METHIU 25
25
Lunghah Suumna Ynghuwnii
1 #
Luk 12.35
“Thangbaen lipahchu lunghah suum aeng jaemi chiaeka song-pa ihah isi aethoh aanghakva. 2Asae runga ae chuve ipangpae amanche rungae ae chuve isingpae. 3Yngkhaena ynchii imbe ipang ae chucha jaemi chiaeka achii chuve reenmahsae, 4changvakonchu ising ae chuve jaemi achiikho areen ae. 5Songpa inche athengsiimah tahnache emik khukka jaarchirsae.
6“Changvakonchu jaenchim nache chong thangsa amachuve, “Enruw, songpa thengsa! Atakchu yntuwhnii khaena hangsuwhruw. 7Changlaenche lunghah aenche hangsuw aeka jaemi embarengpa. 8Amana ipang aenche ising ae ningna enriir, ‘Nenjaemi achii topoh ipisaruw, kenjaemi achii tangdohka thiksa.’ 9Changvakonchu ising aenche embasang, ‘Nenuwkho amanche kenuwkho ynsuwh mahkho arusa; chutahnache aajuwr ae ningting vaarii satahruw.’ 10Enuw ing aanrii ensithirche songpa chu thengsa, amana enthoraang ichivasah aenche songpa thoh ynruw ing rakhiinii kuurva tingche varuwhsae, amana eengkhaarchu yngkamsa.
11 #
Luk 13.25
“Anuwnache lunghah runga aenche hunganri aeka, ‘Aafhuw, Aafhuw, eenkhaar ijemongpeehsar,’ ta aeka enriirsah. 12Changvakonchu Aafhuw ing eningna abasang, ‘Ki ing neningna atatak ing kariirnah, nenuw achuw vachuw ichii manghuw mahchuwng.’ ” 13Chukhaenache nenuw apha vakhaena hahjaehruw, nenuw ing aanii re aphachu manghuw mahchuw.
Talen taklina Ynghuwnii
(Luk 19.11-27)
14 #
Luk 19.11-27
“Thangnang iruwngpaam chuve mee yngkheh ing lamkhii ting asiphana ameenae ae eenka alerchii vakhae amansir aethoh aanghakna. 15Ama ing ameenae yngkheh ningna talen runga, yngkheh ningna talen ynnii, amanche yngkheh ningna talen yngkhehchu enrutuk inuwzii ing piaeka atak lam-khii sisa. 16Aanuwnache talen runga apha mee ingkhe anikung nache sika ler amanvuurtah nache, talen runga yngkheh amanthipa. 17Talen ynnii apha inchenkho amavaang ichii ing talen ynniimeh amanthipa. 18Changva-konchu talen yngkheh apha inche sika ruwruw chuwka atalenchu adimpa.
19“Amana Aafhuw ing nuwting hung-kaeka ameenae ae thohche seer empha re isichu emanvuwhpa. 20Amana talen runga apha ingkhe athar talen runga amanthichu chika ariir, ‘Aafhuw, nang ing ympeehchii nakhe athar talen runga kamanthisa.’ 21Aafhuw inche aningna ariir, ‘Inempak sakna, isa vokhehkho thachafhuw meenae, nangve peeh topoh tina thachafhuw vachii vakhaka, ki ing peeh aanem mansirva kachii, Aafhuw rotharoh nache varuwhra.’
22“Talen ynnii apha ynchenkho aafhuw ningna vakka ariir, ‘Aafhuw, nang ing ympeehchii nakhe athar talen ynniimeh kamanthisa.’ 23Aafhuw inche aningna ariir, ‘Inempak sakna, isa vokhehkho thachafhuw meenae, nangve peeh topoh tina thachafhuw vachii vakhaka, ki ing peeh aanem mansirva kachii, Aafhuw rotharoh nache varuwhra.’
24“Amana talen yngkheh apha ynchenkho aafhuw ningna vakka ariir, ‘Aafhuw, nangve amuw tukruchii ingkho nakuumcheh, navormah ingkho namangkongcheh ynchaepak mee vachii ichii kamanghuwva, 25amatah nache nangchu chiisachii ingka talen ympeeh chiikha ruwruwna dim ingka kathuursahva, enla aafhuw natakha remva.’
26“Changvakonchu aafhuw inche abasang, ‘Ichamah vokhehkho thaachah meenae! Ki ing tukrudeh ing kakuumcheh, kavormah ingkho kamangkongcheh nang ing namang-huwjaeh vani? 27Amachu vanave kaseer kha nang ing seerthi ynthen ae ningna piae taniika, ki ing kahungkae raenne kaseersah re seerthi thohche phasava kachiiva. 28Chukhaenache aningtanii talen kha rinuwna talen suum adeen tingkhe piruw. 29#Met 13.12; Mk 4.25; Luk 8.18Akhae-chuve adeen mee ningna anemsehnii ing pivakata amanche adeenmah ningnache ama ing adeensah vakhaekho rivakata. 30#Met 8.12; 22.13; Luk 13.28Chukhaenache ymbaangmah meenae kha ynthim kaarting renruw, ynthim sungnache ichap ichuw vokhehkho aha iriirsana jarasii.’
Achiiniideh Vajeer Inii
31 #
Met 16.27;
Met 19.28
“Mee Sapa inche alaar isa ing vokhehkho ynthiing vaarmee aang-kheng thoh ynruw ing ajuwnglaenche, Aafhuw ing alaar isa iruwngpham ongnii nache ongvaata. 32Jaati aangkheng Aafhuw maanache yng-kongvaata, amanche jao icheer ing keer re jao asiksik ing akhaevaang, Aafhuw ing yngkheh re yngkheh asiksik ing khaevaata. 33Amana Aafhuw inche jao aechu atachang ting, amanche keer aechu atari ting siivaata. 34Changlaenche iruwng inche tachangna ong vakhae tingche tavaata, ‘Huungruw, kapa bor apha vakhae, laaruw paam abasenlimna nengkhaena ynruthongpeeh iruwng lipahchu phasaruw. 35Akhaechuve kaven achaamrae isahfhuw ympeehchuw, kachii araar raenche chii infhuw ympeehchuw, lamkhii ing kathengrae kichu ymbathungchuw, 36iniifhuw peendiir kadeen mahrae ympeehchuw, vokhehkho kanakrae nenuw ing ynveerchuw, amanche kaeshumna kaongraenkho ithengchuw.’
37“Changlaenche ichum ynthiing aenche Aafhuw ningna basang vaatae, ‘Aafhuw utarae naven ichaam kemu raenchii kempeehchii, changmahka nachii araar raenche kempeehchii, 38amanche utarae nang ing lamkhii ing nathengrae muchii ungka utarae kembathung vachii, changmahka peendiir nadeen mahrae kempeehchii, 39amanche nanak raenkho, kaeshumna naong raenkho utarae muchii ungka naningna itheng ung?,’ 40Changlaenche Iruwng inche eningna basang vaata, ‘Ki ing neningna atatak ing kariirnah, Kauw kanae ae kaarna yntuurseh mee taklina nentukha kaningna nentuva.’
41“Aanuwnache Aafhuw ing atariting ong ae ningnache tavaata, ‘Siraap apha ae, kaningtanii ongmahruw! Umlae vokhehkho avaarmee khaena aruthong vasah ichen naemah mi sungting siruw. 42Akhaechuve ki venchaam ing ynthehrae isahfhuw ipimahchuw, kachii araar raenche chii ipimahchuw, 43amanche ki ing lamkhii ing kathengrae nenuw ing ymbathung mahchuw, peendiir kadeensahmah raenche ipimahchuw, kanak raenkho, amanche kaeshumna kaongraenkho iveermahchuw.’
44“Changlaenche enuw ing basang vaatae, ‘Aafhuw nang ing naven achammrae, nachii araarrae, lamkhii ing nathengrae, peendiir nadeen mahrae, nanakrae vokhehkho kaeshum na naongrae, kenuw ing muchii ungka utarae rukuum kentupeeh mahchii.’ 45Changlaenche Aafhuw ing eningna basang vaata, ‘Ki ing neningna atatak ing kariirnah, havana isiingseh ae kaarne yngkhehpang taklina nenuw ing nentupeeh mahkha, kaningna nentumahva.’ 46Chukhaenache enuw-chu ichen naemah ponti tingche bathen vaatae, amanche ichum ynthiing mee aenche ichen naemah ringkum phavaatae.”
Currently Selected:
METHIU 25: MOYO
Highlight
Share
Copy
Want to have your highlights saved across all your devices? Sign up or sign in
Moyon Naga New Testament - ITHAR CHONGHAK
Copyright © 2008 by The Bible Society of India
Used by permission. All rights reserved worldwide.
