LUK 7
7
Jesu ing Laarchang chaama Aapuh meenae Amandam
(Met 8.5-13)
1Jesu ing mee vakhae inche ensiinii ing chong ariir amanchinuwting Kaparnaum tingche sisa. 2Amanache laarchang chaama aapuh ameenae yngkhehchu thikvachii ing henaksa. Atak i aafhuwchu iruwpak ing atusah meeva. 3Laarchang chaama aapuh inche Jesu thengna ichii asiitah nache, ameenae inachu yndampeehnii khaena avakpeeh rasii tanuwna variirruw taka Jehudi upa aechu Jesu ningting avechiirpa. 4Enuw ing Jesu ningting vak aeka aningna enriir, “Hava mee i nang ing bomva nachii matik chaana, 5ama ing kenjaati inempak aning amansiihva vokhehkho meekongnii eenkho yntupeehva ta aeka Jesu ningna ipirpak ing enthamsahpa.”
6Chukhaenache Jesu ing enuw thohche vak haksae. Amana Jesu ing vephavachii aasen avaehmah rirae, laarchang chaama aapuh inche aarang ae vechiirka Jesu ningna chong amanriirpae, “Aafhuw, ijahoh peehmah tahra, nang ing ka-eenna varuwhva nachii ki yntuursapakning; 7chukhaenache katak rapkho Aafhuw naningting vakva kachii matik ichasah mahping ta ingka kamandensahva. Changvakonchu nachonghak pangchu ipipeeh sara, vokhehkho kameenaechu idam phasarasii. 8Kikho aatuaricheh yngkheh derna ong meeping, kaderna laarchang mee inempak omnae: Ki ing yngkheh ningnache sira kachiitahna sina; amanche reentaang yngkheh ningnache huungla kachiitahna huungna; vokhehkho kameenae ningna-che amakha tura kachii atunah.”
9Jesu ing ama chongchu asiitah nache inempak ngikka aanuwzii mee ae ningtingche vaanlehka ariir, “Ki ing neningna kariirnah, Isrel vakhae kaarna atanii ipha ing jinge ichii atha-cha om mee yntuwhfhuw mahri ing.”
10Amana avechiir mee aechu eenting enghunganritah nache, meenae inachu hedamsa.
Jesu ing Muwkhuwnuw sapa Amanring
11Apha topoh aanuwting Jesu ing Najin ichii khuwruung ting vasisa, amana asebok aere, mee inempak ae thohche sipohsae. 12Ama ing khuwruung suwngkung avephapha nache ithii mee envedompa, atak i amnuw ing yngkhehpang abaringsah sapava, amanche amnuw chukho muwkhuwnuwva; amana khuwruung tanii mee inempak inche amnuwchu engaanruwfhuw. 13Changlae Jesu ing amnuwchu amutahna aningchu mansiihka aningna ariir, “Nang chap-mahra.” 14Amana Jesu ing envedomnii toraechu avepartah nache aandom mee aechu ngiirsae. Aphanache Jesu ing ariir, “Achiihpa iler, naningna hangsuwra ta ingka kariirnah.” 15Changlaenche ithii inche hangsuwka ongsa, vokhehkho ichongkho abasenpa. Amana Jesu ing amnuw ningting amansirpa.
16Amatah nache mee aechu eningdim ing ynchikpoh aeka vokhehkho enuw ing Thangnang chu manpah aeka enriir, “Iruungpak jaephar yngkaarna hungsuwhsa, vokhehkho Thangnang ing amee aechu aveersahpa!” 17Jesu ing havana nong i atu khaena Judia paam vokhehkho akuurna ongchaap vakhae mee aenche ynseer aeka ynjarsa.
18Johon asebok aenche havana chong vakhae i siiaeka aningna aman-thangpae. 19Chukhaenache Johon ing asebok meeniimeh aechu eenka Aafhuw ningting vechiirka ariir, “Ijungtheng Aafhuw chu nangvachii, changmahka reentaang itheng kenuw ing hahva kenchii omne vataruw?”
20Enuw inche Jesu ningnache theng aeka enriirpa, baptais eetupeeh Johon ing kenuwchu naningne avechiirka jinge ichii ing siiruw achiinah, “Ijungtheng Aafhuw chuvachii, chang-mahka reentaang yngkheh hahva kenchiiva?”
21Apha ichiinache Jesu ing ina chaap ae, isamah riirae ing ina ae vokhehkho ynthiingmah laetha ing ichuwng ae vakhaechu amandampae amanche mikchu vakhae chukho amandampae. 22Amana Aafhuw ing eningna abasang, “Nenuw ing nensii vokhehkho nemu chaap vakhae i Johon ningna hungriirruw; mikchu aeng imu emphasahpa, engana iseeh aeng ensii-chehpa. Amanche khibong aenche isi enchehpa, ynchor aenche ynthiing emphasahpa, ithii ae chukho hangring emphapa, amanche havana isa chong katong chaap ikho sara naeriing aengkho ensiisahpa. 23Chukhaenache kataklina fhuwm ynvaemah meechu bor aphava.”
24Johon achongjeer aenche engaang-kae nuwna, Jesu ing Johon khaena mee changjaeh inem kaarnache thamin itong abasenpa: “Nenuw ing paamfhuw ne ynchiikha iva en ivasi vachuw? Sii iraang ing amanlaap thingdii chuva? 25Vokhehkho nenuw ing ynchiikha munung tachuwka ivasivachuw? Peen ynnaarjaeh anii mee yngkheh chuva? Enruw, inempak ivaar ing ynthong inungaepak ing ipaar enuw ae chuve iruwng ae ongnii nache ongnae. 26Chukhaenache nenuw ynchii enkenta tachuwka ivasi vachuw? Thangnang jaepharchu nenva enva? Ichum chuve chumna, ki ing neningna kariirnah, atak chuve Thangnang jaephar athiseh ing manchungsehna. 27Haviva ama akhaena ynziihka omchu enruw, ki ing kachongjeer meechu nemaana kachiirsa, ama ing nengkhaena lamchu heseem vaata. 28Ki ing neningna kajeernah, rupanuw aeng embaring vakhae kaarna Johon aathi achuwkho omah; changvakonchu Thangnang iruwngpaamna aasiingseh inche Johon chungna ruunghakna.”
29 #
Met 21.32; Luk 3.12 Hava chong i aasii vakhae mee aengkho, ree ikhuum aengkho Johon ningna theng aeka baptais tusa aeka, Thangnang i ichum chuva ta aeka enrisah. 30Changvakonchu Pharisi aere thiimthang aenche aningna baptais itu rumah aeka entaksah ing Thangnang ing amandenchu rimahsae. 31“Ataraennii suwnthar ne ipaar mee ae i ynsaangkhe ichiipae vokhehkho ynchiithoh aanghakpae taningka man-dang kate? 32Enuw chuve kithiirna ong naepang aethoh aanghaknae. Enuw ing yngkheh yngkheh yngeen aeka enriirnah, ‘Kenuw ing nengkhaena baasi kentumnah changvakonchu nenuw ing laammahchuw! Kenuw ing kenchaprae chapmahchuw.’ 33Akhaechuve Baptis Johon tarkho asahmah amanche vomrip chiikho ainmah thengsa, amanche nenuw ing atakchu ynthiingmah laetha areensa tachuwka nenriirpa. 34Mee Sapa inche jungthengka asahpa vokhehkho ainpa, amachu vokheh nenuw ing apeehbuwr iruung juw ain vokhehkho ree ikhuum mee aethoh, amanche isii icher mee aethoh ynchaarna tachuwka nenriir nahreeh! 35Thangnang losingchu ama asiti aenche aangkhenglaang chumna ta aeka emandangpa.”
Jesu ing Pharisi Simon Eenna ong
36Pharisi yngkheh ing Jesu thohche imaarpohnii khaena a-eenpa, chukhae-nache Jesu ing Pharisi een tingche varuwhka ongsa. 37#Met 26.7; Mk 14.3; Jhn 12.3Amana enruw, ama khuwruung nache isii icher rupanuw yngkheh inche Pharisi een sungnache Jesu ongna ichii asiitah nache rupanuw inche yntaehfhuw barim isa richiithou buwrchu vechika, 38vokhehkho atuknungna vangiirka chapsa, amanche amik richii ynta inche Aafhuw khichu manomka asam inche aanuwrpa vokhehkho akhichu tumka richiithou inche aataehpa. 39Jesu chu a-eenpa Pharisi inche amachu amutah nache abarungriirna mandenka ariir, “Hava mee i ynchii rupanuwva ichii manghuwva chiiva, akhaechuve rupanuw havi isii icher meeva.”
40Jesu ing abasang, “Simon, ki ing naningna kariirfhuw yngkheh omna.” Ama ing abasang, “Oja, ynchiiva iriirpeehra.”
41Achuw mee yngkheh seer mee amanfhuwhchak ningnache seer afhuwh ae om. Yngkheh inche chanii songa amanche yngkheh inche somnii ariirunga entuurpa. 42Enuw meenii inche ensingfhuw endeenmah tahnache akuhpeehpae. Chukhaenache enuw meeniimeh ne achuw ingkhe athiseh ing aning mansiihhak vaate?
43Simon ing abasang, “Ki ing kamanden chuve inemhak ing atuur meechu vaata.” Jesu ing aningna ariir, “Nang ichum ing vajeer natupa.” 44Aanuwnache rupanuw ningtingche vaanlehka Simon ningna ariir, “Nang ing rupanuw havi namuse? Na-een sungting varuwhsing, nang ing kakhi chaamnii chii ipimahchii, changva-konchu rupanuw havi inge amik richii ing kakhi manomka asam ing aanuwrpa. 45Nang ing kaabeeng tummahchii, changvakonchu kavaruwh chakthoh basenka kakhi atumchu manchenmah, 46changpangmahka karusaena richiithou itaehmahchii, changvakonchu ama inchembe kakhina richiithou aataehpa. 47Chukhaenache naningna kariirnah, ama ing isii arangchaap vakhae kakuhpeeh chirpa, akhaechuve inempak aning ymman-siihpa; changvakonchu topoh pangti ikuhpeeh apha inche topoh pangti aning amansiihnah.”
48Chukhaenache Jesu ing rupanuw ningnache ariir, “Nataklina isii icher chaap vakhae kakuhpeehchir pachii.” 49Changlae Jesu thoh imaarniina onghak aenche yngkheh ing yngkheh ningna ynriirsae, “Isii chukho akuh-cheh havi achuwva?” 50Jesu ing rupanuw ningnache ariir, “Nathacha inche yngkarsahpa, idaejaeh ing yngkaera.”
Currently Selected:
LUK 7: MOYO
Highlight
Share
Copy
Want to have your highlights saved across all your devices? Sign up or sign in
Moyon Naga New Testament - ITHAR CHONGHAK
Copyright © 2008 by The Bible Society of India
Used by permission. All rights reserved worldwide.
