PAODAKHAIYU CHIKHA 18
18
Napao Maivei Zha
1“Naanou soupeiyu Levi maitao hai Israel mai koa teidei zha moa kaalo ngaolai moe. Mapao hi mei deia posheelayu hai nanou puletao tou-a hrülai, daiolouzü sühai puletao vei kaaloe. 2Puletao hai puletao thaihou jürai maitao hrohinou kaalo hae, Mapao nou puletao hi paopeiyu büa Puhnou puletao vei kikaa nasü baie.
3“Maikhe mainou chode alia zhaotu posheelayu hinou napao mainou ngaolouzü taosü haitaoe: Phaosou, khou alia lesou taoe. 4Chachilou raikaiyu neletao vei thou, darkhadzü, theadzü, alia zhaotumai sailou raikayu mai haitao hai neletao nou puletao hi peilai. 5Daiolouzü neletao Ramai Mapao nou puletao alia puletao nahmai taosü neletao hrohinou pa la-a Mapao zhih hinou teisa pa naanou vah soure donou dopaloure.
6“Levi mai taralinoua puhnou hrübuyu Israel mai nuhdu tali hinou talouzü alia Mapao nou dapalouyu buhfühi jüpa-a velouzü, 7sühi Mapao nghoujü hinou vah soua buyu Levi mai kukhetao büa puh hia puh Ramai Mapao zhih hinou vah soua bailai. 8Puh hai puh vei füdei zholouyu hinou sana ngaolouyuma, napao kukhe maitao nou ngaotouyu zhoubütoua puh-a ngaolai.#18.8 Phoure haina Puh...puh-a ngaolai; Hebrew hio sheesha timoe.
Ramai ye Sümoyu Mainou Tayu Zhai Taso tea Paopi Peiyu
9“Neletao Raimai Mapao nou neletaoye peiyu teidei hi talouyu phaki, sühi buyu tyahrü kukhemai vei ngaorayu zhaido douso. 10Neletao hrohinou nahpoutu moa nahnaotu maiye dathalou-a meinou dei-a rah pothoyu mai, moa pousouyu, moa keingumai, moa vepare süre donou shee phoulai mai moa rahsamai, 11moa vaovah moa naotuvah pomai moa rashi chakumai, moa thaimaiye chakuyu mai panou ali-a bulai moe. 12Haibüyu vah soupfüyu mai hai Mapao nou ngaorae, alia haibüa ngaorayu vah souyu vanou tyahrü sütao hai neletao nghoujü hinou neletao Ramai Mapao nou hulaire. 13Neletao Ramai Mapao nghoujü nou neletao hai chilee cheche-a sheesha tea nou hrülo.”
Rachipaolayu Mai Ali Seive Peilai tea Apaopeiyu
14“Süthaisü Moses nou paoe, ‘Neletao nou talou hulai laiyu tyahrü khemai hai keingumai alia poushoyu mai chi keiwe, ana neletao louzü haibüa souyu hai neletao Ramai Mapao nou aetimoe. 15Neletaoye donou Ramai Mapao nou E bübüyu rachi paolai mai ali neletao thaihou jürai maitao hrohinou seive peilai. Neletao puh chi sü zülo.’
16“Daiolouzü neletao nou Sinai Deichi hinou ve jüyuki, neletao nou neletao Ramai Mapao hi khoyu nasü hainare, haibüa neletao nou pao-a khoe, ‘Etaoye panou Ramai Mapao pai choupu khaiso moa khupa shoyu mei pa ngaopu khaiso, more toulouzü Etao hai thai-a bailai.’ 17Mapao nou ahi paoe, ‘Puletao nou paoyu sü veire. 18Puletaoye donou ne büyu rachi paolayu mai ali Enou puh chinamai hrohinou seive palai; Enou achipao sü puh mü hi thoupeilai, alia Enou paopeiyu achipao veishi puhnou paopeilai. 19Rachipaola mai nou azhih hinou paoyu chipao hai maitali nou zümore toulouzü, Enou puhye sü zhulai. 20Rachipaolayu mai alinou Enou paomoyu chinou azhih hinou poa paolouzü moa rachipaola mai alinou rah kukhe zhih hinou paolouzü puhye sü southawo.’
21“Neletao lah nou haibüa cholou veie, ‘Chipao hai Mapao nou paopeiyu chipao moe touyu kabüa Etao nou sülou khailai?’ 22Rachipaolayu mai nanou Mapao zhih hinou paopa buyu hai chekhao nou vepamore toulouzü, moa haihai Mapao hinou veyu chipao moa rachipaolapu nou puh pha sounou pao baire toulouzü, puhye ngaopiso.
Currently Selected:
PAODAKHAIYU CHIKHA 18: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.