LUKA 18

Hmeithai leh rorêltu tehkhin thu

1Tin, beidawng lova ṭawngṭai fan fan tûr a nihzia tehkhin thuin a hrilh a: #Lk. 11:5-7. 2“Khaw engah emaw rorêltu pakhat a awm a; Pathian a ṭih lo va, mihring lah a pawisa hek lo. 3Chumi khuaah chuan hmeithai pakhat a awm a, ‘Ka khingpui nêna kan thubuai min chinfelsak rawh,’ tiin a hnênah a lo kal chhên a. 4Ani chuan eng emaw chhûng chu a lo duh lo va, nakinah erawh chuan a rilruin, Pathian ṭih lovin mihring pawisa lo mah ila, 5he hmeithai hian mi tibuai êm a, ka tihfelsak mai teh ang; chuti lo chu a lo kal fo âwm si a, a ninawm lutuk dâwn,’ a ti a,” a ti a.

6Lalpa chuan a sawi zêl a, “Rorêltu fel lo thu sawi chu hre rawh u, 7A mi thlan, a chhûn a zâna amah autute thu chu Pathian chuan a chinfelsak thuai dâwn lâwm ni? A muangchâng dâwn em ni? #Thup. 6:10. 8Ka hrilh a che u, a rawn chinfelsak thuai ang. Amaherawhchu, Mihring Fapa hian a lo kal hunah khawvêlah rinna a rawn hmu ang em ni?” a ti a.

Farisai leh chhiahkhawntu ṭawngṭai

9Fel inti hlea, mi dangte hmusit ṭhînte hnênah he tehkhin thu hi a sawi a. 10“Mi pahnih tempulah ṭawngṭai tûrin an chho va; pakhat chu Farisai a ni a, pakhat chu chhiahkhawntu a ni. 11Farisai chu a ding a, hetiang hian#18:11 Mss ṭhenkhatah ‘amah leh amah inbiain’ tih a ni. a ṭawngṭai a, ‘Aw Pathian, mi dang anga mi bum hmang, Dân bawhchhia, uire leh he chhiahkhawntu ang pawh hi ka nih loh avângin lâwmthu ka hrilh a che. 12Chawlhkâr tin vawi hnih chaw ka nghei ziah a, ka neih apiangah sâwma pakhat ka pe ṭhîn,’ tiin. #Lk. 5:33. 13Chhiahkhawntu erawh chu hnung feah a ding a, vân lam pawh a en ngam lo va, ‘Aw Pathian, kei mi sual hi mi khawngaih rawh,’ tiin a âwm a inchûm a inchûm ta zâwk a.

14“Ka hrilh a che u, a hmasa aiin chu mi zâwk chu thiam changin a in lamah a haw thla ta a. Inngaihlu apiang an tlâwm ang a, inngaitlâwm apiang chawimawi an ni ang,” a ti a. #Mt. 18:4; 23:12; Lk. 14:11; 1 Pet. 5:6.

Isuan naupang mal a sâwm

(Mt. 19:13-15; Mk. 10:13-16)

15A deh atân nausênte lam pawh an rawn hruai a, zirtîrte erawh chuan an lo hnar a. 16Nimahsela, Isuan anni chu a ko va, “Naupangte ka hnênah han kaltîr ula, hnar tawh suh u; Pathian ram chu hetiang mite ta a ni si a. 17Thu dik ka hrilh a che u, Pathian ram chu naupang anga lâwm lo apiang tu mah a chhûngah an lût tawp lo vang,” a ti a.

Hotu hausa

(Mt. 19:16-30; Mk. 10:17-31)

18Tin, hotu pakhatin a hnênah, “Zirtîrtu Ṭha, chatuan nun ka chan theih nân eng nge ka tih ang?” tiin a zâwt a. #Lk. 10:25. 19Isuan, “Engati nge Ṭha mi tih? Tu mah ṭha an awm lo, Pathian chauh lo chu. 20Thupêkte chu i hria alâwm uire suh, tual that suh, ru suh, dâwtin hêk suh, i nu leh i pa chawimawi rawh, tihte hi,” a ti a.#Exod. 20:12-16; Deut. 5:16-20; Rom. 13:9; Jak. 2:11. 21Ani chuan, “Chûng zawng zawng chu ka tleirâwl chhuah tirh ata ka zâwm ṭhîn,” a ti a.

22Chu chu a hriatin Isuan a hnênah, “Kawng khat i la bâk e; i neih zawng zawng hralh la, pachhiate sem rawh; chutichuan, vânah ro i nei dâwn nia; tin, lo kal la, mi zui ang che,” a ti a. #Lk. 12:33. 23Chûng thu a han hriat chuan a lungngai ta hle a, mi hausa tak a ni si a.

24Isuan ani chu a hmuhin,#18:24 Mss ṭhenkhatah ‘pawi ti takin’ tih a tel. “Sum ngahte tân Pathian rama luh a va harsa êm! 25Pathian rama mi hausa an luh aiin, hriau benga sanghâwngsei luh tlang a âwl zâwk si a,” a ti a. 26A lo ngaithlatute chuan, “Chuti chu tu nge chhandam ni thei ang le?” an ti a. 27Ani erawh chuan, “Mihring tih theih loh hi Pathian chuan a ti thei asin,” a ti a. #Gen. 18:14; Job. 42:2; Jer. 32:17; Lk. 1:37.

28Petera chuan, “Ngai teh, kan in leh lo kalsanin kan zui ta che a,” a han ti a.

29Isuan, “Thu dik ka hrilh a che u, Pathian ram avânga in emaw, nupui emaw, unaute emaw, nu leh pa emaw, fate emaw kalsan tawh phawt chuan tûnah ngei pawh hian, 30a aia tam daih an hmu ngei ang, hun lo la thleng tûra chatuan nunna nên,” a ti a.

A thih tûr thu Isuan a sawi vawi thumna

(Mt. 20:17-19; Mk. 10:32-34)

31Sâwmpahnihte chu a hruai hrang a, an hnênah, “Ngai teh u, Jerusalem-ah kan chhoh dâwn hi; Mihring Fapa chungchâng thu zâwlneite hmanga ziak zawng zawng kha a thleng kim dâwn. 32Jentail-te hnênah an hlân ang a; anni chuan an lo nuihzat ang a, zahthlâk takin an sawisa ang; chil an chhâk ang a; 33an vua ang a, an tihlum ang; ni thum ni-ah a tho leh ang,” a ti a.

34Chûng thu chu a ngaihna an hre lo, an laka thup a ni a, a thu sawi chu an man lo va ni.

Jeriko khaw bula mitdel

(Mt. 20:29-34; Mk. 10:46-52)

35Jeriko khua a lo thlen dâwn chuan mitdel pakhat hi kawng sîrah kut dawhin a lo ṭhu a. 36Mipui kal thâwm a hriat chuan eng nge ni ta tih a zâwt a. 37“Nazaret Isua a lo kal a ni,” an ti a. 38Tichuan, “Isu, Davida Fapa, mi khawngaih rawh,” tiin a au ta a. 39Kal hmasate chuan an hau va, ngawi tûra an tih pawhin a hma aia ringin, “Davida Fapa, mi khawngaih rawh,” tiin a au zual sauh va.

40Isua chu a ding a, a hnêna han hruai tûrin a hrilh a. 41A kiang hnai a lo thlen chuan, “Eng nge tihsak che ila i duh?” a ti a. Ani chuan, “Lalpa, hmuh theih ka duh,” a ti a. 42Tichuan Isuan, “Hmu thei tawh ang che, i rinna hi i dam phah a ni e,” a ti a.#Mt. 9:22; Mk. 5:34; 10:52; Lk. 7:50; 8:48; 17:19. 43Thâwklehkhatan khua a hmu thei ta a. Pathian fak chung zêlin amah chu a zui ve ta a. Mi zawng zawngin chu chu an hmuhin Pathian an fak a.

Currently Selected:

LUKA 18: MIZCLBSI

Highlight

Copy