AMOS 8
8
Sülai hinou Rashi bua Zho Ngaoyu
1Ramai Mapao nou haibüa ngaoe: Süsü houki shira sülai ali ngaoe. 2Puh nou ahi noue “Amos, ne dai ngaowe?”
“Houki shira sülai ali ngaoe” tea Enou chila peie.
Süthai Mapao nou ahi paoe, “Avei Israel maitao hai akhai#8.2 akhai: Hebrew maila hinou “akhai” ae “marashi” touyu lakho raiwe. soure teile sü veredao; Enou puletaoye souvea laiyu hinou Ale datakhai laimoe. 3Süzhou teithe, Rathoki hinou lou souyu khesü panou kouli lia dopfüyu soulai. Thaiphao sü buh liki phoukhalai. Puletao ye sü paipakhai moa poa shilaiwu bailai.”
Israel Mainou Haka Talai
4Vealai maiye taina laimai ae touha sohalai maiye souvea laimai, chipao haitao sü keilou khaio. 5Neletao hai lah haibüa paoe, “Etao thou zoloure donou dukinou sheeyu teithe nasü chelaisa, alia Etao southou zoloure donou dukinou soteithe nasü chelaisa? Etao nou thouvü soutai loua pousha taoli zoloulai, alia sühdoukhao nasü da-a nou souloua zoloulai. 6Etao nou southou hai mutei sholoua zoloulai. Süthaisü Etao nou touha laimaiye shahu nou ae vealai maiye phikha pali nou hrülou laie.”
7Israel maivei Ramai Mapao nou haibüa chaachou souwure, “Puletao nou vah ashi soukhai touyu khesü E hasou kilia ngaikhai toulai moe. 8Haiva donou teidei sü pilai mowu alia sühi hrüa buyu khemai nou dopfülai mowu? Alia teidei sühi buyu na veishi hai Ejipt hi Nail reidzü duyu büa holove hailove-a külai mowu?” 9Mapao Ramai nou paoe, “Süzhou teithe sü heako nou pa teinghi loutalai, alia hea teiva shoyu teile hinou pa teimai ta-a bailai. 10Enou neletao vei khonü khesü pa dopfüyu alia neletao vei lou khesü panou kra-a kouli liyu hi soudathou peilai. Enou neletao hrülaiye sü panou pei seikhaiwua panou soukou nou banoulai, alia nahpoutuli thaiyu pfüpuo nou levea-a dopfülaiyu büa pa neletao-a dopfülai.
11“Haibüyu teile sü velaire tea Ramai Mapao nou paoe, teidei sühisü tokaayu seive peilai, süsü touso hayu vanou laimoe, moa dzü reiyu vanou laimoe, ana Mapao vei chipao keinüyu vanou bailai. 12Puletao nou zaidu ali hinou ali hi velai, teizü kounou teinghi palova talai, sühao poa, tukou tukhe poa Mapao vei chipao sü phoutalai, ana puletao nou ngaoloulai moe. 13Süzhou teithe hisü pfüphao aveih nahlemai koute-a houreiyu vanou shatalai. 14Samaria hi Ashimah rah zhih hinou chaachou souyu khemai, alia Dan rah zhih hinou ae Beersheba rah zhih kua chaachou souyu mai hrülai sü kaotalai, alia puletao hai lashupu loulai moe.”
Currently Selected:
AMOS 8: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.