1 KORINTHMAI 5
5
Lüloumaime Hrohinou Khulou Souyu
1Chuo neletao hrohinou ngaopishoyu ea zhaoh shomai koutenoua soukhai mohiyu khulou souyu vah bue touyu sü sheetoua mainou paongaore, süolouzü mai alinou puh pfü napaiye koa zhüe touyu sü Ahi paongaore! 2Sübüyu thaisü, neletao nou kabüa khaophu souloulai? Neletaowo do pfübai zümowu? Haibüyu vah souwuyu puhye sü neletao me hrohinou phawuwo. 3Alia Apfüzhonou neletaoye koa bumokhaia, rako hinou Enou neletaoye koa sühinou bue; alia Enou neletaoye koa sühinou buyukua, Enou Eletao Mapao Jisu zhih hinou ngaopiyu vah haina souwuyu mai süna pei hi sü chikuchere. 4Eletao Mapao Jisu vei khoukoye koa neletao nou vedzüa buyu ea Arako-a sühi lou koa buyu kisü, 5neletao nou mai hainaye sü puh rakoye panou Mapao vei Teitheki khailu paloure donou, puh pfüphao hai souha loure donou Saitan bah hi thoupeiwuwo.
6Neletaoye donou khaophu souyu hai zümoe! Kheih daotunou souke teitei hai soulalou baiwe touyu sü neletao nou sümowu? 7Nelenou sheetoua buloure donou mah vei kheih kunasü phalaiwuwo. Süthaisü Enou neletaoye sütoua buyu sübüa neletao sü kheih lia hayu sheetouyu souke süna bübailai. Daiolouzü Eletao vei Tachonüh nasü soudare, alia chuo Khrista, Eletao vei Tachonüh vei zhaotuye sü posheelare. 8Südonou Eletao nou mah ea ashi vei kheih kunavei raokhaonou moa kheih hayu sheetouyu ea acheche vei raokhaonou toua Eletao Tachonüh nasü nülaikhe.
Khulou Souyumai Peihi Chikuyu
9Enou neletao hi rüyu seiko süna hinou Enou neletao hi khulou souyu maiye koa taso tea paopeie. 10Chuo khulou souyu, loküyu, avaomai moa basharaye thoyu zhaoh shomaitao hinou kuvoua bulouwo tea Enou paomoe, daiolouzü sübüa soulai toulouzü neletao sü deiphao hinou tabaiyu chire. 11Enou paoyuwo louzü lahnou thaihou jüraimai zhih saloukhaia, khulou souyu, loküyu, basharaye thoyu, chi-lashi paoyumai, zhaoh shozhiyumai moa avaomai soua laiyu maitaliye neletao nou koa laiso tea paobaie. Haibüa souyu maiye koa toushore donoua hatakia koa busho khaiso.
12Daiolouzü vakoumaiye chikuyu sü hakia Avah khaimoe. Neletao nou chikure süwo louzü lüloumaime hrohi buyu sümaitao baimowu? 13Ana vakouhi buyu maitaoye sü Ramai nou chikulai. Sheeyu larübvü nou paoyu büe, “Neletao hrohinou mai ashi naye sü phawuwo.”
Currently Selected:
1 KORINTHMAI 5: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.