EZEKIEL 40
40
ZHO KOUNOU HAITHAI VEI RATHOKI NGAOYU
(40.1—48.35)
Ezekiel ye Jerusalem hi Sapoa Veyu
1Etaoye vakou nüpoa tayu po kaingou vei potei ashu, teithe kirou zhou ae Jerusalem nuhdu polouyu po kiadai kou hai Mapao vei khouko nasünou ahi velou loure ae Eye sapoa tare. 2Zho kounou Ramai nou Eye Israel maivei teidei hi save peie ae kushoyu deichi ali hi Eye pokhai peie. Avei nghoujü hinou ki taoli hai bua nou zhingao-e ae süsü nuhdu ali büwe. 3Puhnou Eye sühi sa-a nghikouyu phaki, Enou baosahu büyu mei ali nou puh bah hinou daizüzüyu douyurai ali ae süüpo ali hai poa nou buyu sü zhingao-e ae puh sü rokhubomü hinou la-a nou bue.
4Puhnou ahi paoe, “Thai-a bailaiyu pure, zhukhaio. Enou paoyu sü soutaosoua keilo ae Enou neye ngaoyu veishi sü zhutou toulo, daiolouzü hai vanou neye sü hai hi save-a nou baie. Nenou Israel mai hisü nenou ngaoyu veishi hai paongao peilai.”
Teinghei Palova Rokhubomü
5Enou ngaoyu nasü Rathokire, ae süsü kivo nou khohao khaitoue. Mai nanou puhvei douyu süüpo nasü poloure, ae süna hai mitar asü so-e, ae poa nou kivo sü dou-anou bue. 6Süthaisü puhnou teinghei palova rei-a buyu rokhubomü nahisü kouloure. Puhnou phihea dou hinou tapoa khe peitaova hinou kikha taloure bomü hinou tapoa khe peitao hinou taloure bomü nasü doue ae sünasü mitar asü hai thoua doulue. 7Süna thaisü talouyu ludu ali bue, ae sühisü holo hailo vanou reihkhao maivei kide asü asü bue. Kide sütao hai sa-jha-a deitou baie, mitar asü asü due, ae sütao ko hinou buyu kivo hai mitar ahai-a da shouwe. Reihkhao maivei kidetao buyu thaisü ludu ali hai mitar asü sho-a nou kide hi taloure kikhubomü hi kouwe, sünasü Rathoki buyu hilova rei-a nou bue. 8-9Süthaisü puhnou kide nasü dou-e ae mitar adai thoue, ae rokhubomü vei akhai hinou süsü Rathoki nghitei-a buyu hinou akhai hi koute hai kivo shouyu sü mitar ali nou soukhaitoue. 10(Reikhao maivei kidetao, ludupe hinou buyu teitei hai raibütoua baie ae sütao vei kivo shouyu hai-a raikhai toubaie.)
11Süthaisü mai nanou rokhubomü hinou talouyu ludu nasü kazhou dusa touyu hai dou-e, ae süsü mitar churouda hai bue, ae rokhubomü kohisü mitar angou bue. 12Reihkhao maivei kidetao nghoujü hi hai kivo na-a nou raibütoua khokhai toue, süsü kuyu hai sentimitar raingou-e ae shouyu nou sentimitar raingou-e. (Kidetao hai sha-jha-a mitar asü asüe.) 13Süthaisü puhnou rokhubomü thailo vei kivo hinou poa kide talapoa kivo alilova kouyu sü mitar kiahaida bua douloue. 14Kide akhai hinou buyu nasü puhnou mitar kirou jha dua nou douloue, ae kide süna hinou maisou nou vejüa buyu buh hisü taloue. 15Vakou vei kivo, süsü rokhubomü hinou poa kide akhai hi loute hai mitar kaingou bue. 16Kivo vakou nou buyu kidetao hisü kikhu taitya chekhei bue, ae kivo lüvai kohinou buyu kidetao-a kikhu chekhei bue. Kivo khevai hai nghabe zhurai-a daothou khaitoue ae sütao hai ludu hilova rei-a bue.
Vakou nou buyu Chikubu
17Süthaisü puhnou Eye vakou nou buyu chikubu hisü saloue; sühisü kide shirou hai vakou vei kivotao hinou southou khaitoue, ae süpa hisü chuh nou ludu hai khovete khaitoue, 18süsü chikubu pehao veishi hai kikhu vei chikubu buyu na jünou napu hie. 19Dei kuyu hinou rokhubomü ali bue ae sühinou kikha vei chikubu hisü louwe. Mai nanou rokhubomü ahai kohi douyu phaki mitar raingou bua nou douloue.#40.19 Hebrew hi larücha ahai loupu hie, süna vei ko sü shesha-a sümoe.
Reilova nou buyu Rokhubomü
20Süthaisü mai nanou reilova buyu rokhubomü hi louyu ludu nasü doue. 21Puhnou ludupe hinou hailo kide asü ae holova kide asütao, sühai kohinou buyu kivotao, ae kikha taloure kide hi hai teinghei palova nou buyu rokhubomü vei ludua raibütoue. Rokhubomü vei ludu hai mitar kaingou bue ae kayu nou mitar kiahaida bue. 22Talouyu kide, vabomütao, ae kivova hi nghabe zhurai daokhai touyu teitei hai teinghei palova rokhubomü raibütoua soukhaitoue. Hai hinou rokhubomü hi kouyu hai phiheadou anai bue, ae kikha taloure kide nahai chikuyu buh hilova reiwe. 23reilova buyu rokhubomü vei palova nou teinghei palova buyu rokhubomü raibütoua chikubu kikha taloure hi rokhubomü ali bue; puhnou rokhubomü ali hinou poa ali hi doukouyu phaki mitar raingou bue.
Khelova buyu Rokhubomü
24Süthaisü mai nanou Eye khelova saloue, ae sühia rokhubomü ali bua ngaoe. Puhnou kikha vei kivotao ae taloure kidena douzhuyu phaki rokhubomü kukhetao raibütoue. 25Rokhubomü talouyu hi kidetao ae vabomütao hai kukhutao raibütoua baie. Rokhubomü vei sha teitei hai mitar kaingou bue, ae jha hai mitar kiahai-da bue. 26Hai hisü phihea dou anai nou taopoa nou khewe, ae taloure kide nasü khaidukha hinou chikubu hilova rei-a nou bue. Sühia nghabe nou talouyu ludu vei kivo vasü chah daothou khaitoue. 27Hai hia rokhubomü vei ludu nasünou chikubu hisü louwe. Mai nanou rokhubomü sühai kohi buyu sü mitar raingou bua nou douloue.
Kikha vei Chikubu: Khelova Rokhubomü
28Süthaisü mai nanou Eye khelova buyu rokhubomü hinou kikha vei chikubu hisü saloue. Mai nanou rokhubomü hi talouyu ludu nasü douzhuyu phaki, haina-a kijü nou buyu rokhubomü vei kivotao hai raibütoua baie. 29-30Sühi reihkhao mai vei kidetao, kikha taloure vei kide, ae kikha vei kivotao hai rokhubomü khukhetao raibütoua baie. Rokhubomü hi talouyu ludu buyu kidetao hinou vabomü buyu haitao-a kukhetao raibütoua baie. Sütao vei duyu nou mitar kiahai-da bue. 31Kikha taloure vei kide nahai vakounou buyu chikubu hilova reiwe, ae talouyu ludu vei kivo vasü nghabe nou chah daothou khaitoue. Phiheadou acha nou rokhubomü haina hisü taopawe.
Kikha vei Chikubu: Teinghei Palova Rokhubomü
32Mai nanou Eye teinghei palova rokhubomü hinou sa-a kikha vei chikubu hisü loue, ae süna-a rokhubomü kukhe deibü baie. 33Sühi buyu reihkhao maivei kidetao, kikha taloure kide, ae kikha vei kivotao-a dutaiyu hai kukhetao raibütoua baie. Sühi talouyu kivotao hi ae kikha taloure kide nahia vabomü thoukhai khaitoue. Sütao sah veishi hai mitar kaingou so-e, ae jha duyu nou mitar kiahai-da bue. 34Kikha taloure kide nanou vakou buyu chikubu hilova reiwe, ae talouyu ludu vei kivo vasü nghabe zhurai daothou khaitoue. Sühinou rokhubomü hi tapayu hai pheiheadou acha bue.
Kikha vei Chikubu: Reilova vei Rokhubomü
35Süthaisü mai nanou Eye reilova vei rokhubomü hisü sa-a nou khaive. Puhnou sünasü doue, ae süna hai dutaiyu sü kukhetao raibütoua baie. 36Kukhe raitoua reihkhao maivei kidetao, kivo khevai zhainga southouyu, taloure kide, ae pehao veishi hinou vabomü buyu teitei hai raibütoua baie. Sühi sha hai mitar kaingou-e ae jha duyu hai mitar kiahai-da bue. 37Talouyu kide nahai vakou nou buyu chikubu hisü rei-a nou bue. Talouyu ludu vei kivo kikhava hai nghabe zhai hinou chah daothou khaitoue. Sühinou rokhubomü hi tapayu hai phiheape acha bue.
Reilova Rokhubomü hinou buyu Kitao
38Kijü nou buyu chikubu na hisü reilova nou buyu rokhubomü hinou kikha taloue. Kikha talouyu kide nahai chikubu hilova rei-a nou soukhai toue, ae sühinou veishi nou posheela peiyu hrikhaona rao khesü meidei-a dzükhüsheewe. 39Kikha talouyu kide haina hisü taibel adai bue, kide vei holova nou ahai ae hailova nou ahai bue. Tebel haitao phao hinou puletao nou meideia posheela peiyu, mah vei posheela ae paozho khaipeiyu posheela hrikhaona khesü popa dathawe. 40Kijü hia taibel sütao raibütou touyu adai hai bue, reilova vei rokhubomü hinou talouyu ludu holova ahai ae hailova ahai bue. 41Posheelayu hrikhaonatao dathare donou taibel acha hai southou khaitoue: Kide vei kikha hi adai ae chikubu kijü hinou adai bue. 42Kikha nou buyu taibel adaitao hai kikhaorü veishi nou meideiloua posheela peiyu phaki poa vah soue, ae süsü chuh nou soukhaitoue. Süna hai sentimitar raingaou hai sha-jha deitoua nou soukhai toue. Posheelayu hrikhaona poa dathayu basei teitei hai taibel haitao peiva khaikhaitoue. 43Tebel vei khupehao teitei sü milimitar raingaou duyu ali nou haovü khaitoue. Posheelare sou teitei sü taibel phaova pokhaiwe.#40.43 Phoure 43 nahai Hebrew hi sheesha moe.
44Süthaisü mai nanou Eye kikha nou buyu chikubu na hisü sapoa nou louwe. Sühisü kide ahai bue, kide ali nou khelova nou bue ae sünasü reilova rei-a soukhai toue, kide ali nanou reilova nou khelova rei-a soukhai toue.#40.44 Larübvü ali hi Süthaisü...khelova rei-a soukhai toue; phoure 44 nahai Hebrew hi sheesha timoe. 45Mai nanou ahi kide khelova rei-a buyu na hai Rathoki hinou napao soua buyu maitao vei-e, 46ae kide reilova rei-a buyu nahai posheelabu hinou kuvah soua buyu napao maitao vei-e tea paoe. Napao mai hrülai hai Zadok vei tyaosholea vanou hrüve-e; puletao likheiye Levi maivei khü hinou pa Mapao nou buyu buh hinou kuvah soure hai vahbu peia nou baie.
Kikhavai Chikubu ae Rathoki Souyu
47Mai nanou kikha buyu chikubu nahai douyu phaki sünahai sha-jha mitar raingou bue. Rathoki na hai teinghei loulova nou bue, ae sünavei nghoujü hinou posheelabu nasü bue. 48Süthaisü mai nanou Eye Rathoki hi taloure kide na hisü saloue. Puhnou sünasü douyu phaki, sünahai thouyu nou mitar ahai-da bue ae kayu nou mitar anai bue, ae kivo hai mitar ali-ada shoa soukhaitoue. 49Taloure kide nahi tapayu phiheadou hai mitar kirou dua nou soukhaitoue ae thouyu nou mitar churoue. Sühisü deka ahai bue, holova ali ae hailova ali tea soukhaitoue.
Currently Selected:
EZEKIEL 40: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
