LUKA 12

Vervêkna laka fîmkhur tûr

(Mt. 10:26,27)

1Chutih chhûng chuan mipui sâng tam tak inrap nûlh nûlh khawp an lo pung khâwm a, ani chuan thu a sawi a, a zirtîrte hnênah phei chuan, “Farisai-te dawidim vervêkna lakah chuan fîmkhur rawh u.#Mt. 16:6; Mk. 8:15. 2Eng mah thup hlen theih a ni lo, a lang leh mai ṭhîn; eng mah zêp hlen theih a ni hek lo, hriat chhuah a ni leh mai ṭhîn. #Mk. 4:22; Lk. 8:17. 3Zân thima sawi chu a tûk êngah miin an hria ang, pindan chhûngrila in sawi rûk chu in chunga chuangin an tlângaupui ang.

Hlauh tûrte

(Mt. 10:28-31)

4“Ka ṭhiante u, ka hrilh a che u, taksa tihluma, chumi hnua eng mah tih thei tawh lo che u chu hlau suh u. 5Tu nge hlauh tûr ka hrilh ang che u; taksa tihluma, chumi hnu pawha hremhmuna paih theitu che u chu hlau rawh u; a ni, ka hrilh a che u, amah mawlh chu hlau rawh u. 6Chawngzawng panga pawisa#12:6 Grik ‘Asarion,’ chutiang 16 chuan Denari khat a tluk. pahnihin an hralh ṭhîn lo vem ni? Pathian erawh chuan an zînga pakhat tê mah a hmaih ngai lo. In samzaite lam pawh a chhiar vek asin. 7Hlau suh u, chawngzawng tam tak aiin in hlu zâwk e. #Mt. 12:12; Lk. 21:18; Tirh. 27:34.

Mite hmaa Krista ṭan

(Mt. 10:32-33; 12:32; 10:19-20)

8“Ka hrilh a che u, mite hmaa mi ṭan apiang chu Pathian vântirhkohte hmaah Mihring Fapa hian a ṭan ve ang. 9Nimahsela, mite hmaa mi phat chu Pathian vântirhkohte hmaah a phat ve ang. #Mk. 8:38; Lk. 9:26; 2 Tim. 2:12. 10Tin, Mihring Fapa chu an sawisêl pawhin an sawisêlna chu ngaihdam a ni ang; amaherawhchu, Thlarau Thianghlim meuh pawi sawi chu ngaihdam a ni lo vang. #Mt. 12:32; Mk. 3:29.

11“Tin, sunagog hotute leh thuneitute hmaa an hruai hunah che u chuan, chhân dân tûr emaw, in sawi tûr emaw engto suh ang che u, #Mt. 10:19,20; Mk. 13:11; Lk. 21:14,15. 12a hun takah Thlarau Thianghlim chuan in sawi tûr a hrilh dâwn che u a ni,” a ti a.

Mi hausa tehkhin thu

13Mipui zînga pakhat chuan, “Zirtîrtu, ka unaupa hnênah ka pa ro mi sem ve tûrin mi hrilhsak rawh,” a ti a. 14Ani chuan, “Mihring, nangni tân rorêltuah leh ro semtuah tu nge mi siam?” a ti a. 15Tin, an hnênah, “Fîmkhur ula, awhna rêng rêng lakah invêng rawh u; mihring nunna hi a hausaknaah a innghat lo ve,” a ti a.

16An hnênah tehkhin thu a sawi a: “Mi hausa tak pakhat hi a lo a hlâwk êm êm a. 17Tichuan, a inngaihtuah a, ‘Engtin nge ka tih tâk ang? Ka buh leh bâl dah khâwmna ka nei sêng ta si lo,’ a ti a. 18‘Heti hian ka ti teh ang; ka buh inte ka ṭhiat ang a, a aia lianin ka sa ang a; chutah chuan ka buh leh bâl leh ka sum zawng zawng ka chhêk khâwm ang. 19Tin, ‘Pa vânnei! Kum rei tak daih sum tam tak i khâwl tâk hi; châwl la, eiin bâr la, nuam takin awm rawh, ka ti ang,’ a ti a. 20Nimahsela, Pathianin a hnênah, ‘Mi â, zânin hian i nun an lâksak dâwn che a ni. I thil deh chhuahte kha tuten nge nei ta ang?’ a ti a. #Jer. 17:11; Job. 27:8; Sam. 29:6. 21Mahni tâna sum khâwla, Pathian lama ngah si lo chu, chuti mai chu a ni,” a ti a.#12:21 Mss ṭhenkhatah he châng hi a tel lo.

Lungkham neih loh

(Mt. 6:25-34)

22A zirtîrte hnênah chuan, “Chuvângin, ka hrilh a che u, nun nân eng nge in ei anga, in taksa tân eng nge in sin ang tih lungkham suh u. 23Ei tûr aiin nunna a pawimawh zâwk a, silhfên aiin taksa a pawimawh zâwk bawk. 24Choakte hi ngaihtuah teh mah u, buh an tuh lo va, an seng hek lo, zêm an nei lo va, buh in pawh an nei hek lo; nimahsela, Pathianin a châwm ṭhîn; nangni hi savate ai chuan in hlu zâwk daih a ni. 25Nangni zîngah lungkham avângin tu nge mahni nun tisei hret thei#12:25 ‘mahni taksa tawng khata tisâng thei’ tih theih a ni. 26Hemi tê pawh ti thei si lo, engati nge thil dang in lungkham?

27“Tûktinpâr ṭhan dânte hi ngaihtuah teh u, hna an thawk lo va, la an dek hek lo; nimahsela, ka hrilh a che u, Solomona meuh pawh a ropui thei ang bera a inthuam khân, hêng tûktinpâr pakhat tluk pawh hian chei a ni lo. #1 Lal. 10:4-7; 2 Chr. 9:3-6. 28Chutichuan, ram hnim, vawiina nung, a tûka meia tuah leh mai tûr mah Pathianin chuti kauva a chei si chuan, aw nangni, rin tlêmte u, chûngte ai chuan a va thuam nasa zâwk dâwn che u êm! 29Nangni zawng, ei leh in tûr ngaihtuahin buai phili suh ula, mangang hek suh u. 30Hêng hi khawvêl mi zawng zawng buaipui ber a ni; in Pain hêngte hi nangni pawhin in mamawh ve tho tih a hria e. 31Ama ram chu zawng zâwk ula, tichuan, hêngte pawh hi a pêk belhchhah dâwn che u nia. 32Pâwl tlêmte u, hlau suh u, ram pêk che u hi in Pa lâwmzâwng tak a ni e.

Vâna ro

(Mt. 6:19-21)

33“In neih apiang hralh ula, pachhiate pe rawh u, vânah, rûkru kal lohnaah, thîm ei theih lohnaah chuan, tangka ip phai thei lo te, sum ral thei lo te insiam rawh u. #Lk. 18:22. 34In ro awmna apiangah in rilru pawh a awm ṭhin hi.

Chhiahhlawh inring reng

35“Insiam sa diamin, khâwnvâr chhit sa nên inpeih reng rawh u. #Mt. 25:1-13; Mk. 13:33-37. 36An pu lawichaw ei hawin kawngkhâr a rawn kik lo hawn vat thei tûra nghâk rengte ang hian awm rawh u. 37An pu lo hâwngin amah lo nghâk rengtu bawih a rawn hmuh chu an nihlawh e. Thu dik ka hrilh a che u, ani chu a insiam ang a, anni chu chaw a kîltîr ang a, an chaw ei a vil ang. 38Zânlaiah emaw, khawvâr lamah emaw a lo hâwna, chutianga bawih a rawn hmuhte chu an nihlawh e. 39Hei hi in hria e, rûkru lo kal hun tûr in neituin hria sela, a vêng ang a, a in a reh pawhtîr lo vang. #Mt. 24:43,44; 1 Thes. 5:2; 2 Pet. 3:10; Thup. 3:3; 16:15. 40Nangni pawh inpeih rengin awm rawh u, Mihring Fapa chu in beisei loh hunah a lo kal hlauh dah ang e,” a ti a.

Chhiahhlawh rinawm

(Mt. 24:45-51)

41Petera chuan, “Lalpa, he tehkhin thu hi keimahni chauh nge min hrilh mi zawng zawng?” a ti a.

42Lalpa chuan, “An puin a chhiahhlawhte hotu-ah leh an chaw sem huna semsak ṭhîntu atân sum enkawltu rinawm tak leh fing tak a ruat tûra chu tu nge ni ang? 43An pu lo kal huna bawih chutianga ti a rawn hmuh chu a nihlawh e. 44Dik takin ka hrilh a che u, a neih zawng zawng chunga hotu-ah a rawn siam ang. 45Amaherawhchu, bawih chuan, ‘Ka pu hi a lo haw lawk dâwn lo ve,’ ti rilruin bawih dangte chu a hmei a pain lo vêl sela, eiin lo rui buai hle mai sela, 46chu bawiha pu chu a rin loh ni-ah, a hriat loh dârah a lo kal ang a, bung hnihah a rawn chhuah ang a, mi rinawm lote chan a rawn chantîr ang. 47Bawih, an pu duhzâwng hre reng chunga ti lo leh inpeih lo chu na taka vuak an ni ang.#Deut. 25:2,3; Num. 15:29,30. 48Amaherawhchu, hriat loh avânga hremna khawp thil ti chu nêp deuhva vuak an ni ang. Tam tak an pêk apiangte lakah chuan tam tak an phût ang, tam tak an kawltîr apiangte lakah tam tak an beisei ang.

Isua vânga intihdarh

(Mt. 10:34-36)

49“Khawvêlah mei chhuah tûra lo kal ka ni, tûnah pawh hian kâng tawh pang se ka va ti êm! 50Baptisma chan tûr pawh ka nei, chumi ka tlingtlâk hma chu ka thaw a va pik êm! #Mk. 10:38; Jn. 12:27. 51Leiah hian rem lêntîr tûra lo kal emaw mi ti elo? Hnai lo ve, ka hrilh a che u, do lêntîr tûra lo kal ka ni asin. 52Tûn hnuah chuan chhûng khata mi panga an indo vang a, pathumte chuan pahnihte chu an do vang a, pahnihten pathumte chu an do vang. 53Pain a fapa a do vang a, fapain a pa: nuin a fanu a do vang a, fanuin a nu; nuin a mo a do vang a, movin a nu,” a ti a. #Mik. 7:6.

A hun hriatthiam

(Mt. 16:2,3)

54Tin, mipui hnênah pawh chuan, “Khawthlang lama chhûm lo chhuak in hmuhin, ‘ruah a sûr dâwn e,’ in ti nghâl ṭhîn a, a sûr ngei ṭhîn. 55Chhim thli a lo tleh lahin, ‘khua a lum dâwn,’ in ti a, a lum ngei ṭhîn. 56Nangni mi vervêkte u, lei leh vân enin khaw chin in hrethiam thei si a, engtizia nge tûnlai hun awm dân hi in hriatthiam theih loh?

I khingpui nên inrem rawh

(Mt. 5:25,26)

57“A dik leh dik lo chu engati nge nangni pawhin in thliar mai loh? 58Thuneitu hmaa i khingpui nên in lan dâwnin, kal pahin a laka fihlîmna kawng zawng hrâm rawh, chuti lo chu rorêltu hmaah a hnûk lût hlauh dah ang che. Rorêltu chuan pulis hnênah a hlân ang chia, pulis chuan tân inah a khung ang che. 59Ka hrilh a che u, pawisa#12:59 ‘lepta’ tih a ni, Juda-te pawisa tlêm ber; lepta 96 chu denarion khat. pakhat tê pawh in tlâk kim hma chu chuta ta chu in chhuak tawp lo vang,” a ti a.

Currently Selected:

LUKA 12: MIZCLBSI

Highlight

Copy