DANIEL 5
5
Belshazzar Veo vei Tovai
1Veo Belshazzar nou teithe ali puh khenou buyu peikho maitao thetheye kupoa ve nühdu ali nüe, alia puletao nou koa tovai vaizhoe ae zhaoh soe. 2Puletao nou zhaoh soa buyu phaki, Veo Belshazzar nou puhvei peikho maitao, puhvei chapfü maitao ae phuvei khopfü maitaoye panou zhaoh poa sore donou puh puo#5.2; 5.11 Babilon hi Nebukhadnezzar alia Belshazzar kohi vemai alao bue. Puo touyu haina hai puh jünou rai-a veo souyu na-a paolou veie, moyuma Nebukhadnezzar zhih hai Nabinodus vei zhih nou paolou veie. Nebukhadnezzar nou Jerusalem Rathoki hinou pove khaitouyu sana ae shahu nou soukhai touyu paikhao taosü popawo tea kharochi peie. 3Südonou sana paikhao khesü poloua veo vei peikho maitao, puhvei chapfü maitao ae phuvei khopfü maitaoye panou zhaoh poa soe. 4Puletao nou zhaoh sü so loure, alia sana, shahu, baosahu, hu, süü ae chuh nou soukhai touyu rah khesü paoshore.
5Sübüyu phateile hinou, meibvü taokhai touyu pe hisü nou bah ali nou kou kivo vasü larücha rüre, alia veo nou bah ali nou kou larücha rüyu sü ngaoe. 6Süthaisü veo vei zhuh hai tyaku tare, alia puh sü ngaopi shore, ae puhvei khoubou ahai sü ngurürü shihrührü loure. 7Veo nou shusoua teingumai, keingumai, khei khupado sümai, ae pouro soumai hrülaiye puh hi save peio tea share. Veo nou Babilon hi hasü hangao maitao hi paoe, “Mai taralia kivo vahi rükhai touyu larücha nasü phoupaloua ae süsü daitouwe touyu ahi paopei louzü, mai sünaye vemai vei sabanü banao peilai, puhye sü sanatou toupeilai, alia vedei khoyu hi panou vahdubu asü chena hisü bulai.” 8Süthaisü veo vei hasü hangaoyu mai hrülai sü vere, ana puletao mai ali-a kivo hi rükhai touyu larücha nasü phoupalou hore ae sünavei artha sü daitouwe touyu veo hi paopeilou hore. 9Süthaisü Veo Belshazzar hai ngaopisho pare alia puh zhuh hai tyaku tare, ae puh khenou buyu peichamai hrülai-a tsü chohare.
10Veo alia puh khehinou buyu peikho maitao nou rao-a buyu paisü choloua vepfüpai nou maiye tovai vaiyu ki hisü taloure alia veo hisü paoe, “Oh Veo, ngaopiso, mokhaia ne leveaso. 11Nevei vedei hi Sheeyu Ramai#5.11; 5.14 Ramai; moa ramaitao. vei Rako sa-a laiyu mai ali bue. Ne puo nou hria buyu phaki, puh hisü hasüyu, sükulou süyu tsüdo, alia rahtsü hai Ramai büa puh hi bue. Südonou ne puo Nebukhadnezzar nou puhye panou khei khupado sümai, teingumai alia hasü hangaoyu maitao pei hi panou peikhowo sü soue. 12Maipou süna hisü soulou süyu dokai, hasüyu, me paolapa peilou süyu, nadachi süyu, alia khei khupayu khesü paolou süyu bue; südonou maipu sünaye ne puo Veo nou Belteshazzar tea kuyu, Danielye sü kulo, sütoulouzü puhnou ne hi kivo va hi rükhai touyu larücha nasü daitouwe touyu paopei lousüe.”
Daniel nou Kivo Vahi Rükhai touyu Larücha nasü Phoupa loua Paolapa Peiyu
13Süthaisü Danielye veo nghoujü hi saloure. Veo nou Daniel hi noue, “Ne apuo Nebukhadnezzar nou Judah teidei hinou nüpoa veyu Daniel vu? 14Sheeyu Ramai vei Rako ne hi bue ae soulou süyu dokai, hasüyu alia hali hala süyu rahtsü ne hi bue touyu Enou süwe. 15Enou avei vedei hi hasü hangaoyu maitao alia teingu maitao save panou kivo hi rükhai touyu nasü phoupaloua alia süsü daitouwe touyu paolapa peiloure donou ahi save-e, ana puletao nou sünasü paopeilou hore. 16Ana nenou khei khupado ae mainou sülouhoyu khesü nenou sülou süe touyu Enou choue. Südonou kivo hi rükhai touyu larücha nasü phoupaloua ae süsü daivanoue touyu ahi paopei louzü, Enou neye vemai vei sabanü banao peilai, sanatou tou peilai, alia avei vedei hi pa asü cheyu vahdubu abuwo sü neye panou soulai.”
17Daniel nou veo hi chila peie, “Nevei sapeina khesü la neye donou khailoua baio, moyuma nevei buu khesü mai kukhe mai hi peio. Enou veo hisü kivo va hinou rükhai touyu nasü phoupa peilai alia süsü daivanoue touyu paolapa peilai. 18Oh Veo, Kukulai hi Abuwo Ramai nou ne puo Nebukhadnezzar ye vebuh, aduso, khouko ae kathe khesü peie. 19Sübüa puhye soudusho peiyu donou mai hrülai, tyahrü teitei, alia la tyakukua paiyu mai veishi nou puhye sü ngaopie. Puhnou mai taralia southa nüyu maiye sü southa baiwe, alia panou hria bunüyu maiye sü souhri peilou baiwe. 20Ana puhnou khaophu soupayu phaki, puhvei vebuh nasü puh hinou polai peie alia puhvei kathe khesü hatare. 21Puhye mai hrohinou hulai peie, ae puhvei tsüle sü rekhaona ali büa soupeie, ae puhye panou rheisüh kheye sa-a hrüe alia chode büa panou pou toue, alia puhvei pfüphao hai rakiva nou kouyu vidzü shoa panou hrüe. Akhai hinou kou puhnou Kukulai Ramai nou deiphao maivei vedei teitei pei hia khosa-a hrüwe alia puhnou peinüyu mai tarali hi vebuh nasü peilou süe touyu süloue.
22“Ana puhvei nahpoutu, Oh Belshazzar! nenou haibüyu teitei sükhaia bulikhu nenou tainou nasü soulou more. 23Nenou rakiva buyu Mapao ye ngaophou moyu hinou puhvei Rathoki hinou pove khaitouyu paikhaotao sü ne nghoujü popaloua sütao hinou ne, ne khehinou buyu peikhomaitao, ne chapfü maitao, ae nevei khrapfü maitaoye sa-a zhaoh sore. Nenou sülou hoyu, ngaolou hoyu ae choulou hoyu sana, shahu, baosahu, hu, süü ae chuhtao rahye paoshore, ana neye sühao-a buyu alia nenou souyu vah teitei khasa-a buyu Ramai ye nenou tsükhou peilou more. 24Südonou Ramai nou bah nasü seikou kivo hi larücha rükhaiwe.
25“Rükhai touyu larücha nasü haibüwe: MENE, MENE, TEKEL ae PARSIN. 26Sükuyu artha sü haibüe: MENE, Ramai nou nevei vedei hai teithe chokhaiwure, alia akhai panou soure donou souda chewure. 27TEKEL, neye sühdouyu phaki ne hai chemoa thaakei-a ngaolou baire. 28PERES, nevei vedei hai dade zhiwure alia Medes ae Parsia mai hi peiwure.”
29Süthaisü Belshazzar veo nou Danielye vemai vei sabanü banao peio, sanatouh tou peio, alia vedei hi puhye panou vedei khoyu hi asü cheyu peikhowo soulai tea kharochi peie.
30Süzhou khei hinou Babilon hi veo Belshazzar ye mainou southare. 31Po rairouahai payu Mede hi veo Darius nou vedei sü poloure.
Currently Selected:
DANIEL 5: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.