PAODAKHAIYU CHIKHA 28
28
Paochi Züyu vanou Shiha Ngaore
(Lev 26.3-13; Chi 7.12-24)
1“Ne Ramai Mapao chi zü chekho louso alia zhou Enou pei-a buyu puhvei kharochi fükhai loure toulouzü, Ramai Mapao nou neletao sü deiphao hi buyu tyahrü kukhe hrülai jünou pokusho peilai. 2Neletao nou neletao Ramai Mapao chi züloure touyusho, shiha hai veishi neletao pei hi velai alia neletao hinou bulai.
3“Mapao nou neletao vei nuhdutao alia doukhesü ha peilai.
4“Mapao nou neye tounah taoli peilai, alia ne vei teidei hi taimou veishoa peilai, ae kikhaorü sü panou tyaka peilai.
5“Mapao nou nevei sülai alia ne paikhao sü ha peilai.
6“Nenou souyu vah veishi sü Mapao nou ha peilai.
7“Mapao nou neletao vei ngaobamai taosü neletao nghoujü hinou haongu soupeilai. Puletao nou ludu ali hinou neletaoye reih soukoulai alia ludu anai sou-a tupho racha talai.
8“Mapao nou neletao vei thoubao alia neletao bah thaithou souyu veishi hi shiha seive peilai. Neletaoye pei-a buyu teidei hinou Ramai Mapao nou neletaoye ha peilai.
9“Neletao nou neletao Ramai Mapao vei kharochi züre toulouzü alia puhvei ludu hinou tare toulouzü, puhnou neletao hi chaachou sou-a paodaiyu büa Mapao nou neletao sü sheeyu puhvei mai sou-a soushu peilai. 10Süthaisü neletao hai Mapao nou kuloure touyu deiphao hi buyu mai hrülai nou ngaolai. 11Neletao hi peilai tea neletao puopao hi Mapao nou paodaikhai touyu teidei hinou puhnou neletao hi paohaolou hosou savayu alia kinangi, toudzü, kikhaorü alia taimou hai veisho-a peilai. 12Teile kaobü hinou neletao teidei hi pa teirü peire donou alia neletao phiba nou lou souyu veishi hi ha peire donou Mapao nou puhvei hangi shoyu raki kikhu houpa peilai. Neletao nou tyahrü taoli hi poupao soupeilai, ana neletao hai mai hinou pou-pao toulai moe. 13Mapao nou neletaoye pei soupeilai, panou mi soulai moe. Zhou Enou neletao hi peikhai touyu Ramai Mapao vei kharochi teitei hai zü loure toulouzü, alia sütao hai soutaosou fütou lousho, neletao hai teisa nou peichalai, maikhe bulai moe. 14Zhou Enou neletao hi pei-a buyu kharochi hinou halikia tarei taso, rah kukhe thaifüre donou alia puletao sheba soure donou, zhoulo va moa nalao va hi-a taveso.
Paochi Zübayu vanou Veahore
15“Ana neletao nou neletao Ramai Mapao chi zümore toulouzü alia zhou Enou neletao hi pei-a buyu chikha alia kharochi haitao hai soutaosou fütoulou more toulouzü, chaa haitao hai neletao pei hi velai alia neletao hai chaa khenou bulai.
16“Mapao nou neletao vei deikho hi buyu nuhdutao alia deichi hinou buyu nuh khesü chaa peilai.
17“Mapao nou neletao vei shinamara alia paikhao khesü chaa peilai.
18“Mapao nou chaa peiwua neletao hai tou-dzü daotu bua bailai, neletao vei teidei hi taimou, alia kikhaorü hai tyakalai moe.
19“Neletao nou souyu veishi sü Mapao nou chaa pei-a bailai.
20“Neletao nou puhye lai-a ashi souyu vanou, neletaoye souha mosa alia thasho-a soushi mosa, Mapao nou neletao hi chaa, tsü haoyu alia dua züveiyu seive peilai. 21Neletao nou pore donou talou-a buyu teidei hinou neletaoye souhakhai mosa Mapao nou sou tyatyali nou seive peilai. 22Rahtayu sou, rakia meirousou souve-a, teinainou deisou-a, teiko-a, khoche nou daotha-a alia soushoyu teikhai hüve-a ssülulou ho-a neletao mai hrülai hai hamosa souvea-a Mapao nou neletaoye souhalai. 23Neletao vei teidei hisü teirü laimoe, ae teidei sü hu büa khousho-a bailai. 24Neletao teidei hi teirü thaosü Mapao nou naikhao alia naihü nou seive neletaoye souhakhai toulai.
25“Neletao ngaobamai nghoujü hinou Mapao nou neletao sü hraongu soupeilai. Ludu ali hinou neletao nou takou puletaoye reih soulai, ana ludu anai sou-a puletao hinou neletao hai turacha talai, alia deiphao mai hrülai nou neletao hi vepayu sü ngaoloua ngaopi sholai. 26Neletao thaiphao sü teihi raohou alia deiphi hi khaosoutao vei tousho soulai alia puletaoye pi-a hulai peire mailia bulai moe. 27Ejipt mai hi vepayu büa Mapao nou neletao hi cho alia soushih, chükü pao-a tayu alia tho-a souyu hinou neletao hai veilouho-a panou vealai. 28Mapao nou neletaoye souvo-a, nghei soucha-a, alia tsü souhao-a souvealai. 29Nghicha mainou teimai hinou nghithou ngaomoyu büa, neletao hai hea teichülü hinou nghei ngaomoa houlai. Neletao nou souyu veishi hinou kao veilai moe. Shoshonou neletao hai souvea peilai alia soushi peilai, alia neletaoye vupapeire mailia bulai moe.
30“Nenou naotumai aliye vekore donou tokhailai, ana kukhe maili nou honapaisü nülou-a sazü peilai. Nenou ki ali soulai, ana ne sühinou bulai moe. Nenou darkhabe sholai, ana nenou puhvei shithou haitoulai moe. 31Ne chode sü nenghoujü hinou dathalai, ana nenou sou hai toulou laimoe. Ne rheisüh sü ne hinou saopoa talai alia dakhai peilai moe. Ne zhaotu khesü ngaoba mai hi peilai alia mailinou-a sütao hai vupa peilai moe. 32Ne nahpoutu maitao alia naotu khemai hai tyahrü kukhe hi panou qila soure donou peilai, alia nenou teithechü puletaoye zhi-a zhuyu vanou ne nghithou ralai alia souloure khoukolia ne bah hi bulai moe. 33Ne vei teidei hinou payu touso alia ne hudzü nou pa-a ngaolouyu khesü nenou sümoyu mainou touloua bailai alia ne sü halia bulai moe, ana tobai soumoa nevei hrüphaosü mainou souvea peilai. 34Ne nou veahoyu khesü ngaolou-a ne sü volai. 35Ne khoubou ae ne phi sü veilou hoyu soushoyu chükü paolai, phila hinou pei hi khete hai Mapao nou pa cho pa-a vealai.
36“Mapao nou neletao sü hulailai alia ne ae ne puopao nou sümoyu tyahrü hi mainou neletao pei hi veo pa soulai. Buh sühinou süü chuh nou soukhai touyu rah kukheye sü neletao nou tholai. 37Neletaoye Mapao nou huho buyu tyahrütao nou neletaoye ngaora-a konü peilai, alia khupasho-a neletao ko sü phakulai.
38“Ne nou lao-lu hisü taimou taoli vuthoulai, ana daotu chachilou bailai, daiolouzü süsü khazü nou toulou bailai. 39Nenou darkhabe sholai alia shithou hailoulai, ana darkhadzü hai kü loulai moe, moa darkha hai kojülou laimoe, daiolouzü süsü shikhao nou toulou bailai. 40Neletao vei vaohro veishi hi oliv süübe bulai, ana oliv theadzü ali-a neletao hi bulai moe, daisounou touyu-o oliv shithou hai raiha bailai. 41Neletao nou nahpoutu alia nahnaotu khemai bulai, ana neletao nou puletaoye khailou laimoe, daiolouzü puletao hai mainou nüpoa ta-a bailai. 42Neletao vei teidei hi buyu süübe alia shinamara khesü khaona nou toukhailoua bailai.
43“Neletao vei teidei hinou buyu shetumaitao nou neletao jünou khouko ngaopu lailai palai, ana neletao hai khailailai ta-a bailai. 44Puletao nou neletao hi poupao soupeilai, ana neletao nou puletao hi poupao soupeilou laimoe. Puletao nou pei nasü soulai, ana neletao louzü mi soubailai.
45“Chaa haitao veishi neletao pei hi velai, ae puletao nou neletaoye souhamo koute chaa sütao nou neletaoye hulai, daiolouzü neletao nou neletao Ramai Mapao chi zümoe alia puhnou neletao hi peikhai touyu chikha ae kharochi khesü neletao nou reilou more. 46Chaa sütao hai neletao hi alia neletao vei tyaonah hi teisa nou shee ali alia khupayu ali sou-a bulai. 47Neletao nou va-a buyu teile hi sasho-a alia vasho-a neletao Ramai Mapao vei kuvah sü soulou moe. 48Südonou chuo Mapao nou ngaoba maitao sü neletao hi seive peilai, ae neletao nou puletao vei kuvah sü soulai. Neletao nou reizü sho-a, baitou-a alia toure hazei teanou bulai. Mapao nou#28.48 Mapao nou; moa Neletao vei ngaoba maitao nou. neletaoye souhamo koute, puhnou neletaoye hu vei phaodao sü thou peilai. 49Neletao nou la sümoyu, dousho-a buyu tyahrü ali, Mapao nou neletaoye panou dure donou seive peilai. Puletao nou leche ali büa neletao hisü zhaovelai. 50Puletao hai zhaipou shisholai, nahmai tsümai sümoa mailia zhuvea peilai moe. 51Neletaoye souhamo koute, puletao nou neletao vei kikhaorü alia neletao vei shira vupou ae thoudzü khesü puletao nou toulai. Puletao nou neletaoye thoudzü, zhaoh, oliv theadzü, kikhaorü moa zhaotu khesü ali-a shokhai peilai moe; ae neletao sü thai-a bailai. 52Neletao Ramai Mapao nou neletao hi peikhai touyu teidei hisü puletao nou soureih huloulai, ae neletao nou vei-e tea louche buyu, kusho-a soukhai touyu reihkhaobu ae kivo khesü kaodu talai.
53“Neletao vei ngaoba maitao nou neletao vei nuhdu khesü sühao louyu donou, neletao hai touso ha-a veasholai, ae neletao Ramai Mapao nou neletao hi peikhai touyu neletao vei nahmai koute-a neletao nou toulai. 54Neletao hrohinou nasha-a zhai sükayu mai koute-a puh thaihou jürai moa puh chapfü moa nghitei-e buyu puh nahmai koute hi leshi zhuveayu hai bulai moe. 55Alia puhnou tou-a buyu puh nah vei sou hai titilia puletao maili hia peilai moe. Daisounou touyuo, neletao vei nuhdutao veishi hai ngaobamai nou sühao lou-a luhadu dakha-a souvea vanou puh hisü toure hakukhe halia bulai moe. 56-57Neletao hrohinou nasha-a zhai veikayu alia naotu zhailou kayu, toungi shoyu naotupai, hakili hia takhai toumoyu puh koute-a zhaipou shitalai. Ngaoba mainou honapai vei nuhdu sühao louyu phaki, touso halia hayu donou honapai nou kheikheisoua puhnou nakhai touyu nahtou koute-a toulai. Honapai nou süsü puhnou leshi sho-a buyu maipuo moyuma puhvei nahmaitao hisü peilai moe.
58“Larübvü hai hinou rükhai touyu chikhatao neletao nou soutaosou-a zülou more toulouzü alia neletao vei Ramai Mapao vei ngaopi shoyu ae khupa shoyu puhvei zhih sü tsükhou more toulouzü, 59Mapao nou neletao hi alia neletao vei tyaosholea hisü souveilou hoyu sounou alia ngaopi shoyu rahta rahvu sü seive peilai, ae süsü halinoua nuchao loulai moe. 60Puhnou neletao hi raichoki Ejipt teidei hinou souyu sou ashi khesü pove peilai, ae neletao sü sounou sütao hinou veilou hoa bailai. 61Neletaoye souhamosa sü Mapao nou chikha larübvü haina hi rüthou moyu sounou alia veahoyu veishi hai-a neletao hi seive peilai. 62Neletao hai raichokio teivuh zhou-a poushoa buyuma, mai daotu shokhai peia bailaie, daiolouzü neletao hai paochi choubare. 63Mapao nou neletaoye panou sava-a buyu ae maitya poupayu hai jüpa shoyu büa neletaoye soushi ae souhayu hai-a jüpa-e. Neletao nou talou polai tea buyu teidei hinou puhnou neletaoye sü maa hinou paipa laiwulai.
64“Süthaisü Mapao nou neletaoye tyahrü kukhe hrohi, teidei kai ali hinou polova koute huporarou khaiwulai, ae buh sükinou süüchuh rah khesü neletao nou ae neletao puopao mainou sükhai moyu bashara khesü thotalai. 65Tyahrü sütao hrohinou neletao hai vaphia shoyu, moa neletao vei-e tea halia ngaolai moe. Ana Mapao nou neletaoye sü pinguyu, nghithou ngaomoyu alia levea dongai pfüyu nasü neletao hi peilai. 66Le chüshoa, heakhei ngaopi shoa, dai vepa laisa tea veashoa nou hrülai. 67Neletao nou shona hi ‘Haihai kou khekhai toude sarou’ tea paolai, alia koukhe hi ‘Haihai shonade touyu thaio veilaide’ tea paolai, daiolouzü neletao hisü veahoyu ae ngaopiyu khaikho vedao-a bubailai. 68Neletao hai tapu khailai more tea Enou paokhai touyu#28.68 Enou paokhai touyu; moa Nenou paokhai touyu. veidu hisü dzüluki hinou Ejipt teidei hisü seidakhai thoupeilai. Sühinou neletao hai ngaobamai bah hi qila soure donou neletao lahye zholai, ana mai linoua neletaoye sü hrülai moe.”
Currently Selected:
PAODAKHAIYU CHIKHA 28: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.