1 KORINTHMAI 1
1
1Ramai leli hinou Khrista Jisu vei sei-atamai panou souloure donou kulouyu Paul, alia Eletao thaihou jürai Sosthenes hinou —
2Korinth hi buyu Ramai vei lüloumaime hi, süolouzü Khrista Jisu ye koa ali soulouyu hinou puh hi buyu Ramai vei sheeyu maitao souloure donou kulouyu puletao hrülai ea puletaoye koa buh veishi hinou puletao ea Eletao vei Mapao soua buyu Jisu Khristaye thoa buyu mai hrülai hi rüwe:
3Ramai Eletao Puo ea Mapao Jisu Khrista nou neletao hi zhuvea ea kaonayu peiyu sü souloutheo.
Khrista hinou Ha Ngaolouyu
4Khrista Jisu vanou Ramai nou neletao hi peikhai touyu zhuvea süna donou Enou teisanou neletaoye donou Aramai hi kalo paowe, 5daiolouzü Khristaye koa ali soulouyu hinou neletao sü chipao pfüphou hinou ea tsü teitei hinoua, ha teitei hinou hanisho loure. 6Khrista vanou paokhai touyu chipao sü neletao hronou soutaosoua poloure, 7süolouzü neletao nou Eletao Mapao Jisu Khristaye ngaopeire sü khoa buyu hinou neletao nou ngaolou chemoyu ha ali koutea hare. 8Eletao Mapao Jisu Khrista teithe kihi neletao sü cha lia ha-a buloure donou, akhai koute puhnou neletaoye khotou peilai. 9Puhnah Poutu, Eletao Mapao Jisu Khristaye koa meime ali souloure donou neletaoye kulouyu Ramai puhye hai louche louveie.
Church Levai hinou Meme Souku kuyu
10Athaihou jürai maitao, Eletao Mapao Jisu Khrista zhih hinou neletao hi khowe, süolouzü neletao hrohi me souku kuyu palou more donou alinou liye chi veivayu sü thaowuwo, alia sübüa neletao tsü-le alikhei soua bulo. 11Daiolouzü Athaihou jürai maitaore, neletao hrohi zhüva-a bure tea Kloe kikhamai kamainou Ahi sheesha-a paongao peire. 12Enou paoyu süolouzü neletao maili linou haibüa taku kua paowe: Alinou paowe, “Ewo Paul thaifüwe;” kukhe linou, “Ewo Apollos thaifüwe;” kukhe linou, “Ewo Pitar thaifüwe;” alia kamainou, “Ewo Khrista thaifüwe;” tea paowe. 13Khristaye zhirewu? Neletaoye donou Paulye kros vanou veathearewu? Moa neletao hai Paul zhih hinou dzükhao dalouwu?
14Enou Ramaiye kalo paowe süolouzü Khrispas ea Gaias baimoa neletao kukhe talia Enou dzükhao dapeimoe. 15Sübüyu thaisü, maitalinoua neletaoye Azhih hinou dzükhao dapeie tea paolou hoe. 16(Oh Ovai, Stephanas ea puh kikha maiye-a dzükhao dapeie, ana süjünou Enou maitaliye dzükhao dapu peiho peimosa E sükhai more.) 17Khrista nou Eye dzükhao dapeire donou seimoe. Puhnou Eye Ko Aveina paodou peire donou seibaie, alia Khrista nou kros vanou thaiyu sünavei khouko sü souhawu more donou chipao süsü emai tsü-dokainou paolou more donou seipeie.
Khrista hai Ramai vei Khouko ea Ratsü Nasüe
18Daiolouzü kros vei chipao hai ha-kare ludu hinou ta-a bumaitao donou louzü avochi baie; ana khailupoa buyu Eletaoye donou louzü haisü Ramai vei khoukoe. 19Haisü haibüa rüthouyu kue,
“Enou tsüsümai ratsü nasü souhawulai alia hasümai vei sü-ngaoyu nasü potawulai.”
20Sübüyu thaisü, tsüveimai daiki bue? Razhai sümai daiki bue? Moa deiphao haina vei chi veilousüwona daiki bue? Ramai nou deiphao hainavei tsüvei hai avoyu baie touyu sü ngaopeire.
21Daiolouzü Ramai nou puhvei ratsü hinou emaiye panou lah puletao vei tsüdo avei vanou puhye panou hakia sülou more soudawure. Süjüwo, Ehnou paodouyu, maikhe mainou “voyu chipao” tea sayu süna vanou lülouyu puletaoye khailu peiloure Ramai nou le laloure. 22Chechena vanou lapei loure Jihudimainou shee khowe, alia Greek mainou tsüvei phouwe. 23Ana Ehwo louzü kros vanou thaipeiyu Khrista vei ko paodouwe, chipao hainasü Jihudimai donou phisü loure süe ea tahrüh kukhemai donou avoyu süe; 24ana Jihudimai-a, tahrüh kukhemai-a Ramai nou kulouyu puletaoye donou louzü chipao haisü Ramai vei khouko ea Ramai vei ratsü soua buyu Khrista puh baie. 25Daiolouzü Ramai vei avoyu sünanou emai vei tsü veiyu süna jünou veikouhie, alia Ramai vei lelou hoyu sünanou emai vei khouko jünou khoupuhie.
26Athaihou jürai maitao, Ramai nou neletaoye kulouyu kisü, neletao hai kakua busa chuo lichokhaio. emai zhai hinou zhulai toulouzü, neletao maitaolinou tsüveimai moe, maitaolinou khouko bumai moe moa maitaolinou du-shomai moe. 27Ana Ramai nou sübüa tsüvei maiye sou ahrao peiloure donou deiphao hinou voyu sünaye doloue, alia khouko bumaiye sou ahrao peiloure donou deiphao hinou lelou hoyu sünaye Ramai nou doloue. 28Deiphao mainou dushoe tea choyu sünaye souhare donou deiphao hinou mainou zhodüyu ea ngaorayu sünaye Ramai nou doloure. 29Süvei kowo louzü maitalia Ramai nghojünou khaophu soulou hoe. 30Ana Ramai nou neletaoye panou Khrista Jisu ye koa ali souloure, alia Ramai nou Khristaye Eletao vei ratsüna soupeire. Puh vanou Eletaoye sü Ramaiye koa souzü peire; Eletao sü Ramai vei sheeyu maitao souloure ea Eletaoye sü do soupeire. 31Südonou sheeyu larübvü nou paoyu kua, “Kathe souyu puhnou Mapaowo hinou kathe souloukhaio.”
Currently Selected:
1 KORINTHMAI 1: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.