GALATIAMAI 6
6
Alinou Li Kou Pfükhayu
1Athaihou jürai khemai, maitaliye mah soua buyu hinou niloure toulouzü, rako hinou tsüa buyu neletao nou puhye sü kaona-a souzü peikhaio. Ana lah neletao zhutoulo, molouzü neletaoye-a thaolou veie. 2Alinou likou pfükha peikhaio, alia sübüa Khrista vei zhai nasü souve tepeio. 3Daiolouzü maitalinou haliamo bukhaia puh hai halie tea chuwu louzü, puhsü lahye labaiwe. 4Maili linou lah lahvei vahsü zhai zhulai. Puhvei vahsü veie toulouzü, puhnou süna vanou kukhemai talinou soukhai touyu naye paokha khaimoa khaophu soulou veie. 5Daiolouzü mai hrülainou lah lahvei kou pfübailai.
6Ramai chipao doupeiyu ngaoloua bumai puhnou puh hi buyu avei pfüphousü puhye dou-apeio naye koa zhitouyu souloukhaio.
7Neletao lahnou lawuso; maitalinoua Ramaiye konü louhoe, daiolouzü maitalinou puhnou vukhai touyu süsü puhnou chiloubaiwe. 8Vasou züpa vei douhi vuthou khaitouyu puhnou sühinou athaisü chilou bailai; Rako vei hi vuthou khaitouyu puhnou, Rako hinou teisa halouho ahri nasü chiloulai. 9Südonou Eletao nou avei souyu hisü leveawu laimokhe; daiolouzü Eletao nou lekhaita molouzü, teile kao-avei hinou Eletao nou cha chilai. 10Südonou Eletao nou teile kao-avei ngaosasü maikhemai hrülaihi koulihsoua lüloumai kikhahi bumaitao hisü avei vah soupei laikhe.
Akhai Tukhayu ea Akhai Chidoh
11Zhukhaio, chuo daizhozhou duyu larü chahnou Enou Abah vuzünou neletao hi rüsa! 12Neletaoye panou hee rode loure donou nutaiyu puletaosü vakou pfüphao hilonou khaophu soua aveikho sounüyu puletaoe. Sütoukhaia, puletao nou süsü Khrista vei kros donou puletaoye mainou souvea more donou likhei soubaie. 13Hee rodeyu puletao koute-a razhainou paoyu zümoe; ana neletao nou pfüphaovei naa haina soulouyu vanou puletao nou khaophu souloure donou neletaoye panou hee rode nüwe. 14Sütoukhaia Eye donou louzü Eletao Mapao Jisu Khrista vei krosna vanou likhei khaophu soubailai; daiolouzü puhvei krosna vanou deiphao hai Ahinou thaire, alia E-a deiphao hinou thaire. 15Daiolouzü hee rodeyu moa rode moyu sünanou halia moe, ana tsü chorewo louzü soushu louyu sünasüe. 16Zhai haina thaifüa tayu puletao hrülai ea Ramai vei Israel maitao pei hi kaonayu ea zhuvea buyu sü souloutheo.
17Akhai hinou, maitalinoua Eye souvea pupei khaiso, daiolouzü Apfüphao hi zheebuyu sünanou Ehai Jisu vei kilai baie touyu sü pongaowe.
18Athaihou jürai khemai, neletao hrülai pei hi Eletao Mapao Jisu Khrista vei zhuvea nasünou koa buyu souloutheo. Amen.
Currently Selected:
GALATIAMAI 6: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.