METHIU 17
17
Jesu ing Ahakchaang Auur
(Mk 9.2-13; Luk 9.28-36)
1Atii inii niruk aanuwna Jesu ing Pitar re Jems vokhehkho anaepa Johon enuwchu enumpang ing yngkaangpak bung ting aruwpae. 2Changlaenche emaekungna Jesu ing amasak uurka amanche amaechu inii vaangche aenka vokhehkho apeendiir chukho ireng vaangche vaarsa.
3Amana enruw, Mosi re Elija yndang aeka Jesu thohche thamin entongpa. 4Chutahnache Pitar ing Jesu ningna ariir, “Aafhuw, havane inuw ong ing sakvaata, irupeeh taniive ki ing khurpeenthaam yn-thummeh narutum yngkheh, Mosi rutum yngkheh amanche Elija rutum yngkheh tukata.” 5#Met 3.17; 12.18; Mk 1.11; Luk 3.22#2 Pit 1.17,18Ama ing achong raenche enruw, aenpak ruwrduh ing abaruwpae, amanche ruwrduh sungtanii senruwr yngkheh ing ariir, “Havi kaning kamansiihpak kasapa chuva; ataklina inempak penning, ama ajaerachu rungaeruw.” 6Ama chongchu sebok aeng ensiitah nache ynchik aeka ruwruw ting khupsae. 7Changvakonchu Jesu ing ajuwngthoh par aeka ariir, “Hangiirruw, ynchik mahruw.” 8Enuw ing paamkhuw enghethiir tahnache Jesu mahnaka achuw tikho mumahsae.
9Enuw ing bung tanii enjunganri raenche Jesu ing eningna nungsim thahka ariir, “Nemu chaapkha Mee Sapa ing ithii tanii ahangring mahri raentaang achuw ningnakho riirmahruw.”
10Amana sebok aeng Jesu ningna thiimthang ae imbe Elija maensa ing juwngvaata achii ae khacha ta aeka asiipae?
11Jesu ing basang aeka eningna ariir, “Amachu chumna,” Elija maensa ing jungtheng naka peehchae aangkheng ajaennii vaangkhe mangomjaeh vaata. 12#Met 11.14Changvakonchu ki ing neningna kariirnah, Elija chu ijuwng vasahva amanche enuw ing atakchu emanghuwmah tahnache, enuw ing tunungka enchii emandenchu ataklina entupa. Amachu pangeng ichii ing Mee Sapa inche eningtanii ijachaamchu khaangvaata. 13Aanuwnache Jesu ing Baptis Johon khaena ichongva ichii emanghuwpa.
Umlae Ichuwng Pasarti yngkheh Amandam
(Mk 9.14-29; Luk 9.37-43)
14Enuw ing mee inempak yngkong ae kaarting enghuung raenche, mee yngkheh inche Jesu ningna vakka amaensok nache vakhupsaka ariir, 15“Aafhuw, kasapa taklina naning imanchuwhpeehsara, ama lungor deenka ijachaampak ing omna; akhaechuve misung tingkho, chiisung tingkho ruwhchakna. 16Ki ing nasebok ae ningna kaveruwsahva amachu enuw ingkho mandamcheh mahsae.”
17Amana Jesu ing abasang, “O, thacha omah vokhehkho yngkuhsiimah suwnthar siti ae, ki aasen iseeh ing nenuwthoh ongva tingkhang? Ki ing nenuwchu aasen iseeh ing badaarva kachii vachuw? Aanuwnache ama ing kaningting naepangkha henruwruw achii.” 18Amana umlaechu ama ing arakuh tahnache, umlae inche naepang ningtanii suwhsa, vokhehkho anikung nache naepangchu damsa.
19Aanuwnache sebok aeng Jesu chu yntuwhfhuw aeka ensii, “Ynchii khaena kenuw ing umlae kenthurcheh mahva?” 20#Met 21.21; Mk 11.23; 1 Kor 13.2Jesu ing eningna ariir, “Nenuw ing topohti nenthacha tahnava.” Ki ing neningna atatak ing kariirnah, encham muw achiihti thoh ynchim ing nenthacha omnave, “Nenuw ing havana bung tinge hanenna ing amatingse ympeenla nenchiitahna ympeen vaata, nenuw ing nenchehmah omahnii.” 21“Changvakonchu hava hangchii ive ithamsah vokhehkho maaru itongmah naka suwhthaang thaangmah.”
Jesu ing Thikvachii khaena Ariirreeh
(Mk 9.30-32; Luk 9.43b-45)
22Atii sebok engkheng Galili nache enthengpoh raenche Jesu ing eningna ariir, “Mee Sapa chu ama ajeehnii mee ae kikting arensah ynthongnah; 23enuw ing atakchu thehvaatae amanche animanthumnii inii nache ama hangring vaata.” Amana sebok aechu inempak ening dimsa.
Rumniieenna Ree Ipeeh
24Jesu vokhehkho asebok aenche Kaparnaum na entheng raenche ree ikhuum aeng Pitar ningna vak aeka asii ae, “Nenuw neng oja icha ree apeehmah chakva?” 25Pitar ing apeeh chaknah taka abasang. Aanuwnache Pitar ing een sungting hungruwhsa, amana Jesu ing aningna maensa ing asii, “Simon, ynchii namandennah? Laaruw paam iruwng aeng achuw ningtanii peehmen vokhehkho ree arichaknah ae? Enuw ensiti pasar ae ningtanii arichakpae changmahka mee asik ningtanii arichakpae?” 26Pitar ing marpah ae ningtanii arichaknah ae taka abasang. “Sakna, chunuw vanave siti pasar ae inge ipeehmah arusa. 27Changvakonchu enuw inge inuwchu ymmanraarniimah aeng chifhuw ting vaknana ngakinii va-thahra, amaensana naki ngachu abae mangaangla amanache makhae yngkheh tuwhvaanta; amachu chinana karutum re narutum khaena piaera.”
Currently Selected:
METHIU 17: MOYO
Highlight
Share
Copy
Want to have your highlights saved across all your devices? Sign up or sign in
Moyon Naga New Testament - ITHAR CHONGHAK
Copyright © 2008 by The Bible Society of India
Used by permission. All rights reserved worldwide.
