AMOS 6
6
Israel Maiye Soushiyu
1Zion hinou talabou-a nou vashoa hrüyu khemai, Samaria deichi hinou vaphia ngaopiyu aliro hanou hrüa buyu khemai, tyahrü hrohinou matsüli soua bukhemai, Israel mainou ve soukha khoa buyu maitao, neletao hai daizhou koute veayu soulaisa! 2Kelnah nuhdu nasü takou zhukhaio; süthaisü dushoyu Hamath nuhdu nasü ve zhukhaio; sühinou takouh Philistin maivei Gath nuhdu nasü zhukhaio. Neletao vei vedei hai puletao vei jünou veipu hiwu? Ho puletao vei teidei hai neletao vei teidei jünou kahpu hivu? 3Oh! neletao hi veahoyu teithe sü velaire touyu hai louche bae, ana neletao nou soua buyu vahtao sü sünaye pove nghipu peia baie. 4Paongi nou soukhai touyu züphao hinou züa buyu khemai, bu-zü aveih hinou buyu maitao, alia zhaokhome hrohinou zhaotu aveih ae chokhome hinou choteu hrüvei nou datoua laimai, neletao hai daizhou koute vealaisa! 5Neletao hai David büa lou dapaloua lana noupu poa lou sounüe. 6Neletao hai pai phoua nou zhaoh so-e alia veishoyu theadzü nou nawe, ana Israel kihikhamai nou shitayu vanou neletao hai levea-a dopfü moe. 7Südonou nüpoa tayu hisü neletaoye panou araina soulai, alia neletao vei khonü ralya khesü panou hata bailai.
8Teideiphao ahai pei hinou buyu Mapao Ramai nou haibüa paoe: “Israel mai vei khaophu nasü Enou ngaorae, alia puletao vei nuhdu khesü Enou ngaorae. Puletao vei nuhdutao ae sühi buyu veishi Enou ngaobamai bah hi peiwulai.”
9Kihikha ali hinou mai kirou shoa bulouzü, mai sütao-a thai bailai. 10Kityarai mai linou thaiphao nasü vakou popalai touyu phaki, kihikha mai aliro buhadesa teanou haibüa noulai, “Mailia neye koa buhomoe?”
“Bumoe” tea chila sü peilai.
Süthaisü kityarai mai nanou paolai “Paikhai tiso! Eletao hai Mapao zhih sü sathou pulai modao.”#6.10 Phoure 10 nahai Hebrew hi sheesha timoe.
11Zhukhaio, Mapao nou tudee veyu phaki, ki adu-atai teitei nou peko sasa ta bailai. 12Rhei hai chuhlya phao hinou tuwu? Mainou chode sa-a zaidu hinou tatawu? Sübümoe, ana neletaowo kaozü nasü maiye shutha laiyu pou-ashi hi soudathou peiwure, alia acheche nasü kaozü moyu hi souda thoupeiwure.
13Neletao nou reih soulou Lodebar#6.13 lodebar: Zhih haina hai Hebrew maila hinou “halia hae” touyu raiwe. nuhdu nahai polouyu vanou khouphu souwe. Neletao hai “Avei pfüchi vanou Karnaim#6.13 karnaim: Nuhdu haina vei ko hai “kai” touwe, süsü khouko paonadawe. polou mowu?” teanou phusoua paoe.
14Khoukhoulai Ramai Mapao nou haibüa paoe, “Oh Israel maitaore, Enou neletao hi ngaoba mai tyahrü ali seive peilai, ae puletaoye panou reilo buyu Hamath ludu hinou poa khelo kouh Arabah reitou hi koute neletaoye souvea peilai.”
Currently Selected:
AMOS 6: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.