GENESIS 19

Sodom sualzia

1Vântirhkoh pahnih chuan tlaiah#19:1 Abrahama awmna Hebron aṭang hian Sodom khua hi ni hnih kal a ni. Sodom khua chu an zu thleng a, Lota chu Sodom khaw kulh kawngkhâr bulah a lo ṭhu a. Anni chu a hmuh chuan be tûrin a tho va, hmai lei si-a kûnin chibai a bûk a. 2“Pute u, in chhiahhlawh ina zân riak tûrin lo kal hrâm teh u. In kête in sil ang a, zîng takah in kal leh mai dâwn nia,” a ti a. 3“Ni lo ve, khawlaiah kan riak ang,” an ti a. A sâwm tlut tlut avângin an zui a, a inah chuan an lût ta a. Ei tûr a buatsaih a, chhangpêr a hem hmin a, an ei ta a.

4An mut hmain khuaa mi, Sodom khaw paho, a pui a pangin vêng tina mipa zawng zawng chuan a in chu an rawn hual a. 5Lota chu an au va, a hnênah, “Zânina i mikhualte kha khawiah nge an awm? Han hruai chhuak rawh, kan lo pâwl teh ang,” an ti a.#Ro. 19:22-24. 6Lota chu kawngkhârah chuan a va chhuak a, a khâr leh a, 7“Ṭhiante u, hetiang thil sual hi tih tum lul lo teh hrâm u. 8Mipa la khawih loh fanu pahnih ka nei a, ka rawn hruai chhuahsak ang che u, in duh duhin in lo ti dâwn nia. Ka mikhual, ka in rawn pante hi zawng, eng mah tih lul suh u,” a ti a. 9“Kiang rawh, nang mikhual mai mai, kan chunga thu neih i tum vei em ni? Anni aiin kan sawisa na zâwk mai tûr che nia,” an ti a. Lota chu an rawn chîm ta huk a, kawngkhâr chu chhut chhiat an tum a. 10Vântirhkohte chuan an ban a, Lota chu an man a, inah an hnûk lût a, kawng chu an khâr leh ta a. 11Kawngka bula awm a lian a tê chu an mit an chhun delsak#19:11 Vântirhkohte hian êng an tichhuak a, chu chuan an mit a tidel a ni, a del hlen tihna a ni lo. a, kawngkhâr chu an hmu thei ta lo va.#2 Lal. 6:18.

12Mite chuan Lota hnênah, “He khuaah hian mi dang, fapa te, fanu te, laichîn hnai i neih apiangte khua aṭang hian hruai chhuak rawh. 13He khua hi kan tichhe dâwn, an chanchin Lalpa benga thleng chu a râpthlâk êm a, tichhe tûrin min tîr a ni,” an ti a. 14Tichuan, Lota chu a chhuak a, a fanu neitu tûr, a mâkpa hualte chu a va hrilh a, “Tho ula, kan khua hi tlânsan rawh u. Lalpa chuan a tichhe dâwn,” a ti a. A mâkpa hualte chuan fiamthu a thawhah an lo ngai a.

15Khawfîng a chahin vântirhkohte chuan Lota chu an tur sek a, “Hmanhmawh rawh, i nupui leh i fanu pahnih, heta awmte hi hruai chhuak teh, he khaw hremna hi in tuar ve dah ang e,” an ti a. 16Ani erawh chu muangchângin a che a. Tichuan, mite chuan a nupui leh a fanute kut chu a kut nên an chelh a, anni chu Lalpa chuan a lainat êm si a; chuvângin, khua ata chu an kai chhuak ta a. #2 Pet. 2:7. 17An hruai chhuah hnu chuan, “Kal thuai thuai rawh u, hnung lam pawh hawi suh u, phaiah hian khawiah mah châwl hek suh u, tlângahte sâwn tlân rawh u, in tuar ve hlauh dah ang e,” Lota hnênah chuan an ti a. 18Lota chuan, “Ni lo ve, ka pu, 19min chhanhima min khawngaih ta sa sa, i chhiahhlawh hi dawh hrâm teh; tlângram pana ka tlân chuan he thil ṭha lo hian min nang hman ang a, ka thi mai ang. 20Ka hmaa khaw te tak tê saw tlân nân a hnai ber a, tah sâwn ka tlân ang e, ngaihmawh tham pawh a nih loh saw. Kan thih loh nân tah sâwn kan tlân mai ang e,” a ti a.

21“I thu chu ka zâwm mai a ni ang chu, i khaw sawi chu ka tichhe lo nâng e. 22Hmanhmawh la, tah chuan tlân rawh; i thlen hma chu eng mah ka tih theih loh hi,” a ti a. Chuvâng chuan, he khua hian Zoar#19:22 ‘Eng mah tham lo’ tihna. tih hming a pu ta a ni.

23Lotan Zoar khua a thlenin chu ramah chuan ni a chhuak ta a. 24Tichuan, vân aṭangin, Lalpa mei, kât kâng chu Lalpa chuan Sodom leh Gomora khuaah chuan a sûrtîr ta a.#Mt. 10:15; 11:23,24; Lk. 10:12; 17:29; 2 Pet. 2:6; Jud. 7. 25Chûng khuate chu a tichhe vek a, phaizâwla khuate leh a chhûnga chêngte chu leia thil ṭote lamin a tichhe ta vek a. 26Lota nupui erawh chuan a thlîr kîr vei a, chi khâwn dingah a chang ta a. #Lk. 17:32.

27Abrahama chu zîng takah a tho va, Lalpa bula a dinna hmunah khân a kal a. 28Sodom leh Gomora khua te leh a phairam pum chu a zu thlîr vêl a, meipui khu anga khu luih luih chauh chu a hmu thei a ni. 29Pathianin phairam khuate a tihchhiat khân Abrahama chu a hre reng a. Lota chênna khua a tihchhiat pawh khân Lota chu a chhan chhuahsak a ni.

Moab leh Amon mite ṭobul

30Zoar khuaa awm reng a hlauh avângin Lota chu a fanu pahnih nên tlângramah an chho va, an awm ta a. A fanu pahnih nên chuan pûkah an awm a ni. 31A upa zâwk chuan a nau hnênah, “Kan pa hi a tar tawh hle a, khawvêl pum pui tih dân anga min nei tûr mipa an awm tawh si lo. 32Ti rawh, kan pa hi uainin hrai ila, a bulah i mu ang; Tichuan, kan pa chi a mang dâwn lo nia,” a ti a. 33Chumi zân chuan an pa chu uainin an hrai rui a. A upa zâwk chu a pa bulah chuan a va mu a, ani chuan a lo mut lai emaw, a thawh leh lai emaw a hre lo. 34A tûkah chuan a upa zâwk chuan a nau hnênah, “Ngai teh, nizân khân kan pa bulah ka mu a, zâninah pawh uainin i hrai leh ang; a bulah va mu ve ang che; tichuan, kan pa chi a mang dâwn lo nia,” a ti a. 35An pa chu uainin an hrai a, a naupang zâwk chu a tho va, an pa bulah chuan a va mu a, a lo mut lai emaw, a thawh leh lai emaw a hre lo. 36Lota fanu pahnih chuan an pa fa chu an pai ve ve ta a. 37A upa zâwk chuan fapa a nei a, a hmingah ‘Moaba’ a sa a; chu mi chu tûnlaia Moab-ho thlahtu hi a ni. 38A naupang zâwk pawh chuan fapa a nei a, a hmingah ‘Ben-amona’#19:38 Moab hi ‘Pa laka mi’ tihna a ni. Ben-amon hi ‘ka mite fa’ tihna a ni. a sa a, tûnlaia Amon mite thlahtu hi a ni.

Currently Selected:

GENESIS 19: MIZCLBSI

Highlight

Copy