LUKA 15

Berâm bo

(Mt. 18:12-14)

1Vawi khat chu chhiahkhawntute leh mi sual tam takin a thu ngaihthlâk tumin an rawn pan a. 2Farisai-te leh Dân zirtîrtute chuan, “He pa hian mi sualte a kâwm a, chaw te pawh a eipui ṭhîn,” tiin an phunnawi a. #Lk. 5:29,30.

3Ani chuan an hnênah he tehkhin thu hi a sawi a, 4“Nangni zîngah tuin emaw berâm za neiin, an zînga pakhat bo ta sela, phûlah sawmkua leh pakua te chu hnutchhiahin, a bo chu a hmuh leh hma chu tu nge zawng lo vang? 5A hmuh leh chuan lâwm takin a kokiah a pu ang a, 6in a va thlen chuan a ṭhiante leh a ṭhenawmte a ko khâwm ang a; ‘Ka berâm bo kha ka hmu leh ta, hawh u, i lâwm ang u,’ a ti ang. 7Ka hrilh a che u, chutiang bawkin mi fel sawmkua leh pakua sim chuan tûr nei lote chungah ai chuan mi sual pakhat sim chungah vâna mite lâwmna a nasa zâwk a ni.

Duli hloh tehkhin thu

8“Tin, hmeichhia tu pawh duli#15:8 ‘drachma’ tih a ni. Grik tangka, Denarion tluk vêl, berâm pakhat lei theihna, inhlawhfa ni khat hlawh a ni. sâwm neiin pakhat chu hloh ta se, khâwnvâr hâla hmun phiatin, a hmuh leh hma chu tu nge ngun taka zawng lo vang? 9A hmuh leh chuan a ṭhiante leh a ṭhenawmte chu a ko khâwm ang a, ‘Ka duli hloh ka hmu leh ta e, hawh u, i lâwm ang u,’ a ti ang. 10Ka hrilh a che u, chutiang bawkin Pathian vântirhkohte zîngah chuan mi sual pakhat sim chungah lâwmna a nasa ṭhîn,” a ti a.

Fapa tlân bo

11A sawi zêl a, “Mi pakhat hian fapa pahnih a nei a; 12a naupang zâwk chuan a pa hnênah, ‘Ka pa, ka ro chan ai chu mi pe rawh,’ a ti a. Tichuan, a sum chu an hnênah a sem ta a. #Deut. 21:15-17. 13Tin, ni rei lo tê-ah a fapa naupang zâwk chuan a chan ai zawng zawng chu a la khâwm vek a, ram dang hla takah a kal ta a; chutah chuan nuam tâwlin a intlakral ta mai mai a. 14A sum neih a deh ral vek hnuin chu ramah chuan ṭâm nasa tak a lo tla a, ei tûr a tlachham ta a. 15Tichuan, chumi rama chêng mi pakhat a bêl ta a, ani chuan a lo lamah vawk rual enkawl tûrin a tîr a. 16Tin, vawk chawte chu ei tak a nâp a, tu man ei tûr an pe si lo.

17“Tin, a han inhriat chhuah veleh, ‘Ka pa hlawhfate ei sên loh nei an tam tehlul vei nên, kei lah hetah rilṭâmin ka thi mai dâwn si a. 18Ka tho vang a, ka pa hnênah ka kal ang a, a hnênah, ‘Ka pa, vâna mi chungah leh i chungah ka lo tisual ta a ni e. 19I fapaa vuah tlâk ka ni ta lo, i hnêna inhlawhfa pakhat angin mi chhawr ve rawh, ka ti ang,’ a ti a.

20“Tichuan, a tho va, a pa hnênah a kal ta a. Hla taka a la awm laiin a pa chuan a lo hmu a, a khawngaih ta êm êm a, a tlân a, a va pawm a, a fâwp ta ngawih ngawih a. 21A fapa chuan, ‘Ka pa, vâna mi chungah leh i chungah thil ka tisual a ni e, i fapaa vuah tlâk ka ni ta lo,’ a ti a. 22A pa erawh chuan a bawihte hnênah, ‘Kawr ṭha ber kha han la thuai ula, hâktîr rawh u, zungbun buntîr ula, pheikhawk pawh buntîr rawh u; #Gen. 41:42; Zak. 3:4. 23bâwngno châwmthau kha han kai ula, talh rawh u; hlim takin ruai i ṭheh ang u. 24He ka fapa hi a thi a, a lo nung leh ta a; a bo va, kan hmu leh ta a nih hi,’ a ti a. Tichuan, hlim takin an awm ṭan ta a. #1 Tim. 5:6; Efe. 2:1.

25“A fapa upa zâwk chu lovah a feh a, a lo haw a, in a thlen dâwn chuan thil tum ri leh lâm thâwm chu a hre ta a. 26Chhiahhlawh pakhat a ko va, ‘Chu, eng nge ni ta?’ tiin a zâwt a. 27Ani chuan, ‘I nau a lo hâwng a, dam taka a hmuh leh avângin i pain bâwngno châwmthau a talh a ni,’ a ti a. 28Tichuan, a thinur a, inah chuan a lût duh ta lo va. A pa chu a va chhuak a, a rawn thlêm a. 29A pa chu a chhâng a, ‘Ngai rawh, kumkhaw hei leh chen sal chhawrin mi chhawr a, i thupêk lah ka awih lo ngai hek lo; chuti chung pawhin ka ṭhiante nêna intihhlimna tûr kêltê takngial pawh mi pe ngai si lo. 30Nimahsela, he i fapa, nawhchizuarte hnêna i sum khawhral vektu hi a lo hâwng a, bâwngno châwm thau i lo talhsak si,’ a ti a.

31“Tin, ani chuan a chhâng a, ‘Ka fapa, ka hnêna awm reng i ni a, ka neih zawng zawng hi i ta alâwm. 32He i nau, thi tawh kha a lo nung leh ta a ni, a bo tawh kha kan hmu leh ta a nih hi; hlim tak leh lâwm taka awm tûr rêng alâwm,’ a ti a,” a ti a.

Currently Selected:

LUKA 15: MIZCLBSI

Highlight

Copy