GENESIS 39

Josefa leh Potifara nupui

1Josefa chu Ismael-ho chuan Aigupta ramah an hruai chhuk a, Aigupta mi, mi pakhat, Farawa hnuaia milian, vêngtu hotu Potifara hnênah an hralh a. 2Lalpa chuan a awmpui avângin Josefa chu a hmuingîl hle zêl a; a pu, Aigupta mi chuan, in chhûng lam hna a thawhtîr a.#Tirh. 7:9. 3Lalpa chuan a awmpui a, a thiltih apiangah a hlawhtling zêl tih a pu chuan a hmu a. 4A duh hle a, amah viltu bîkah a ruat a. An chhûngkaw enkawltu leh a neih zawng zawng kawltua a dah chinah, 5Josefa avângin Lalpa chuan Aigupta mi chhûngkua chu mal a sâwm a, a neih zawng zawngah, in lam leh ram lamah, Lalpa malsâwmna chu a dawng a. 6A neih zawng zawng chu Josefa kutah a dah vek a, ani a awm phawt chuan eng mah a ngaihtuah lo, a ei tûr bîk#39:6 Aigupta miten Hebrai mite an ten a, an khawih hnu chu an ei duh lo. tih chauh lo chu.

Josefa chu tlangvâl tlâwntlai ṭha deuh, hmêlṭha tak a ni a. 7Nakin deuhvah chuan a pu nupui chuan Josefa chu a ngaizâwng a, mutpuiah a thlêm ta a. 8Ani chu a ṭang a, a pu nupui hnênah chuan, “Kei ka awm phawt chuan ka pu hian in chhûng lam thil eng mah a ngaihtuah lo; a neih zawng zawng min kawltîr vek a ni. 9He in chhûngah hian kei aiin thu a nei chuang lo; nang, a nupui tih chauh lo hi chu ka tân ui pawh eng mah a nei lo. Chuvângin, Pathian lakah hetiang thil sual hi engtin nge ka tih theih ang?” a ti a. 10Ni tin a thlêm ngut ngut a; mahse, a duh lo tlat a, a bul hnaia awm pawh a duh lo.

11Ni khat chu in chhûngah hna thawk tûrin a lût a, chhiahhlawh tu mah in chhûnga an awm loh lai a ni. 12A puanah chuan a lo man a, “Ti rawh, i mu dûn ang,” a ti a; mahse, a tlân chhuahsan ta a, a puan erawh chu a kutah chuan a tlânsan a. 13A tlân chhuak a, a puan a tlânsan tih a hriat chuan, 14chhiahhlawhte chu a au ta chiam a, “En teh u, Hebrai mi, mi timualpho tûr a rawn hruai lût a lo nih hi. Min mutpui tumin khum pindanah a lo lût a; 15mahse, theih tâwkin ka au va, puan pawh chuh lovin a tlân ta a ni,” a ti a.

16Josefa pu a lo haw hma chuan puan chu a kawl a. 17A hnênah, “Hebrai mi i rawn hawn khân min sual a tum a, a lo lût a. 18Mahse, ka au chiam a, a puan pawh chuh lovin a tlânchhe ta a ni,” tiin chanchin a lo hrilh a. 19‘I bawihin chutin khatin min ti’ a tih a han hriat chuan Josefa pu chu a thinur ta hle a. 20Tichuan, Josefa chu a hruai a, lal lung in tâng dahna lung inah a tântîr ta a. 21Tân ina a awm pawh chu Lalpa chuan a awmpui a, a khawngaih a, tân in vêngtu chu a duhsaktîr a.#Tirh. 7:9. 22Tân in vêngtu chuan lung in tâng zawng zawng enkawltuah a hmang a; tih tûr awm apiang a titu a ni ṭhîn. 23Lalpa chuan a awmpui avângin tân in vêngtu tân eng mah tih ve a ngai lo, a tih apiangah Lalpa chuan a tihmuingîl zêl a ni.

Currently Selected:

GENESIS 39: MIZCLBSI

Highlight

Copy