TIRHKOHTE 1
1
Thlarau Thianghlim pêk tiam
1Theofil, ka lehkha hmasaah khân Isua rawngbâwl ṭan aṭanga vâna lâk chhoh a nih thlenga a thil tih leh a thu zirtîr zawng zawng chanchin ka ziak tawh a; #Lk. 1:1-4. 2a tirhkoh thlante chu Thlarau Thianghlim hmangin thu a chah a. 3A thih hnuin a nung leh tih hriat nân hai rual lohvin vawi tam tak an hnênah a inentîr a, ni sawmli chhûng Pathian ram thu sawiin a inlâr ṭhîn. 4An zînga a awm laiin,#1:4 ‘chaw ei ho’ tih theih a ni. “Jerusalem khua chhuahsan suh u, Pa thutiam ka hrilh che u kha lo nghâk rawh u. 5Johana chuan tuiin a baptis a, nangni erawh chu ni rei lo tê-ah Thlarau Thianghlima baptis in ni ang,” tiin a hrilh a. #Mt. 3:11; Mk. 1:8; Lk. 3:16; Jn. 1:33.
Isua vân lâwn thu
6An lo kal khâwm chuan, “Lalpa, tûnah em ni Israel-te ram i tundinsak leh dâwn?” tiin an zâwt a. 7Ani chuan, “Pain a hun leh ni, ama thu thu-a awm tûra a dah chu nangni lo hriat chi a ni lo ve. 8Nimahsela, Thlarau Thianghlim in chunga a lo thlen hunah thiltihtheihna in la nei ang a; tichuan, Jerusalem-ah te, Judai leh Samari ram pumah te, kâwlkil thlengin ka thuhretute in ni tûr a ni,” a ti a. #Mt. 28:19; Mk. 16:15; Lk. 24:47. 9Chûng thu chu a sawi zawh chuan, an en reng laiin vâna hruai chhoh a ni a, chhûmin an hmuh phâk lohvah a la bo ta a. #Mk. 16:19; Lk. 24:50,51; Jn. 6:62. 10Chutia vâna a chho an thlîr reng lai chuan mi pahnih puan vâr sin an kiangah an lo ding a. #Lk. 24:4. 11“Galili mite u, engati nge vân lam ena in din reng le? He Isua in hnên ata vâna#1:11 Mss ṭhenkhatah ‘vân,’ tih hi a tel lo. lâk chhoh hi, vâna a chho in hmuh ang tak hian a lo kal leh dâwn a ni,” an ti a.
Juda thlâktu thlan thu
12Tichuan, Oliv tlâng an tih aṭang chuan Jerusalem-ah an kîr leh ta a; chu tlâng chu Jerusalem aṭanga sabat ni kal tâwk vêl#1:12 km. khat vêl. a ni. 13Khua an luh chuan an thlenna pindan chungnungah an chho va; chûngte chu Petera te, Johana te, Jakoba te, Andria te, Filipa te, Thoma te, Bartholomaia te, Mathaia te, Alfaia fapa Jakoba te, zealot pâwla mi Simona te leh Jakoba fapa Juda te an ni. #Mt. 10:2-4; Mk. 3:16-19; Lk. 6:14-16. 14An za chuan hmeichhiate#1:14 Mss ṭhenkhatah ‘an nupui fanaute nên,’ tih a ni. leh Isua nu Mari leh Isua unaute nên lungrual takin an ṭawngṭai ho ṭhîn a.
15Ni khat chu, unaute awm khâwmnaah chuan Petera a ding a, an vai chuan za leh sawmhnih vêl an ni. 16“Unaute u, Thlarau Thianghlimin Isua mantute hruaitu Juda thu Davida kâa a lo sawi lâwk, Lehkha Thu kha a lo thleng tûr rêng a ni. #Sam. 41:9. 17Ani chu kan zîngah a tel ve ṭhîn a, kan rawngbâwlpui a ni ṭhîn. 18Ani chuan thil sual tiha a pawisa hlawhin hmun pakhat a lei a, a tla hlum a, a rîl chhuak vek khawpin a pum a ṭet a. #Mt. 27:3-8. 19Chu thu chu Jerusalem-a awm zawng zawngin an hria a, chu hmun chu anmahni ṭawngin, ‘Akeldama,’ an ti a, chu chu ‘Thisen hmun,’ tihna a ni. 20Fakna hla bu-ah hetiang hian ziak a ni:
‘A in leh lo chu ram sela,
A chhûngah tu mah chêng suh se,’ tih leh,
‘A hotu nihna chu mi dangin chang rawh se,’
tih hi. #Sam. 69:25; 109:8.
21Chutichuan, kan Lalpa Isua hova kan chêttlat laia kan zînga tel ve ṭhîn, 22Baptistu Johana hun aṭanga vâna min chhohsan ni thlenga tel ṭhîn mi pakhat, a thawhlehna min hriatpuitu atân kan thlang chhuak tûr a ni,” a ti a. #Mt. 3:14; Mk. 1:9; Lk. 3:21. 23Tichuan, mi pahnih, Josefa, Barsaba an vuah, Justa an tih bawk leh Mathia an ruat a.
24,25“Nang, Lalpa, mi zawng zawng rilru hretu, ama hmuna#1:24 Mss ṭhenkhatah ‘Kohna’ tih a ni. awm tûra a tirhkoh nihna leh a rawngbâwl hna tlâwmsantu Juda hmun luah tûrin he mite pahnihah hian a tu zâwk nge i thlan min hriattîr ang che,” tiin an ṭawngṭai a. 26An pahniha chungah chuan ai an en a, an ai en chu Mathia chungah a tla a, Mathia chu tirhkoh Sâwmpakhatte#1:26 Mss ṭhenkhatah ‘Sâwmpahnihte,’ tih a ni. zîngah chuan chhiar tel a ni ta a.
Currently Selected:
TIRHKOHTE 1: MIZCLBSI
Highlight
Share
Copy
Want to have your highlights saved across all your devices? Sign up or sign in
Mizo (Lushai) C.L. Bible - PATHIAN LEHKHABU THIANGHLIM
Copyright © 1995 by The Bible Society of India
Used by permission. All rights reserved worldwide.
