MAAK 1

Baptis Johon ningtanii Isa Chong

(Met 3.1-12; Luk 3.1-9; Jhn 1.19-28)

1Thangnang sapa Jesu Khrista khaena isa chong abasennii. 2Thangnang Jaephar Isaia thiimziihna ynziih vasah vaang:

“Enruw, nenlam iseemnii khaena,

ki ing nemaana kachong ijeermee kajenchiirsa,

3iruur yngkheh ing paamfhuwna uungna;

Aafhuw lamchu seemruw, amanche asinii lam chukho manchiimruw!”

4Baptis Johon ing paamfhuwna thengka isii kuhnii khaena barungriir huungruw taka amanthang. 5Amana Judia paam aangkheng tanii vokhehkho Jerusalem tanii mee vakhae inche aningting theng aeka isii enrangchu enriir; amana Jordan chifhuwna enuwchu Johon ing baptais mantu aeka amanthiing ae. 6Johon chu ut savin peendiir ing ynthong vokhehkho adiirriim shavin ing chiimka amanche khaeruwng re khiniing asah. 7Ama ing amanthang chong chuve, “Kaanuwna thengvachii mee i kachungna alaar isa omseh chuva, akhingop runoh rapkho kiim ningka ynjoh matik chasamah ing. 8Ki ingve chii ing kamanthiing sachuw changvakonchu Mee Sapa inchembe laetha ynthiing ing imanthiing vaata.”

Jesu ing Baptais atu vokhehkho Umlae ing Abatheem

(Met 3.13-17; Luk 3.21-22)

9Apha ichiinache Galili tanii Nazaret Jesu ing thengka, Johon ing Jordan iva nache baptais amantu. 10Amana chii sungtanii ahungsuwh chakthoh, thangbaen ymmongsa vokhehkho laetha inche ataklina khunu vaangche ijungchuwchu amu. 11#Met 3.17; 12.18; Mk 9.7; Luk 3.22Changlaenche thangbaen tanii senruwr yngkheh ing ajeriir, “Nang i kaning namansiihpak kasapa chuvachii, naningna ki inempak pensakning.”

12Aanuwnache laetha ing Jesu chu paamfhuw ting aruwpa. 13Paamfhuw nache Jesu ing inii nisommanrii ongka umlae ing abatheem; amanche lampa sha aethoh onghak ae; changlae vaar-mee aenche Jesu chu rukuum entu.

Jesu ing Nong abasen vokhehkho Ahaarpa Sebok A-een

(Met 4.12-22; Luk 4.14-15; 5.1-11)

14Atii Johon ensuwr aanuwna, Galili nache Jesu thengka, Thangnang tanii isa chongchu tongka 15#Met 3.2vokhehkho ariir, “Aphachu hungvisa, Thangnang lipah chukho ynneengsa. Barungriir huungruw vokhehkho isa chongchu thacharuw.”

16Jesu ing Galili chifhuw kuurna ahungsirae, ngaklah mee Simon re anaepa Andru ing chifhuwna ichak endeengchu amupa. 17Amana Jesu ing eningna ariir, “Kaanuw ijiiruw, ki ing nenuwchu meesuwr mansuwhva kachuw.” 18Enuw ing engachakchu bathen aeka Jesu aanuwchu enjiipa.

19Amana topoh yndahhak ing enghungsirae, Jebadi sapa Jems re anaepa Johon ing ruwkuwngna ong aeka engachak engaphuwhchu Jesu ing avemu ae. 20Changlaenche Jesu ing enuwchu a-een ae; amana enuw ing ruwkuwng sungna ong empa Zebadi re eneeh mee aechu bathen aeka aanuw enjiipa.

Umlae Ichuwng Mee Yngkheh

(Luk 4.31-37)

21Amana enuw ing Kaparnaum ting siaeka vokhehkho Deennii inii nache Jesu ing meekongnii tingche varuwhka mee aechu amanchuw. 22#Met 7.28,29Jesu ing amanchuw ae nache enruw riimpohsa, yngkhaena ynchii imbe thiimthang ae vaang tamahka, aatuaricheh yngkheh vaang amanchuw ae.

23Changlaenche meekongnii sungna umlae ing ichuwng mee yngkheh heong inche uungka 24ariir, “Nazaret tanii Jesu keningna ynchii tukata nachiiva? Kenuw eemaang ithengvachii? Ki ing nang i achuwvachii ichii kamanghuw sachii, nang i Thangnang tanii ynthiing yngkheh vachii.”

25Changlaenche Jesu ing arakuh, “Nahuw mandae nana aningtanii hung-suwhra.” 26Amana umlae ing atakchu aanukrii aanuwting iruur yndang ing uungka aningtanii taang suwhsa. 27Chutahnache enuw vakhae enruw riimka yngkheh yngkheh ynsiisae, “Havi ynchiiva? Ynchii ithar ymman chuwva? Aatuaricheh thoh ynruw ing umlae ae ningna rapkho chonghak apeeh i, vokhehkho achongchu enuw ingkho emanjii i.” 28Aanuwnache Galili ing aruwkuwr paam vakhaena Jesu ajaechu thangsa.

Jesu ing Pitar Ampuw vokhehkho Ina mee Inempak Amandam

(Met 8.14-17; Luk 4.38-41)

29Enuw ing meekongnii tanii enjungsuwh chakthoh, Jems re Johon ynruwfhuwka Simon re Andru eenting hungruwhsae. 30Changlae Simon ampuwchu riitheng ing nakka hejaarchu Jesu ningna emanthangpa. 31Chutahnache Jesu ing veneengka akiknache jebachuwka ahemangiir tahnache anikungna ariithengchu damka ama ing rukuum atupae. 32Amana inii jungtakka khuri ajungvithoh, ina iki omchaap vokheh-kho umlae ing ichuwng ae chaap Jesu ningting enveruwpohpa. 33Amanache khuwruung tanii mee vakhae thengpohka eenkhaarkung nache yngkongsae. 34Amana reentaang laena ing ina chaap ae chukho amandampa, amanche umlae ae chukho manchong chehmahsa, havi enuw ing Jesu chu achuwva ichii emanghuw khaenava.

Jesu ing Ithamsahnii khaena Hangsuw

(Luk 4.42-44)

35Khuw ahungvaardir mahrirae, Jesu ing hangsuwka michuwr daereng minting vakka athamsah. 36Amana Simon vokhehkho aanruwfhuw ae ing Jesu chu enghenjongpa, 37enuw ing Jesu chu tuwh aeka aningna enriir, “Mee vakhae ing nangchu ynjongnah ae.”

38Jesu ing eningna ariir, “Isa chong katongnii ing reentaang khuw tingkho sitaruw, havi khaene ki ijuwngping.”

39 # Met 4.23; 9.35 Jesu ing Galili paam aangkhengna sika, meekongnii chaapna thamin atong vokhehkho umlae ajaeh chukho athur.

Ynchor yngkheh Amandam

(Met 8.1-4; Luk 5.12-16)

40Amana ynchor mee yngkheh ing Jesu maana khupka aningna athamsah, “Nang ing irupeeh taniive, ki ymmandamcheh sachii.”

41Aning amanchuwh thoh ynruw ing akik ing jeparka, karusa damsara taka ariir. 42Aanuwchak nache ynchor ing ina meechu damka manthiingsa. 43Amana Jesu ing ipirpak chong tahka abathen, 44“Rungaera mee ningna yntanga riirmahdehra, chang-vakonchu vaknana natak ing jaethiim ningna vamandang, vokhehkho mee ae ing natak i manthiing sachii ichii emanghuwnii khaena Mosi ningna vajeer chonghak apeeh inuwzii ing ipeehfhuwchu vapira.” 45Changvakonchu ama ing yngkaeka mee ningna amanthangpa, vokhehkho ynjakrudeh ing mee vakhae ningnache atongpa. Chutahnache atii Jesu ing khuwruung ting yndang ing sichehmahsa; chukhaenache Jesu ing khuwruung tanii ympeenka michuwr daereng aphamchaap nache ongsa, amana ariikiing manrii tanii mee vakhae Jesu ningting ivatheng ae.

Currently Selected:

MAAK 1: MOYO

Highlight

Copy