PAODAKHAIYU CHIKHA 22
22
1“Ne thaihou jürai maivei chode moa zhaotu mota-a ngaolouzü, palaio tea ngaomo khosouso, ana paopu hisü poa dakhaive vuzü peio. 2Paopu hai buh nghi-a bumo louzü moa nenou puhye sümolouzü, nenou mota buyu kikhaorü nasü salo alia paopu nou phouve mokoute ne hi khailo. Phouveyu kisü puh hi dakhai peio. 3Ne thaihou jürai nou hakhai touyu rheisü, moa sabanü, moa hatalia nenou ngaolouzü, ngaomo khokho souso.
4“Ne thaihou jürai vei rheisü moa chode hai ludu donou kao-a bulouzü pah pfüvai taso, phaola shupeio.
5“Naotumai alinou poutumai vei sabanü banoulai moe, poutumai-a naotu maivei sabanü banoulai moe, daiolouzü haibüa soubuyu maitali hai neletao Ramai Mapao nou ngaorae.
6“Ludu pe hinou raohou phesü süübe hinou moa deiphei hinou bu-a nenou ngolouzü, alia künou touti moa dzü büa bulouzü, raohou touti koa küye nülouso. 7Nenou touti sü polou-a bailai, ana kü sü peima talo, sükure toulouzü ne rako veilai alia ne hrüh mailai.
8“Nenou ki shitho ali soupayu phaki, maiye panou dekou more donou khahaolo, sükure toulouzü ne kiphao hinou maitalia dekou deithayuma süsü ne mah ha-e.
9“Neletao vei darkha peida hi shira kukhe daothouso. Daothou louzü, shira süna alia darkhabe ahainou sheemo bailai.
10“Chode alia rheisü ye koa phaodao thouzho lou-a pa tataso.
11“Soumai sah alia bah nou doyu züzüyu sah koa banou zhoso.
12“Nenou bahnouyu sabanü kaidai hisü saza phulo.
Sabu-sazüyu hi Sheeyu Zhaitao
13“Poutu maili nou naotu mailiye chapfü soulai tea nalou-a puhye koa sazü louthai, puhye jüpa molou-a 14da-a puh chi paoshi puh hrü souzho-a haibüa paolouzü, ‘Naotu haina paiye Enou naloue, ana Enou puhye daoyuki puh hai poutu mailia samo hie touyu shee Enou ngaomoe.’
15“Sükulouzü naotupai pfüpuo nou puh hai poutumailia samolai hie touyu shee sü nuh hinou süthai-apei maitao nghoujü hi popa ngaolai. 16Naotupai puo nou tsümaitao hisü haibüa paolai, ‘Enou anah naotupai hai poutu haina ki khaipeie, ana chuo puhnou anah paiye sü jüpamo loure.’ 17Puhnou da-a haibüa puh chi paoshi bure, ‘Enou ne nah naotupai hai chilee-a ngaomoe. Ana anah naotupai hai poutu kukhe samoe touyu shee sü hai hi bue.’ Süthai pfüpuo nou nuh hi tsümaitao nghoujü hi zhe taoyu sah nasü laopa ngaolai. 18Süthai tsükhe maitao nou poutupuye salou-a tudeelai. 19Puh hi shahu keihli zhotoulai alia sana taosü naotupai puo hi peilai, daisounou touyuo chileeyu Israel maipfü ali hi puh nou zhih shi peiyu vanou. Naotupai hai puh chapfü soupu bailai, naotupai hribusa puhnou phalai moe.
20“Anou poutupu nou paobuyu hai chechere alia naotupai hai poutu kukhemai hinou vahshi soumoe touyu shee popa ngaolou hore toulouzü, 21naotupai sü puh pfüpuo ki hi save peilai alia puhye sü nuh hi poutu maitao nou chuh nou deithalai. Puhnou puh puo ki hi bukinou khulou vah sou-a Israel mai hi aetimoyu vah ashi soure. Veimoyu khesü neletao hrohinou popa laiwulai.
22“Poutumai talinou mai chapfüye sazünou ngaolouzü, sazü buyu poutupu alia naotupai puhai mai ahai khinou southalai. Ashi nasü Israel mai hrohinou popa lailai.
23“Mainou nouto khaitouyu loumaina ali hai poutu mai aliye nuhdu hinou koa sabu sazüa nou ngaoloure toulouzü, 24puhai mai ahai nou nuhdu vakou sapaloua chuh nou deithalai. Naotupai-a deithalai daisounou touyu puh sü nuh hinou bue anou soukha peire donou ra-a shamoe, alia poutupua deithalai daisounou touyu puh nou mai chapfü hi mah soure. Neletao hrohinou ashi sü popa laivuzülai.
25“Ana rekou nou poutu mai linou mainou tokhai touyu loumainaye dalou-a alia puhye nülou nou sazü peire toulouzü, vah shi souyu poutupu likhei southa bailai. 26Naotupai hi halia souso: puh hai thaizüyu mah soumoe. Zhai haina hai mailinou puh kinapaye züvalou-a southayu zhotoubaie, 27daiolouzü poutu nanou naotupaiye rekou nou tave ngaoloua alia mainou nouto khaitouyu naotupainou ra-a shabuma puhye vupeire maili-a hae.
28“Poutumai linou mainou nouto khaimoyu loumaina aliye tave daolou-a puhye nülou nou sazü peire alia haibüa souyu süloure toulouzü, 29puhnou naotupai puo hi sana raingou peilai. Puhnou naotupaiye navuzülai, daiolouzü naotupai hi vashi soure. Puh hribusa honapai hai phalou shie.
30“Poutu maili hai puh pou chapfü-e nalou shie; puhnou puh puo züphao hai souzhai soungulai moe.
Currently Selected:
PAODAKHAIYU CHIKHA 22: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.