METHIU 10
10
Sebok Suum Ariinii
(Mk 3.13-19; Luk 6.12-16)
1Jesu ing asebok suum ariinii aechu eenka, umlae aechu ithurchehnii, riirae mangkhiing vokhehkho ina aajaeh mandam chehnii ruwreng apeehpae. 2Sebok suum ariinii ae ruming chuve; Pitar taka a-eenniichak Simon, vokhehkho anaepa Andru; Jebedi sapa Jems vokhehkho anaepa Johon; 3Philip, Bartholomiu; Thomas, Methiu ree ikhuum; Alphius sapa Jems, Thadius, 4Kanaan tanii Simon vokhehkho Jesu arensah Judas Iskariot ipae.
Suum ariinii ae Achiir
(Mk 6.7-13; Luk 9.1-6)
5Havana sebok suum ariinii ae ningne Jesu ing nungsim thahka achiirpae: Nenuw reentaang mee ae paamting vokhehkho Samaria khuwting ruwhmahruw. 6Changvakonchu ama changdenna ymmoh vasah ae Isrel mee ae tingche siruw. 7Vasinuwna tongruw, “Thangbaen paam iruwng lipahchu ynneengsa!” 8Ina aechu mandamruw, ithii aechu manringruw, ynchor ae chukho mandamruw vokhehkho umlae aechu thurruw. Nenuw ngareh ing nenphava, ngareh inche piruw. 9Nenuw nenthuungfhuw nache sana, rupa vakhangnare vokhehkho seer vakhangnare ynringmahruw; 10#1 Kor 9.14; 1 Tim 5.18lamkhii khaenava tanuwna thuungfhuw, rungop, khingop changmahka thor asae ynnii yngkhii ing reenmahruw. Nong itu meechu ipipham thengna.
11“Amanache khuwruung chang-mahka khuwsung nenvaruwhrae nenuwchu ihebariim vachii mee enruw, amanche aphamchu nemahmahri raentaang ama thohche ongruw. 12Nenuw ing eensung tingche nenvaruwh thoh, ‘Neningna idae omlasii’ tanuwna enrutha kuurruw. 13Amana een sungna heong mee aenche ibariim ae nave idaechu tungrasiing; changvakonchu ibariimmah ae nave idaechu ynrirasiing. 14#Nong 13.51Amanche eensung vokhehkho khuwruung aenche ibariimmah ae naka changmahka nenchong rungaemah ae nave, nengkhina pirkhuwhchu rukhuung nuwna ama maphamchu bathenruw. 15#Met 11.24#Luk 10.4-12Ki ing neningna atatak ing kariirnah, vajeer inii nache changchii khuwruung mee ae chungna Sodom re Gomara mee aechu Thangnang ing aning manchuwhseh vaata.”
Ijachaam Thengvachii
(Mk 13.9-13; Luk 21.12-17)
16 #
Luk 10.3
“Rungaeruw, imi ae kaarna jao vaangkhe ichii ing kabathen pachuw; chutahnache nenuw baruwr vaang singruw amanche khunu vaang nenbarungriir dimrasiing. 17#Mk 13.9-11; Luk 12.11,12; 21.12-15Chang-vakonchu ynriimruw; akhaechuve nenuwchu isuwr vachii mee heong vaatae, enuw ing vajeer eenting iruw vaatae amanche meekongnii ting iruw ae naka ibin vaatae. 18Enuw ing reentaang mee ae maekungna kakhaena saarkhii ipeehnii lipah aapuh aere iruwng ae maensokna nenuwchu ikiae naka imangiir vaatae. 19Amana vajeer tunii khaena ynghenruw aere ynchii basangva kente, ynsaangkhe riirva kente ichii khaena barungriir manjamahruw. Apha ahenpha raenche ynchii riirvakate ichiichu neningna ijepivaata. 20Nenuw ing hangchong vanenchii chaap neningtanii mahnii, Thangnang tanii laetha ing ichongpeeh vaata.”
21 #
Mk 13.12; Luk 21.16 “Mee ae ing enguw enae ae chukho ithehnii khaena pivaatae, amanche empa aengkho havithoh aanghakjaeh ing ensiti ae chukho pivaatae; siti ae ingkho empa aechu rumah ae naka ithehnii ting pivaatae. 22#Met 24.9; Mk 13.13; Luk 21.17; Met 24.13; Mk 13.13Mee vakhae ing nenuwchu ki kakhaena ibatir vaatae. Changvakonchu achuw yngkheh inche achinii ipha ing khaangcheh nave ikarpeeh pharem vaata. 23Khuwruung yngkheh nache nenuwchu ijachaam ipiae nave reentaang yngkhehting ympeenruw. Ki ing neningna atatak ing kariirnah, Mee Sapa inche ajuwngmahri raentaang nenuw ing Isrel ae khuwruungna nong nentuchu manchichehmah tanuw.”
24 #
Luk 6.40;
Jhn 13.16; 15.20 “Aanchuw mee chungna atam mee ing iruungseh mahva; aafhuw chungna suwh ing iruungmahva. 25#Met 9.34; 12.24; Mk 3.22; Luk 11.15Chukhaenache aanchuw mee vaangche atam mee ingkho penvachiiva, amanche suwh ingkho aafhuw vaang penvachiiva. Eensung aafhuwchu Beelzebul nave, ama eengkuwchu aajaehmeh sakmah vaate!”
Thangnang ichiisahnii khaena Ynchuwpeeh
(Luk 12.2-7)
26 #
Mk 4.22; Luk 8.17 Chukhaenache enuwchu chiimahdeh aeruw, akhaechuve yndangmah chaapchu hungandang chirvaata, amanche ynthuur chaap-chu hunganphuwng chirvaata. 27Ki ing ynthimna kariir chong havi nenuw ing ireng nache chongruw, amanche nengana ing nensii vakhae havi phuchungting karnuwna manthangruw. 28Chukhaenache hakchaang thehchehka laetha atheh chehmah enuwchu chiimah aeruw; changvakonchu laetha re hakchaang aaniimeh mamaangcheh vachii Aafhuw chu athiseh ing chiiruw. 29Vasak asae ynniimeh pesa yngkhehna juwrmah chuwkhang? Vokhehkho nenpa ing aru dernamah naka engkaartanii yngkhehpangkho ruwruwna bukmahnii. 30Nenrusaena sambur aangkheng chukho ateenchir vasahva. 31Chukhaenache ynchik mahruw; nenuw chuve vasak ae chungna nemen iruwhakva.
Khrista Arure Arumah
(Luk 12.8-9)
32Chukhaenache mee ae maekungna ki ynru mee chuve, ki ingkho thangbaenna ong kapa maekungna ruvakata. 33#2 Tim 2.12Changvakonchu mee ae maekungna kichu ynrumah mee chuve, ki ingkho thangbaenna ong kapa maekung nache rumahning.
Khrista khaena Asiksik Suwhnii
(Luk 12.51-53; 14.26-27)
34Ki i laaruw paamna idaechu ipeeh ijuwngva ichii ing manden mahruw; Ki idaechu ipeeh ijuwngmahping, changvakonchu laar tuknii chem ipeeh ijuwngping. 35Amachuve asapa ing ampa aruniimah, asanuw ing amnuw aruniimah, ameenuw ing ampuw aruniimah khaena ijuwngping. 36Amanche mee ajeehniichu eengkuw sungsah kaartanii vaata. 37Amnuw ampa aechu ki ithi ing aning amansiih meechu kakhaena matik chamah; amanche asapa asanuw aechu ki ithi ing aning amansiih mee chukho kakhaena matik chamah. 38#Met 16.24; Mk 8.34; Luk 9.23Amanche akhros sahchu idomnaka kaanuw ajiimah meechu, ki kakhaena matik icha mee mahva. 39#Met 16.25; Mk 8.35; Luk 9.24; 17.33; Jhn 12.25Ataksah alaetha karsa ningka achii mee chuve maangvaata; amanche kakhaena alaetha abathencheh mee inche ikarpeeh phavaata.
Nongmen
(Mk 9.14)
40 #
Luk 10.16; Jhn 13.20;
Mk 9.37; Luk 9.48 Nenuw ymbariim meechu ki ymbariimva, amanche ki ymbariim mee inche ki ynjebathen Thangnang chu abariimva. 41Thangnang chong ajeer ahebariim mee inche Thangnang chong ajeer yngkheh ing phavachii nongmen phavaata; ichum ynthiing mee ahebariim inche ichum ynthiing mee yngkheh ing phavachii nongmen phavaata. 42Kaanuw ajii yntuur mee ae kaarna yngkhehchu achuw yngkheh ing chii pinave, ki ing neningna kariirnah, ama mee inche phavachii nongmenchu maangmahnii.
Currently Selected:
METHIU 10: MOYO
Highlight
Share
Copy
Want to have your highlights saved across all your devices? Sign up or sign in
Moyon Naga New Testament - ITHAR CHONGHAK
Copyright © 2008 by The Bible Society of India
Used by permission. All rights reserved worldwide.
