GENESIS 41

Josefan Farawa mang a hrilh fiah

1Kum hnih hnuah chuan Faraw-an mumang a nei a. Nail lui kamah a lo ding a. 2Lui aṭang chuan bâwngpui pasarih, thau ṭha tak tak an lo chhuak a, lui kam rairuang hmunah chuan an tla ta a. 3An hnung maiah chuan bâwngpui pasarih chêr chhe êm êm an lo chhuak a, a hmasate bulah khân an lo ding a. 4Bâwng chêr chhe tak tak chuan bâwng thau tak tak chu an ei zo ta mai a. Farawa chu a ṭhangharh ta a.

5A han muhîl leh a, mang a nei zawm a: buh kûng khatah vui sarih, ṭha tak, bit deuh a lo awm a. 6A dawtah vui sarih, sîn tê tê, thli lum chhêm ro rim rem a lo awm bawk a. 7Buh vui pasarih, sîn tê tê chuan vui sarih, ṭha pui pui chu an ei zo ta mai a. Farawa chu a ṭhangharh a, a mumang a lo ni a.

8A tûk zîngah chuan Farawa chu a buai rilru hle a. Aigupta mi, arsi chhui thiam te leh mi fing zawng zawng chu a ko va. Farawa chuan a mang chu a hrilh a; mahse, tu man an hrilh fiah thei lo.#Dan. 2:2. 9No kengtu lu ber chuan Farawa chu a bia a, “Vawiin hian ka haihawtzia ka hriat chhuah chu. 10Vawi khat, Farawa chu a chhiahhlawh chungah a thinur a, vêngtu hotu ber awmnaah kei leh chhang siamtu kha min tântîr a. 11Zan khat chu kan pahnihin mumang kan nei ve ve a, a awmzia erawh chu a inang lo. 12Hebrai saltâng tlangvâl pakhat, vêngtu chhiahhlawh chu a awm ve a; kan mumang chu kan hrilh a, min hrilh fiahsak a. 13Min hrilh ang chiahin thil a lo awm ta a. Kei chu ka hna ngaiah min dah leh a, chhang siamtu erawh chu thingah khai a nih tâk kha,” a ti a.

14Farawa chuan Josefa chu a kohtîr ta nghâl a. Rip chhûng aṭangin an la chhuak vat a; a inmêt fai a, a silhfên a inthlâk a, Farawa hmaah a va inlan ta a. 15Farawa chuan Josefa hnênah, “Tu ma hrilh fiah theih loh mumang ka nei a ni; mahse, nang chuan i hriat veleh i hrilh fiah thei an ti che a ni,” a ti a. 16Josefa chuan Farawa chu a chhâng a, “Kei chuan thei lo ve; Pathian erawh chuan Farawa mumang chu dik takin a hrilh fiahsak ang,” a ti a.

17Farawa chuan Josefa hnênah, “Ka mumangah chuan Nail lui kamah ka lo ding a. 18Lui aṭang chuan bâwngpui pasarih, thau mûm ṭha tak tak an lo chhuak a, a kam rairuang hmunah chuan an tla a. 19An hnu lawkah chuan bâwngpui pasarih, berh êm êm, chêr chhe tak tak, thêp thin then hi an lo chhuak ve a - Aigupta ram zawng zawngah chutiang êma bâwng chêr chhia ka la hmu ngai lo. 20Bâwng chêr chhe êm êmte chuan bâwng thau tak lo chhuak hmasate chu an ei zo va. 21An ei zawh hnu pawh chuan a hma ang bawk khân an la thêp ta tho va: tu man a dangte kha an ei tih hriat tûr a ni lo. Tin, ka han harh ta a. 22Mumang ka neih lehah chuan buh kûng khatah vui sarih, lian tak tak leh pum ṭha tak tak ka hmu a. 23A dawtah buh vui pasarih, sîn tê tê, thli lum chhêm ro rim rem a lo chhuak leh a. 24Buh vui chhe tê tê chuan vui ṭha pui pui chu a lem zo ta maiin ka hmu a. Tin, arsi chhût thiam te ka hrilh a; mahse, tu mah hrilh fiah thei an awm lo,” a ti a.

25Josefa chuan Farawa hnênah, “Farawa mumang hi awmze thuhmun a ni. Pathianin a thil tih tûr Farawa hnênah a hrilh lâwk a nih hi. 26Bâwng thau tak tak pasarih kha kum sarih entîrna a ni, buh vui ṭha tak tak pasarih pawh kum sarih entîrna bawk a ni; mumang awmze thuhmun a ni. 27Bâwngpui chêr chhe tak tak rawn zuitu pawh chu kum sarih ṭâm tla tûr entîrna a ni. Chutiang bawkin buhvui sarih khawchhak thli chhêm ro, chhe tê tê kha kum sarih ṭâm tla tûr entîrna a ni. 28Farawa ka hrilh ang chiah khân Pathian chuan a thiltih tum Farawa hnênah a hrilh lâwk a ni. 29Kan hma kum sarih chhûng hian Aigupta ram zawng zawngah buh tawntawin a haw ang a; 30mahse, chu chu ṭâmpui mitthiin a zui ang a, tawntawa buh a haw lai kha an theihnghilh vek ang, ṭâm chuan ram chu a tichhia ang. 31Ramah ṭâm a nasat dâwn êm avângin buh tam lai hnuhma rêng rêng kha hmuh tûr a awm lo vang. 32Faraw-an awmze thuhmun mang a neih nawn hi Pathianin chu thil chu a nemnghet a, a rawn tithleng thuai dâwn tihna a ni.

33“Farawa chuan mi remhria leh fing zawng sela, Aigupta ram enkawltu atân siam rawh se. 34Farawa chuan hotute ruat sela, kum ṭhat kum, kum sarih chhûngin Aigupta ramah, buh chu hmun ngaa hmun khat chhûntîr sela. 35Kan hma kum sarih, kum ṭha tak lo awm tûr chhûng hian buh chu khawn khâwm sela, 36Farawa thupêkin buhte chu chhêk khâwm ni rawh se; khawpuia an la ei atân chhûn khâwm ni rawh se. Aigupta rama kum sarih ṭâm tla tûr atân chûng chu khêk ni rawh se, ṭam avânga ram pum a boral loh nân,” a ti a.

Aigupta ram awptuah Josefa ruat a ni

37Chûng thu chu Farawa leh a khâwnbâwlte chuan ṭha an tih zâwng tak a ni. 38Farawa chuan a hote hnênah, “Ani ang Pathian thlarau awmna hi kan hmu zo dâwn em ni?” a ti a. 39Farawa vêk chuan Josefa hnênah, “Pathianin hêng thil thleng tûr hi a hriattîr che a, nang anga thil hre thûk leh fing tu mah an awm lo vang. 40Ka ram enkawltu i ni ang a, ka mite chu i thu thuin an awm ang, thuneihnaa mi dawttu i ni ang,” a ti a.#Tirh. 7:10. 41Farawa chuan Josefa hnênah heti hian a ti bawk: “Ngai teh, Aigupta ram zawng chunga hotu-ah ka siam tâk che hi,” a ti a. 42Farawa chuan a hming nemna zungbun chu a phawi a, Josefa chu a buntîr a. Puan zai sîn a sintîr a, rangkachak khaidiat a awrhtîr bawk a.#Dan. 5:29. 43A sakawrtawlailîr ṭha ber dawttuah a chuantîr a, a hmaah chuan, “Kiang ru,”#41:43 Aigupta ṭawngin ‘Abrek’ an ti. ‘Ngaithla ru,’ inring ru,’ tihna pawh a ni thei. Lal a lo kalin mipui an lo inthlahdah thei, ‘lal a lo kal e’ tih an hriattîr dân a ni. Lalber dawttuah an nemnghet ta a ni, a kalna apiangah ‘Abrek’ tituin hma a hruai zêl. tiin an au va. Chutiang chuan Aigupta ram chunga hotu-ah ruat a ni.

44Farawa chuan Josefa hnênah, “Farawa ni mah ila, i thu lo chuan Aigupta ram pumah tu mahin an kut an ke an lek tûr a ni lo,” a ti a. 45Farawa chuan a hmingah Zafenat-panea#41:45 Josefa hming thar hi ‘Pathian a ṭawng, Pathian a nung’ tihna a ni âwm e. a vuah a, On khaw puithiam Potifara fanu Asenathi#41:45 Josefa nupui hming hi Aigupta mite pathiannu chu Nathu a ni, ‘Nathu pêk’ tihna a ni. chu nupuiah a neihtîr a. Aigupta ram pumah Josefa chu an hre ta a.

46Josefa chu kum sawmthum a nihin Farawa hnuaiah a thawk ṭan a, Farawa bul aṭang chuan a chhuak a, Aigupta ram chu a fang chhuak a. 47Kum ṭhat kum sarih chhûng chuan buh tawntawin a haw a. 48Kum ṭhat kum sarih chhûnga thlai thar chi tinrêng chu a chhûng khâwm a, khawpuiahte chuan a chhêk a; khawpui tinah, a vêl lova buh haw chu, a chhêk zêl a. 49Josefa chuan buh tam tak, tuifinriat kama ṭiauvaivut anga tam a chhêk rui a, a tam êm avângin a zât pawh a chhiar sêng ta lo va.

50Ṭâm a tlâk hmain On khaw puithiam Potifara fanu Asenathi chuan Josefa chu fapa pahnih a hrinsak a. 51A fa tîr chu a hmingah Manasea#41:51. Manasea hi ‘Theihnghilhtîra’ tihna a ni. a sa a, “Pathianin ka vânduaina leh ka nu leh pa min theihnghilhtîr ta a ni,” a tihna a ni. 52A fa pahnihna hmingah Efraima#41:52 Efraim hi ‘fa neihtîra’ tihna a ni a sa a, “Ka hrehawm tuarna ramah Pathianin min tipung,” a tihna a ni.

53Aigupta rama buh tawntawa a haw hun chhûng chu a tâwp ta a, 54ṭam kum sarih chu Josefa sawi ang khân a inṭan ta a, ram tinah ṭâm a tla a, Aigupta ram zawng zawngah erawh chuan ei tûr a awm.#Tirh. 7:11. 55Aigupta ram pumah pawh chuan an ṭam ve ta a. Farawa hnênah an kal a, ei tûr an dîl a. Farawa chuan Aigupta mite chu, “Josefa hnênah kal rawh u, a sawi ang apiang chu ti ang che u,” a ti zêl a. #Jn. 2:5.

56Ṭâm chu ram puma a tlâk tâk vek hnu chuan a buh chhêkna inte chu a hawng a, ṭâm chu Aigupta ramah chuan a nat êm avângin buh chu a leitîr a. 57Khawvêl pum puiah pawh an ṭâm nasat êm avângin Josefa hnênah ram tina mi an lo kal a, pûr an rawn chaw ṭhîn a ni.

Currently Selected:

GENESIS 41: MIZCLBSI

Highlight

Copy