangbaen nache Savangvachii ae
(Met 6.19-21)
32“Ynchik mahruw, isiing jao ruwr ae, neningna Thangnang ing iruwng-paam ipeehchu abarungriir ipenva. 33Nenuw ing nendeen vakhaekha juwrnuwna amenchu sara naeriing ae ningna piaeruw; jungbaruw mahdeh vachii seerthuungchu nengkhaena seemruw; akhaechuve lamruw aeng enganeeng chehmah vokhehkho rungi ing asah chehmah, thangbaenna om lerchii chuve imaang omahva. 34Akhaechuve nenlerchii aomniitah nache nenbarungriir chukho omvaata.”
Ahahcheh Meenae
35 #
Met 25.1-13
“Nendiirriim chiimther nuwna vokhehkho jaemi bareng nuwna hahruw, 36#Mk 13.34-36Aafhuw ing rakhiinii kuurva imaar tanii hunganri naka eengkhaarchu arakhuung raenche ithupak ing imongva nenchii meechu nenuw ynsuwhruw. 37Aafhuw ing ajuwnglae meenae aenche hemeng ae naka enghahcheh ajenpha mee aechu bor aphapae; ki ing neningna atatak ing kariirva, Aafhuw inche endiirriim manehther naka vokhehkho isahnii khaena mangong ae naka emaarnii khaena rukuum tupeeh vaatae. 38Amana Jesu ing avomaniinii apha, avomanthumnii apha nache ajungthenglae husaar ahentu ajenpha mee aechu bor aphapae! 39#Met 24.43,44Nenuw ing havi manghuwruw, amachuve een aafhuw inche ynchii apha nache lamruwchu thengva chiiva ichiichu manghuw nave ama ing hehah naka a-een sungtingche ruwhmah vachiiva. 40Chukhaenache nenuwkho husaar hetunuwna heongruw; nenuw ing nemandenmah siisii apha nache Mee Sapa inche jungtheng vaata.”
Thachafhuw re Thachafhuwmah Meenae
(Met 24.45-51)
41Pitar ing ariir, “Aafhuw, havana ynghuwnii thamin i kengkhae napangva changmahka mee aangkheng khaenakho nariirva?”
42Jesu ing ariir, “Chunuwcha apha ichachakna eningna isahfhuw thaemin enrutumchu ipinii khaenache Aafhuw ing eensung nache paaniivachii thachafhuw om iveer rukuum itu meechu achuw vachiiva chang? 43Aafhuw inche ajungthenglae havi vaange ahetu ajenpha meenae chuve bor aphava. 44Ki ing neningna atatak ing kariirva, aafhuw inche adeensah lerchii vakhaechu aningna mansir vaata. 45Changvakonchu meenae inche ataksah ing tanaka, ki kaafhuw juwngvachiichu abarungriir nache yntuksa tanaka meenae pasar aechu vokhehkho meenae rupanuw aechu ibin basen naka, ama ing sanaka innaka, meenae inche asuwh ae pasar rupanuw aechu safhuw infhuw naka vokhehkho juw hebaruw nave, 46ama ing amandenmah riri inii vokhehkho amanghuwmah apha nache Aafhuw inche juwngvaata, changlaenche ahakchaangchu mongnii basuw naka tenvaata; amana thachafhuwmah ae thohche iphafhuw phahak vaata.”
47“Aafhuw ing amandenchu manghuw naka husaar atumah vokhehkho Aafhuw ing aadik inuwzii ing ahetumah meenae chuve rumor abuw inae ing binvaata. 48Changvakonchu Aafhuw ing amandenchu manghuwmah naka ibin matik icha nong atu meenaechu rumorbuw topoh inae ing binvaata, vokhehkho inem apeeh mee ningnache inem phakata tavaata; amanche inemhak apeeh mee ningnache inemhak niihvaata.”
Jesu i Asiksik Suwhniiva
(Met 10.34-36)
49“Laaruw paamne mi bathunii khaena ki juwngsing, amanche michu ataraene chuwhnave ki ing kaadikchu ynchiiva? 50#Mk 10.38Ki ing baptais iraangva kachii omna; amachu achimahri raen-taang aajaehmeh kaningna ijaniiva! 51Laaruw paamne idae ipeeh ijuwngva ichii ing nemandenva? Ki ing neningna kariirnah, changmahva asiksik suwhnii sehseh khaenava. 52chukhaenache atarae basen naka eengkuw sungna mee runga ongnii nakhe ynniimeh re ynthum, ynthum re ynniimeh suwhvaata. 53Ampa re asapa, amanche asapa re ampa, vokhehkho amnuw re asanuw, amanche asanuw re amnuw, vokhehkho ampuw re ameenuw, amanche ameenuw re ampuw thoh asiksik suwhnii khaenava.”
Apha Ynghuw
(Met 16.2-3)
54Amana Jesu ing mee changjaeh inem ae ningnache ariir, “Nenuw ing iniisuwhtah tanii ruwrduh hungsuwh nemutahna, nenuw ing nenriirnah, khuw suwrvaata nenchiichu ichum. 55Amanche Irip tanii sii hanglaang nave nenuw ing nenriirnah, inii inem-pak basak vaata tachuwka nenriir chumna. 56Isachaang atu mee ae! Nenuw ing laaruw vokhehkho minvaen alaar enchuwka suwhva chiichu nenriir chehsa, changvakonchu ynchii khaena ataraennii aphachu nemanghuwcheh mahva?”
Ynrumah mee thohche Aanrunii tu
(Met 5.25-26)
57“Ynchii khaena ichum tunii khaenache nataksah vajeer yntumah vachii? 58Nangchu ynrumah mee thohche vaapa ngiirniiting navak raenche, amathoh aanrunii tura. Changmahnave ama ing vajeer itumee ningting iruwnaka, vajeer itumee inche natakchu aaruung ningting imansir vaata, amanche aaruung inche natakchu kaeshum tingche ithin vaata. 59Ki ing naningna kariirnah, nang ing akuurchiimnii seerchu napeehmahri raentaang hungsuwh rumahnii.”
Currently Selected:
LUK 12: MOYO
Highlight
Share
Copy
Want to have your highlights saved across all your devices? Sign up or sign in
Moyon Naga New Testament - ITHAR CHONGHAK
Copyright © 2008 by The Bible Society of India
Used by permission. All rights reserved worldwide.
