MAAK 3
3
Jesu ing Akik Ithiipoh ina Amandam
(Met 12.9-14; Luk 6.6-11)
1Jesu ing meekongnii ting athar vokheh varuwhsa, amanache akik ithiipoh ina mee yngkheh heong. 2Amatah nache amana heong aeng Jesu miraar ijongnii khaena Deennii iniina amandamse mandammah ichii engabuwr. 3Ama ing akik ithiipoh ina ningnache havane huungla taka ariir. 4Amana Jesu ing Deennii iniina isa iture isamah itu, ringkum ikarre ithehchu ukhokha isava taka eningna asiiae. Changvakonchu enuw ing basangmah ae. 5Amana Jesu ing embarungriir ipirchu amuthoh athirfhuwr ing akuurna ong aechu enka, akik ithiipoh ina ningnache nakikkha ithoh taka ariir. Akikchu ahengathoh tahnache damsa. 6Amana Pharisi aechu jungsuwh aeka Herot inuwzii aethoh anikungna Jesu chu ithehnii khaena emanseerpa.
7Changlae Jesu ing asebok aethoh Galili chifhuw ting sisae, amana Galili tanii mee vakhae ing Jesu inuw ajii ae; Judia tanii, 8Jerusalem tanii, Idomia tanii, Jordan chiilaar tanii, Taire khuwruung vokhehkho Sidon khuwruung ing aruwkuwr sungna ong mee vakhae aengkho Jesu ing nong atuchu ensiitahna aningting vathengsae. 9#Mk 4.1; Luk 5.1-3Mee vakhae aenche Jesu chu athung ati naeru ing engabur-pohniimah khaena, Jesu ing sebok ae ningna ruwkuwng yngkheh thoraang turuw taka ariir. 10Akhaechuve Jesu ing mee inempak amandam tahnache, Jesu chu iparnii khaena ina ae chaap ingkho enveneeng. 11Amana umlae ing ichuwng mee aeng Jesu chu emu emurae amaensokna tiih aeka nang i Thangnang sapa chuvachii ta aeka uungchak ae. 12Amana Jesu ing mee ing amanghuwniimah khaena eningna ipirpak ing ariir.
Jesu ing Sebok Suum Ariinii Aateer
(Met 10.1-4; Luk 6.12-16)
13Jesu ing amanden mee aechu eenka bung ting hangkarsa, amana enuw ingkho enghenjiipa. 14Amana Jesu ing asebok ynsuwhnii ae khaena, thamin itong amansinii ing, 15umlae aechu ithur enchehnii khaena, ama ing mee suum ariinii iteerka pham athinpae.
16Enuw chuve, Jesu ing Pitar taka a-eenniichak Simon, 17Zebedi sapa Jems re anaepa Johon, (enuw ynniimeh i Jesu ing Bonajes taka a-eenniichak, aruthochuve, bicheeh sapa ae achiiniiva); 18Andru, Philip, Bartholomiu, Methiu, Alphius sapa Jems, Thadius, Kana tanii Simon, 19amanche Jesu arensah Judas Iskariot ipae.
Jesu re Beelzebul
(Met 12.22-23; Luk 11.14-23; 12.10)
20Jesu ing asebok aethoh een yngkhehna varuwhsae; amanache mee inempak vaangkongreehsae, chukhae-nache enuw imaarkho chehmahsae. 21Amana Jesu ing atu ari nongchu mee aeng emutahna Jesu i baveehsa ta aeka engaanseerchu a-eengkuw aeng ensiitahna envajong.
22 #
Met 9.34; 10.25 Amana Jerusalem tanii itheng thiimthang aeng enriir, “Jesu i Beelzebul ing chuwngsa, amanche umlae ae iruwng rumingna umlaechu athurva.” (Beelzebul i umlae ae iruwng achiiniiva.)
23Amana Jesu ing enuwchu enka ynghuwnii thamin ing ichong, “Ynsaang khenche umlae ing umlaechu thurcheh vaata? 24Iruwng lipah yngkheh asungna ynrumah ae naka asae ynniimeh suwhkenta ta ae nave, ama iruwng lipahchu utaraenkho ngiircheh mahnii. 25Eensung yngkhehna ynrumah ae naka asae ynniimeh suwhkenta ta ae nave, ama eensungchu utaraenkho ngiircheh mahnii. 26Amanche umlae iruwng lipahchu asiksik suwhnave, amachu ngiircheh mahnii, changvakonchu chenvaata.”
27Achuw tanga ingkho ipirpak mee een nache varuwh naka atakchu amaensana phuwpmah nave, apeehchu richehmah; phuwpvaang naka apeehchu richehpeh vaata.
28“Ki ing neningna atatak ing kariir-nah, mee vakhae taklina isii icher chaap vokhehkho Thangnang taklina ithipak ing ichong chaap kuhpeeh vaata; 29#Luk 12.10changvakonchu achuw yngkheh ing Ynthiing Laetha taklina ithipak ing ichong chuve utaraenkho kuhpeeh mahnii, akhaechuve ama ing ichen naemah isii arangpa.” 30Hava chong i ariirnii chuve, “Jesu i ynthiingmah laetha ing ichuwngva enchii tahnava.”
Jesu Amnuw vokhehkho Anae ae
(Met 12.46-50; Luk 8.19-21)
31Changlae Jesu amnuw re anae ae vatheng aeka, taangna ngiir aeka Jesu chu va eennii khaena mee yngkheh envechiirpa. 32Changlae mee vakhae aeng Jesu chu ruwkuwr aeka ong ae: amana Jesu ningna enuw ing enriir, “Nangnuw re nanae ae ing taangna ynjongnah ae.”
33Ki kanuw re kanae aechu achuw aepae taka Jesu ing abasang. 34Ama-na atakchu ruwkuwr aeka akuurna ong mee aechu enka ariir, “Enruw, ki kanuw vokhehkho kanae aechu! 35Thangnang ing amandenna isi achuw yngkheh meechu ki kauw kanae, kasar kajuwr vokhehkho kanuw va.”
Currently Selected:
MAAK 3: MOYO
Highlight
Share
Copy
Want to have your highlights saved across all your devices? Sign up or sign in
Moyon Naga New Testament - ITHAR CHONGHAK
Copyright © 2008 by The Bible Society of India
Used by permission. All rights reserved worldwide.
