TAPALOUYU 27
27
Posheelabu
(Tap 38.1-7)
1“Posheelabu ali akasia süü nou soulo, süsü sajha-a raibütou toulai, sa nou mitar 2.2 ae jha nou mitar 2.2 lai, alia kuyu nou mitar 1.3 noulai. 2Kainghou adai hisü kai alili soukhailo. Kai adai sütao ae posheelabu sünasü panou alikhei soua bulo, ae sütao teitei sü baosahu nou neaholo. 3Vonai dothoure lee, poa hakure khaocha, raikhao alia paikhao khesü baosahu nou soulo. 4Khophao ali baosahu nou soulo, ae sünavei kainghou adai hi kaopore donou baosahu nou haorü touyu adai souloua khikhailo. 5Khophao sünasü posheelabu khehinou vaokhailo, sübüa panou sünasü posheelabu dahli pha hinou bulo. 6Posheelabu naye kaopore süü sü akasia süü nou soulo, alia baosahu nou neaholo. 7Kaopore süü nasü posheelabu tha ahai hi haorüa soukhai touyu hisü thaithoulo. 8Posheelabuh nasü lukhao nou souo, süsü Enou ne hi deichi vanou ngaoyu raibütoua soulo.
Mapao nou Bure Rathokipao hi Chikuyu kide
(Tap 38.9-20)
9“Enou bure Ratho kipao na hisü züzüyu haosah nou chikuyu kide ali haoku khailo. Khelo haore haosah nasü mitar 44 panou solo, 10ae süna haokhaire donou deka kai ae kabei kai sü baosahu nou soulo; ana dekatao pothou vaore ae thaithouretao hai shahu nou soulo. 11Süna raibütoua reilova-a haore haosah sü mitar 44 solai, ae deka kai alia dekabei-a kai sü baosahu nou soulo, ana poa vaokhaire ae thaithouretao hai shahu nou soulo. 12Teinghi loulovatha haore haosah nahai mitar 22 sho-a nou haolai, ae deka kirou alia dekabei kirou bailai. 13Teinghi palovatha, kikhu bomü buyu hilova-a haosah nasü mitar 22 jha dulai. 14Kikhubomü alilovatha hi haore haosah nasü mitar 22 dulai, alia deka asü sholai ae dekabei-a asü thoulai. 15Taloure kikhubomü alilovatha-a haosah nasü mitar 22 dulai, deka asü sholai ae dekabei-a asü thoulai. 16Kikha taloure kikhu hi haosah nasü mitar 9 dulai, ae haosah sünasü daiyu, maomüyu ae zaiteiyu zhusa tyanou veishoa deizüzüyu sah ahai nou thaoloua daokhai touyu tyanou haolai, alia haosah süna hisü bah nou cha raothoulo, sübüa haosah süna hrare donou deka adai ae kabei adai shulo. 17Chikuyu kide pehao teitei hi dekatao sü shahu nou soukhai touyu kizha nou paihaolai, ae vaokhaire shuhtao-a shahu nou soulai, alia dekabei hi thoukhaiyu hai baosahu nou soulai. 18Chikuyu kide nahai mitar 44 sah sholai, mitar 22 jha dulai, ae mitar 2.2 kulai. Sühi haore haosah hai veishoa soukhai touyu deizüzüyu sah nou haolai alia sü phi hi baosahu nou thoulai. 19Poa nou Rathokipao hi vah soure natao alia chikuyu kide ae kipao hi veakhare hushu teitei sü baosahu nou soulai.
Meivabvü hi Thoure Theadzü
(Lev 24.1-4)
20“Meivabvü nasü panou mei taokhai koute loure donou Israel mai hrülai hisü veikayu oliv theadzü sü ne hi pove peio tea kharochi peio. 21Maisou nou ve jüa bure Ratho kipao hi vo sübvü nghoujü nou haosah haokhai touyu pa hinou Aaron ae puh nahpoutu maitao nou meivabvü nasü taolai. Meivabvü nasü Enou buyu buh hinou koukhe nou poa shona koute panou tao-a bulai. Kharochi hainasü Israel mainou haithai vere bonakha hrülai-a soukou telai.
Currently Selected:
TAPALOUYU 27: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
