PAODAKHAIYU CHIKHA 2
2
1Süthaisü dakhai poa Etao nou Mapao nou paoyu büa radeiki hilo nou tapoa Zai Ho hilovatha tare; ae teithe taoli sü Etao nou Seir deichi hilonou sühaopoa tae.
2“Süthaisü Mapao nou ahi paoe, 3‘Neletao nou teile taoli deichi hilonou sühaore, chuo reilova takhekhaio.’ 4Alia maikhe mai hi haibüa paopeio, ‘Neletao nou Edom teidei hinou hrüa buyu neletao thaihou-jürai Esau vei tyaonah maitao vei teidei sü tacho laire. Puletao hai neletaoye ngaopi-a bailai, südonou leikei-a talo. 5Puletaoye reih souso, daiolouzü puletao vei teidei hai Enou neletao hi züto ali koute-a peilai moe. Edom maivei teidei taosü Enou Esau vei tyaosholea hi peiwure. 6Puletao hinou touso ae dzü sü pousha nou hrülo.’
7“Neletao Ramai Mapao nou neletaoye sü vah haso teitei hinou shiha peie. Neletao nou dusho-a buyu radeiki hi ta-a bukisa sü Puhnou khosa-a laipeie. Neletao Ramai Mapao nou neletaoye po raidai koute sa-a laipeie, alia neletao hi halia chemoyu hae.
8“Südonou Etao nou Athai Zai hinou Elath ae Eziongeber nuhdu hi louyu ludu nasü thaokhaiwua reilo teinghi payu Moab maivei teidei lova tapoa tae. 9Mapao nou ahi paoe, ‘Moab maiye souveaso, moa puletao hi reih souso, daiolouzü Enou puletao vei teidei ali koute-a neletaoye peilai moe, daiolouzü Enou Ar nuhdu nasü Lot vei tyaosholea hi peiwure.’ ”
10(Khouko bushoyu ae mai-a dushoyu Emim tyahrü nou raichoki Ar nuhdu hisü hrüe. Puletao hai Anakim tyahrü büa mai-a due. 11Anakim mai büa puletaoye Rephaim mai tea süwe, ana Moab mainou puletaoye Emim mai tea kuwe. 12Hor mainou raichokio Edom hi hrüe, ana Mapao nou Israel mai hi peikhai touyu teidei taosü hulaiwua bulouyu büa Esau vei tyaonah maitao nou puletaoye sü hulaiwua teidei sü thaoloure.)
13“Süthaisü Etao nou Zered rei nasü Mapao nou Etao hi paopeiyu thaifüa tachopa loure. 14Etao nou Kadesh Barnea hinou tapoa Zered rei tachopayu hai po shiacha loue. Mapao nou paoyu thaifüa reihsoumai khaphao hrülai sü thaita khaitoure. 15Daiolouzü puletaoye souha khaimo koute Mapao nou aetou peimore.
16“Puletao thaita khai touyu thai, 17Mapao nou ahi paoe, 18‘Zhou teithe neletao nou Moab maivei deirai Ar nuhdu ludu hinou tachopalai. 19Neletao nou Ammon mai deirai hi takouyuki, puletaoye souveaso, moa reih souso, daiolouzü Ammon maivei teidei ali koute-a Enou neletao hi peilai moe, daiolouzü teidei sünasü Enou Lot vei tyaonah maitao hi peiwure.’ ”
20(Teidei sünasü Rephaim maivei-e teanou süwe. Rephaim mainou raiki buh sühinou hrüe; ana Ammon mainou puletaoye Zamzummim mai teanou kuwe. 21Anakim maitya büa puletao hai khousho-e alia mai-a alao bue, ana Mapao nou puletaoye sü souha peiwua panou Ammon maiye puletao vei teidei sü füsho-a buloure. 22Süzhai bütoua Mapao nou Seir hinou hrübuyu Horim maitao-a souhawure. Puletao vei teidei hisü panou Edom maitao, süsü Esau vei tyaonah maitaoye panou zhou koute hrüa bue. 23Gaza hi koute hrüa buyu Avvim maitaoye Kaphtor hinou veyu Kaphtorim mainou souhawua puletao vei teidei sü ve thaoloure.)
24“Etao nou Moab maivei teidei tachopa louyu thai, Mapao nou Etao hi paoe, ‘Chuo, Arnon Rei sü tachopa loukhaio. Enou Heshbon hi Amor mai veo Sihon ae puhvei teidei sü neletao bah hi thoupeiwure, reih soupoa kou puletao vei teidei sü polo. 25Zhou thainou Enou deiphao mai hrülaiye panou neletaoye ngaopi-a hilai. Neletao zhih choulouyu phaki, puletao nou pingulai alia neletao vanou puletao sü tsü veasholai.’
Israel Mai nou Sihon Veo jünou Reih Veilouyu
(Mai 21.21-30)
26“Süthaisü Enou Kedemoth radeiki hinou Heshbon veo Sihon hisü chavei-a lathao loure donou haibüa paolo tea ko paolamaiye seita-e: 27‘Etaoye panou nevei teidei hinou tacholo, Etao nou ludu tacho louyu likhei bailai, bakha zhoulo moyuma bakha nalova-a reilai moe. 28Touso-a neletao hinou hrütoua bailai; Etao nou jüpayu louzü nevei teidei hinou pa tacho talo, 29Seir hi buyu Esau vei tyaonah maitao alia Ar hi hrüyu Moab mai louzü Etaoye Jordan rei tachopa Ramai nou Etao hi peikhai touyu teidei hisü vete loumo koute tacho talo tea panou taloue.’
30“Ana Heshbon hi veo Sihon nou süsü aetou peinü more, daiolouzü Ramai Mapao nou puhle sü soukhou peiwure, daisounou touyuo Etaoye panou reih soukou puhvei teidei sü poloure donoue, teidei sünasü Etao nou chukoute hrüa bue.
31“Süthaisü Mapao nou ahi paoe, ‘Zhukhaio, Enou neletao hisü Veo Sihon ae puhvei teidei sü peithouwure. Chuo puhvei teidei sü takou polo.’ 32Veo Sihon nou Etaoye reih dulai tea Jahaz nuhdu pe hisü puhvei reihmai hrülaiye salou-a tapa-e, 33ana Etao Ramai Mapao nou puhye sü Etao bah hi thoupeiwure, südonou Etao nou puhvei nahmaitao, puhvei reihmai hrülai alia puhye sü southare. 34Süphaki Etao nou nuhdu khesü nüloue, alia nuhdutao hi hrüyu mai hrülai - naotu poutu alia nahmai hrülaiye sü southa khaire. 35Etao nou kikhaorü khesü poloue, ana nuhdu khesü soushiwure. 36Ramai Mapao nou Etaoye panou tatei khaimoa Arnon reipe hinou hrüyu Aroer nuhdu hinou poa Gilead hi koute buyu nuhdutao sü poloue. 37Ana Etao Ramai Mapao nou paoyu thaifüa Etao nou Ammon maivei teidei, Jabbok Reipe hinou reilo buyu teidei tao hi ae deichi hinou hrüyu nuhdutao alia Ramai Mapao nou taso tea kharochi peikhai touyu teideitao hisü Etao nou talou moe.
Currently Selected:
PAODAKHAIYU CHIKHA 2: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.